計劃今次行程，瞳瞳爸爸就好想試下「Infinity Pool 無邊泳池」，感覺好靚好舒服，二來夏天放暑假，梗係要玩下水。不過一般有Infinity Pool設施既都以「Villa 度假村/別墅」為主，而Villa私隱度較高，再加上以迷人秘境靚風景為賣點，所以都住得遠離繁囂一點！而活動同餐飲等等都會留左Villa入面，足不出戶都可以解決一日所需！正所謂「人一世，物一世」，久唔久豪一次獎勵下自己，帶埋屋企人嚟玩，咁就無憾啦！
做左好耐功課，最後揀左位於Kamala的 「Paresa Resorts Phuket」，「Paresa」一名在泰文的意思就係「天堂中的天堂 Heaven of All Heavens」。揀「Paresa Resorts Phuket」既主要原因係佢位於布吉機場同芭東區之間，順哂我地既路線；二來係佢既設計特色，每個房間都有自己既小泳池、酒店亦有個公眾 Infinity Pool、而且建於海邊懸崖之上，嘩！懸崖呀！好似好刺激咁；三來就係服務，網上評價不錯，一於去試下！
 |
| Paresa 的 Infinity Pool |
今次一試，終身難忘，正！各位有機會到布吉，不妨花多少少錢，至少都豪一晚，咁就真係嘆世界啦～
由布吉機場去Paresa，沿途由大路轉小路，大約45分鐘車程，我地就到達Paresa，一抵埗，已經有職員等候，之後帶我地到大堂check in，同時間其他職員就幫我地處理行李，係度提一提先，在Paresa既職員都統稱做「Angel」，如果你有咩需要或者要求，都可以向佢地提出。
之前講過「Paresa」一名，泰文的意思就係「天堂中的天堂」，其實佢有滲入左少少佛教思想，在一間舒適、寧靜的狀態下，人就可以放輕鬆，所以大堂都播緊一d佛教的輕音樂，同時間Angel為我地奉上Welcome drink同冰凍毛巾，仲比我地選擇當晚用咩香味既肥皂，三選二，我地揀左Jasmine 及 Coconut。
 |
| 當晚用既肥皂，三選二，我地揀左Jasmine 及 Coconut |
房間準備好，由身穿白色制服的Angel帶我地去房間，今次接待我地既Angel叫「PANG」，臉上常常掛住笑瞼，好快就和瞳瞳熟稔同牽手，我們離開大堂，會經過有條長走廊，盡頭係一道緊閉的大門，門前有一個大銅鑼，Angel就叫我地敲下佢，正式歡迎我地到來。
一推開大門，原來係一片草坪，對出就係「Andaman Sea 安達曼海」，景色非常開揚，完全令人耳目一新，好似進入「天堂」一樣！Angel PANG話呢個地方平時係比人搞Wedding Party 結婚派對之用，而多數新人會揀日落時份係度結婚，對住夕陽"Say I do"，夠哂浪漫！
在草坪旁邊有升降機，我地就落一層，轉右就會到達Paresa的餐廳－「Diavolo」，呢間餐廳好重要，係我地今日既午餐、晚餐同第二天早餐的地方。Angel PANG已經安排好高爾夫球車接我地去今晚住的房。Paresa 地方好大，而且亦沿懸崖邊興建，所以坐高爾夫球車在上上落落既斜路就比較舒適，如果你係房間入面，同一道理，打電話去Reception前台book車，而你就留在房中，負責揸車的Angel一到埗，佢就會叫你敲門叫你出黎上車架啦，好方便。
 |
| 客人要坐高爾夫球車穿梭酒店房間，唔駛點等，一book就有車 |
今次我地揀左「Ocean Pool Suite」(前稱叫Aqua Pool Suite)，其實Paresa有唔同類型的房間適合唔同的朋友，大家不妨參考下：http://www.paresaresorts.com/accommodation/
