瞳遊樂 (八十後香港家庭的親子旅遊blog): 10月 2015

2015年10月18日星期日

【香港本地親子遊】【九龍飛鵝山】九龍鬧市旁邊的「飛鵝山生態之旅」

行個山，我要捉實呢兩位LADY，瞻前顧後

其實行山除左可以接觸大自然之外，亦都係發揮一家人團結精神。上個星期見到開始翻風，天氣轉涼，太陽又無咁曬，係一個行山好時候! 今次我選擇行飛鵝山，當然其中最主要原因係我以前係山上面既「飛鵝山基維爾童軍營地」工作過，已經熟悉哂果度既地形，比較易掌握，而且加上飛鵝山有車路連接，亦都行山熱門地，所以大吉利是有咩突發事情，都可以輕鬆退回市區。要兼顧好哂所有情況，我地就出發啦!

p.s. 最重要我年幾前既斷腳好番，係時候要操下啦~

今次行程由彩虹出發，搭綠色專線小巴到飛鵝山道口，之後逆時針咁兜一個圈，由札山道落山，終點就係彩雲邨。因為瞳瞳比較少行山，所以會同佢到「基維爾童軍營地」附近麥理浩徑warm up下先，行一小段山徑，之後5我地再去小水潭休息，睇下香港瘰螈、淡水蝦、魚等等。

由港鐵彩虹站搭專線小巴1A往西貢方向，同司機講:「飛鵝山路口落車」，就可以了。落車後沿飛鵝山路走入高級住宅區，一直就到上頂入單程路。沿路易行，亦有不少行山人士，途中亦有涼亭等設施，但也要小心車輛。

飛鵝山在沙田同九龍之間，亦即係分隔開新界同九龍，所以打仗時係一個兵家必爭之地，在二戰時候，附近都遺下不少戰時的「遺物」，隨處可見，我地行既飛鵝山道同札山道，以前都是軍車路，作軍事用途：

路上見到英軍的後備水缸，用來支援對下的PB200機槍堡所用的水冷式重機槍

英軍戰時PB200機槍堡，快被野草掩埋。

轉入山路

天梯?

跟住爸爸走

沾滿水珠的蜘蛛網

天氣有霧，視野不佳

戰時座標石，英軍撤退前把頂部的座標資料毀去了。

慢慢退回營地，去附近小水潭休息，瞳瞳話最重要係有地方比食野喎~

英軍臨時挖掘的戰壕

開餐啦~

之後帶瞳瞳在旁邊浸下腳，小水潭入面有香港瘰螈，不過呢種生物有太多個誤會，起初我地叫佢做「蠑螈」，但期後確實為「瘰螈」；以前以為佢係香港獨有品種，但近年在中國廣東省一帶發現都有。佢係屬於香港受保護的動物，而且只會在乾淨的溪水先會見到(一般會在河的上游，因為污染較少)，所以我地就只係睇下。除左香港瘰螈，入面仲有不少小蝦小魚昆蟲，細心觀察。

落水一刻!! 一個好體驗，比佢知道水流的感覺，同埋水沖擊腳仔果一下，真係感覺到大自然的力量。

回程了，由基維爾童軍營地駁返飛鵝山路，可以在高處回望九龍風景，可惜當日視野不佳，未能見得好清楚，之後就全程落斜，中間接回札山道落彩雲邨結束行程

有用資料：

遠足時間：全程慢行約4.5小時 (飛鵝山路到基維爾童軍營地約1小時15分鐘、基維爾童軍營地經札山道到彩雲邨約1小時45分鐘)

交通：港鐵彩虹站搭專線小巴1A往西貢方向，同司機講:「飛鵝山路口落車」

自駕泊車：記得由飛鵝山路上山，札山道下山，全程單程路，不要走錯，駕車時請小心其他行山人士。

2015年10月10日星期六

【香港本地親子遊】【沙田火炭】隱藏在火炭工業區介紹香港飲食文化的「稻鄉飲食文化博物館」

「香港」 - 一個集合東西方文化的地方，社會以華人為主、背靠中國，但又經過百多年的英國殖民地的洗禮，所以連我都覺得香港人的「口味」其實的複雜。求其舉一道「士多啤梨骨」，就已經好有中西合璧的味道。

在沙田火炭工業區，入面就隱藏了一間由稻香集團所管理的「稻鄉飲食文化博物館」，透過模擬場景、迫真的道具同具價值的收藏品去令大家穿越時空，了解以前的生活文化同飲食習慣。

首先，參觀先要預約http://www.taoheung.com.hk/tc/museum/museum_p/index.html

公眾人士可預約參觀時段：

星期六、星期日及公眾假期時段：09:30-10:45,11:00-12:15,14:30-15:45及16:00-17:15

每節參觀時間為1小時15分鐘，

由「稻鄉飲食文化博物館」導賞員以粵語進行講解。

有興趣參加的市民可透過本網頁報名，每節時段名額為三十人

由「稻香訓練酒樓」正門進入

昔日酒樓未係全面禁煙，大家還記得煙灰盅擺係檯面既日子嗎?

今日我地由呢位Kate姐姐做導賞員為我地介紹

「大排檔」定「大牌檔」的寫法啱呢? 正確係後者: 「大牌檔」，「牌」指「牌照」，因為當時合法經營要向有關當局申請牌照，而為左方便人員巡察，所以張「牌照」尺寸會好大，自此稱為「大牌檔」。而家呢d綠色鐵皮牌檔，只有中區、深水埗、石硤尾等等一帶先有，因為環境衛生問題，已經買少見少。

兩條友開檔呀!! 燒味靚唔靚?

街邊車仔檔就真係香港特色啦!! 而家又係買少見少!! 以前用火水爐，連食果粒燒賣都有火水味，真係好特別，你又堅擺到入口! 仲有我一直都唔明，點解「煨蕃薯」、「鹽焗雞蛋同鵪鶉蛋」、「炒栗子」呢三樣野會互相組合? 不過唔理咯，我見到都會幫襯，除左好味同口痕，仲係我地香港人既集體回憶。

至於雞蛋仔....我都係原味支持者!!

咁細個出黎開檔啦?

講開酒樓，我細細個就爸爸(瞳瞳爺爺)帶我成日去飲茶，搞到細個有段時候真係唔鍾意架! 不過而家人大左，又鍾意番喎!! 所以我地今時今日星期六、日放假就經常去飲茶架啦! 我當然未有好深印象「掛雀籠、擺痰罐」既年代，不過都經歷由「點心車」變「點心紙」既階段，以前「點心車」你要去追車，自己想食既點心要去搵，搵到邊架車又要搵邊一籠，同埋永遠拎下一個點心籠，因為成日覺得第一個(最頂)成日比人揭起睇無咁好。