瞳遊樂 (八十後香港家庭的親子旅遊blog): 1月 2016

2016年1月25日星期一

【日本、大阪、有馬溫泉】[2015跨年有馬大阪親子遊]Day 5 Tomica shop DIY砌巴士、梅田地下街、搭利木津巴士一上一落到關西空港、特集：福袋大揭秘

第五日（３／１）
酒店 CHECK OUT > 大丸TOMICA店 > 午餐：梅田地下街 > 機場Airport Limousine利木津巴士 > 關西空港 > 香港

行程嚟到最後一天，終於要走啦！我地坐１８１５起飛的航班返香港，如果早兩個小時左右到機場，搭機場巴士車程大約一小時，即係我地最遲要在下午三點或之前搭到機場巴士啦！

呢個航班時間幾好用，我地中午十二點CHECK OUT，行李寄存係酒店先，之後就去大丸百貨公司１３樓的TOMICA SHOP，帶瞳瞳去DIY一架車仔，而呢段時間的DIY主題正正就係瞳瞳爸爸最愛既「雙層巴士」。

TOMICA SHOP唔同時間會砌唔同既車仔，主要係私家車，可能因為易砌，巴士算係少出現，以前一個月換車款一次，但而家大約１０日就會換款，今個月就係巴士啦！(６００ YEN/架)

先去「執件」，由車殼、底盤、內籠都係自己揀，跟住就去收銀處比錢，佢同時會比一張整理劵你，如果人多就要按整理劵次序排隊，好彩我地當時無咩人，直接拎去比「工場」的店員就可以了！所謂的「工場」，其實就係一間在店內劃出一小部分，入面有一個電鑽去將車仔的最後一粒鏍絲鑲死，呢個工序就交由店員負責。

店員好細心好仔細，由裝嵌到試車都會有，態度一絲不苛！

揀自己心水款式先

「零件」自己挑選

有個小籃子比你放零件，排隊等緊收銀處比錢

後面就係「DIY工場」

店員會教你STEP BY STEP點做

試車呀～

最後階段，上鏍絲！

完成入盒！

瞳瞳為我揀的顏色啊，仲有特別的FACTORY盒

其實都係瞳瞳同瞳瞳媽媽陪我癲啫，玩完DIY車仔，我地返去梅田地下街食Lunch。可能撞啱Lunch time關係，每間舖頭門口都大排長龍，我地發現日本每一間食店門口既食物模型都好靚，好吸引！呢度大多數的食店都有「兒童餐」供應，擺得又靚、又有玩具送，真係好啱小朋友，有得食有得玩真係好開心。=)

我地無特別喜好，反而係揀啱瞳瞳食既兒童餐，求其入左去一間「日本定食」，每人點左一個餐，之後店員拎左一箱玩具嚟，原來瞳瞳的兒童餐可以任揀玩具１件，呢一箱仲係專門給女孩子，最後瞳瞳揀左皇冠。

兒童餐禮物 - 皇冠

滑蛋豬扒定食

玉子牛肉燒定食

兒童餐

「我唔客氣啦！」

甜品：日本麥當勞軟雪糕

食飽飽，我地返去新阪急酒店提取行李，準備搭機場巴士出關西空港。去關西空港巴士站就正正係酒店正門(南面)，在果度要留意下巴士站牌，因為一個去「關西空港」，另一個去「大阪空港」，千其唔好搞錯！

去到巴士站，旁邊有一間小房子，入面有自助售賣車票機，很抱歉，因為車站正在進行翻新工程，所以影唔到相，到時候面貌唔一樣，怕大家跟錯。不過唔緊要，記得係先去售票機買車票，然後就等巴士，車票無講明要坐邊一個班次，總之有車票就可以排隊上車，限當日使用，唔可以今日買定聽日用。

買完之後就乖乖地排隊等上車，由呢度出發去關西機場大約１小時車程，我地係第２個站，所以巴士來到時部份座位可能已經有人坐，大人車費單程１５５０YEN，小朋友佔坐位７８０ YEN，如果買來回票會平少少　－　２７６０ YEN

關西機場　＜＞　大阪車站前（梅田）時間表及收費表

再講多次，排隊果陣記得係去「關西空港」，之後就等車，等車期間會有工作人員問你去「一號」定「二號」客運大樓。

之後就會幫你掛上行李帶，「第１」就是「一號客運大樓」落車既意思，方便一陣去到機場的搬運行李人員辨認。上車時，慢慢把行李推到車邊，就會有人幫你搬入巴士行李箱；落車都會有專人幫你拎返件行李出嚟，一上一落，就輕輕鬆鬆到機場！

新阪急酒店與空港巴士站

空港巴士車票

排隊的人龍（車站正翻新中）

「第１」就是「一號客運大樓」落車既意思，機場落車見！

特集：「福袋」大揭秘

我地今次一於拆「福袋」比大家睇下，瞳瞳有兩個：一份玩具反斗城、另一份童裝衫；瞳瞳媽媽就買左一個女裝衫。

成個行程戰利品

瞳瞳＂BABYDOLL＂童裝衫福袋：５４００yen，約港幣＄３４５，有長袖衫ｘ２、外套ｘ１、長褲ｘ１、短褲ｘ１

到＂玩具反斗城＂，你睇下我地拆果陣幾興奮！不過.....入面好多日本卡通我地都唔識，而且.....仲有３隻唔同SIZE嘅小白.....(汗!!!!!!!!!!!!!!!!!!!!!)
但我地都好開心 =)