例如當中有間Spa Pool Suite，在泳池中間有個向海的雲石浴缸，勁適合情侶；另外仲有3、4、6床不同的配搭，共用一個私人泳池，適合大夥人的家庭，一齊玩之餘又有自己私人空間。
講返我地間房，一開門，「嘩」一聲！房間非常豪華，以泰國南部風格設計，出面有個私人長泳池，係區內少有自己房間私人泳池都可以有Infinity Pool感覺，大家一齊入屋黎睇下啦！
 |
| Angel PANG好客氣，幫我地孭起背囊，仲拖住瞳瞳入房，呢度就係我地房間的門口！ |
 |
| KING SIZE DOUBLE BED，仲要對住出面靚靚海景！ |
 |
| 在上圖主人床的對面，就係呢張梳化，今晚我地三人入住，Villa特別為瞳瞳把梳化改成一張單人床，好貼心！ |
 |
| 房內亦提供的咖啡機，呢部係整Espresso既專家來的！阿拉伯人對咖啡的要求很高的，而Villa 提供的正是阿拉伯咖啡，十分欣賞當中有不含咖啡因的咖啡，可以讓喜歡飲咖啡又怕睡不著的遊客享受咖啡的迷人處~ |
|
|
|
 |
對出露台外邊有檯和椅的休閒區，仲有兩張可以享受海風同曬太陽的床。
 |
| 之後到洗手間同浴室：wow！洗手盆左右分別有兩個，大家唔駛爭啦！ |
|
 |
| 個人護理用品仲細心到分成「FOR HER」同「FOR HIM」 |
 |
| 呢套係我既！=) |
 |
| 大家仲記唔記得Check in果陣，Angel咪比我地揀的番梘呢？佢地已經將我同瞳瞳媽媽所揀的放在洗手盤旁邊！ |
 |
| 呢個向海的浴缸，對住靚景咁浸浴，真係極嘆！出面就係私人泳池，「天連海連泳池」，分不清了！ |
 |
| 洗手間旁邊是「室外沖身」，可以淋浴，方便大家上水或落水沖一沖身！ |
 |
| 呢個就係室內淋浴間，就係浴缸對面，同樣望到大海！ |
 |
| 泳池係長方型咁，夜晚仲有燈添，水深大約1.4米左右，有返咁上下水深，所以好有浮力！ |
Angel 們替我們安頓好行李，詳細地介紹房間設施後，係時候食午餐啦！於是幫我地call車，送我地去餐廳！Paresa內的餐廳「Diavolo」提供「地中海菜」（主要為意大利）同「泰國菜」，咁我地到埗泰國第一餐，一於就食泰國菜啦！
餐廳係我地解決一日三餐的地方，有室內同室外的環境可以坐，我地叫左個set lunch，因為係泰南特色菜，所以口味會偏辣一點，小食併盤同串燒都香口出色；大蝦個汁惹味，蝦頭仲好多蝦膏添；瞳瞳把整個竹筒飯吃掉；冬蔭功的辣味返到去房都仲記得～
 |
| Paresa內的餐廳「Diavolo」 |
 |
| 我地坐在露天位置，享受陣陣涼風～ |
 |
| 而我地坐的位置對出，就係呢個平台啦！ |
 |
| 和女兒談天說地～哈～ |
 |
| 花多眼亂，於是我地叫左套餐，餐牌中英對照，方便許多！ |
 |
| 對住藍天白雲，享受陣陣的海風，如果有一杯又健康又涼浸浸的飲品，真係賞心樂事﹗所以立即叫左杯水果特飲比瞳瞳，呢杯係芒果溝香蕉smoothies，好新鮮！ |
 |
| 小食併盤好出色 |
 |
| 個沙嗲汁好惹味 |
 |
| 全部都泰國地道口味，所以口味偏辣一點 |
 |
| 甜品：芒果糯米飯，暖暖的糯米配上香濃的椰漿，加上酸酸甜甜的芒果，直衝向味蕾~嘩…讚﹗ |
 |
| 離開餐廳前，餐廳代為book車，等車的時侯遇上不怕人的小貓~ |