瞳瞳媽媽就Yodobashi入面其中一架服裝店買嘅，７０００yen，約港幣＄４４８，有長袖冷衫Ｘ１、長袖襯衫ｘ２、外套ｘ１、裙ｘ１、冷帽ｘ１

謝謝各位追看，「2015大阪跨年5天親子遊」完滿結束，希望幫到大家，讓大家安排行程時可以作為參考，行程當中的「冤枉路」和「中伏」我地一家都試過，所以都出一少力量幫各位爸爸媽媽掃平一切障礙！希望大家都可以享受自己屬於一個的親子遊同難忘回憶！

［外地親子遊］下次預告介紹地點：「台灣」～

［本地親子遊］＜瞳遊樂＞亦會定期為大家介紹香港本港好去處～

下次玩過，再見！

有用資料:

1. 關西機場＜＞大阪車站前（梅田）時間表及收費表

http://www.kate.co.jp/tcn/timetable/detail/UM

2. TOMICA SHOP 梅田店

地址：大阪梅田大丸百貨１３／Ｆ

http://www.takaratomy.co.jp/products/tomicashop/shop/osaka.htm

2016年1月21日星期四

【日本、大阪、有馬溫泉】[2015 五日四夜跨年親子遊]Day4 (2之2) 品嚐關西第一拉麵:「神座拉麵」、梅田yodobashi VS 難波BIC CAMERA、終於找到你「屎屎人」

第四日（２／１）
早餐：便利店輕食 > 大阪市立動物園 > 午餐：神座拉麵 > yodobashi > 心齋橋BIC CAMERA > 晚餐：無添くら寿司元町店 > 心齋橋搵屎屎人 > 酒店

玩左半日「天王寺動物園」，我地就返去梅田食Lunch啦，今次想試試有「關西第一拉麵」之稱的「神座拉麵」，拉麵店時時刻刻都有人排隊，吸引左我地留意，究竟有咩咁好食呢？

返到梅田，排隊依然，人龍大約十多個，首先去自動售票機去買想食既野，然後才去另一邊排隊等位。

我地揀左佢呢度人氣NO.1既「小叉燒玉子拉麵 (８８０ YEN)」同人氣NO.2既「餃子套餐 (９３０　 YEN)」。食物配料同圖示差不多，對版！但如果你好似我鍾意濃湯底，咁呢度未必啱口味啦！事關入面有大量芽菜，湯底味道就好清。不過口味就好啱女生，而且食落唔覺肥膩。

先嚟自助售賣機買飛先，之後排隊等候安排入座

進店後，將票交比店只就可以了

店方有兒童餐具提供

人氣NO.1既「小叉燒玉子拉麵」

人氣NO.2既「餃子套餐」

梅田的Yodobashi (中文叫：友都八喜) 同難波的BIC CAMERA，兩間都不相伯仲，如果想係大阪買電器產品而時間又有限，嚟呢兩間價格就可以了：

Yodobashi 購物層佔有８層+地庫２層，以賣電器、電子用品為主，當中有三層係由其他品牌進駐，如衣服、鞋、飾物等等，８樓就係食肆層；比較特別係地庫２樓，專賣文具同露營用品，面積非常大！

梅田Yodobashi

BIC CAMERA就有７層，同樣都係以賣電器、電子用品為主，但佢有一個位置係專賣藥品，價錢同街上的藥妝差唔多，而且都幾集中，而且退稅都比較方便，去一個收銀處就搞掂！

不過個人觀感，我比較鍾意行BIC CAMERA，因為貨品比較集中；Yodobashi 地方真係好大，大到有種唔想行既感覺，花多眼亂。

難波BIC CAMERA (官網)

（兩次瞳瞳都睡了，抱住佢，無特別影到相，留待大家發現，各有各特色！）

去完難波的BIC CAMERA，又係搵野食時間，瞳瞳念念不忘「扭蛋壽司」，加上我地又有PASS，去邊到無所謂，最近的分店就只係距離難波站一個車站的「大國町」站　－　「元町分店」。我地發現幫襯呢間分店既都係附近住的人，而且需要等位，幾多人下。

似係即磨的WASABI

上面果層係柯打食物的輸送帶，拎哂食物之後要按掣一下，「火車」便會走。

旅程快完結，飲杯啤酒先

食飽飽，準備返酒店，不過我地仲未見到瞳瞳好想見既屎屎人(前文：瞳瞳與屎屎人的趣事)，其實我地行左好幾次，仲專登在難波出站，都唔見「屎屎人」，今晚叫最後一晚，又有PASS，再搏一搏啦！

今次終於見到呢位街頭藝人啦，不枉我地專登嚟左幾次搵佢，佢全名叫「オモロ川だいすけ」，拼音係「omrogawa」，單睇佢既造型同聲線都已經令你覺得佢好搞笑，自從第一次見過佢之後，我地瞳瞳一家都like佢。開頭以為佢好慘，表演唔多人睇，但後來上網專登搵下佢既資料，原來都幾搵到食，仲舉辦搞笑比賽給人報名參加 (有獎金添)。XP

瞳瞳行去嗌佢做「屎屎人」，好搞笑！之後我仲比暑假影既相屎屎人睇添！（「屎屎人」只係我地一家自己叫佢的稱呼）