食飽飽，不如睇下Paresa既設施咯，成個Paresa座落係海邊的懸崖上，而為左保育大樹，在興建的時候都加以考慮同盡量避開，所以連接成個建築群主要靠木砌的行人木棧道。Paresa有一個公眾的Infinity Pool 無邊泳池、向海的圖書館"Muse"及精品部、Gym House 健身室、廚房教室"Recipe"同埋SPA House。
Infinity Pool
 |
| Paresa的Infinity Pool 無邊泳池 |
 |
| 泳池向住Andaman Sea 安達曼海 |
 |
| 泳池的另一端有一個水晶石能量池 |
 |
| 真係超靚架！ |
圖書館「Muse」
 |
| 享受悠閒時光 |
 |
| 旁邊有間賣紀念品的小店 |
SPA
散完步，我地就返房玩啦！Angel在我地用膳期間，利用空檔預先做左一個泡泡浴比瞳瞳玩，所以我地一返到房就有得浸泡泡浴啦！浸完之後就梗係出去私人泳池仔玩啦，水深大約1.4米，望住大海，下面就係懸崖，D風由下面吹上黎，都幾刺激架！泳池係我地自己房間包埋，幾時鍾意落水就落水，唔受時間限制。期間Villa更送來香檳，給我們一個驚喜，服務好週到！於是整個下午，我地就不斷游走泳池同浴缸，因為私隱度高，真係裸泳都唔怕！
 |
| 藍天、白雲、泡泡浴 |
 |
| 內內外外，同樣精彩 |
 |
| 有私人泳池玩，真係玩到唔想上去。 |
 |
| 真係好刺激！ |
 |
| 曬下太陽先 =) |
 |
| 多謝送來的香檳，讓我們可以嘆住香檳去遊水 |
玩完又抖完，不知不覺就到晚餐時間，原來餐廳環境更加浪漫，就來一個燭光晚餐！今次我地就試下意大利菜啦，叫左兩個Pizza(原本係叫一個Pizza一份意粉，但餐牌中文翻譯有誤，所以意粉變埋Pizza)、椰青一個、炸雞串小食，佢地仲送左每位一份頭盤：「三文魚他他」(Tartare)及一籃意式麵包。原來有麵包，早知瞳瞳爸爸就連Pizza都唔叫啦～試下其他野嘛～
講返個Pizza都幾好食，而且好足料，佢係我地香港所謂的「薄批」，所以唔會食到好漏；炸雞串小食反而個醬都係驚喜，好好味，又唔似沙律醬，但總之好味！
 |
| 燭光下的晚餐 |
 |
| 餐廳原來有不少客人，佢地一早book好檯，在平台上用餐 |
 |
| 三文魚他他 |
晚上回房，竟然有人在我地間房對面的山頭有人放煙花，近距離見到，真係好幸運，於是就影左同瞳瞳的煙花合照。呢晚玩到盡哂，好快就進入夢鄉。
 |
| 好鍾意呢張相，瞳瞳媽媽影得好好！ |
過左一晚，第二朝食早餐，早餐係以自助餐形式，每人可以再揀多一道主菜，我地就揀左奄列同 Pad Thai 泰式炒麵，至於飲品咖啡等熱飲可以柯打，而果汁就自己出去拎啦！
食物方面，由中式燒賣到冷盤凍肉都有，多士麵包蛋糕芝士少不了；生果仲好有心思切成心型。
差唔多食飽飽之際，Villa安排帶來一位Angel，為我們試做10分鐘的接摩，你不必走動，直接坐係原本位子上，就可以了。Paresa的安排真係處處驚喜。
 |
| 見到燒賣，好似外地見到老朋友一樣 XP |
 |
| 心形西瓜 |
 |
| Villa安排帶來一位Angel，為我們試做10分鐘的接摩，你直接坐係原本位子上做就可以了。 |
早餐過後，我地返房游下水，執埋行李，就準備12:00 Check out，Angel告知接載我地既車已經到左，並將行李已經放好上車，待我確認，仲好細心比左幾支雪凍過既水我地在車上面飲。住Paresa的體驗係非常好，令你好放鬆，遠離繁囂，日頭同小朋友遊下水，夜晚在餐廳同老婆燭光晚餐，再一家人睇星星，大人同小朋友都滿足到，入住過一次，人生無憾～
在此亦多謝Paresa的各位Angel照顧，亦多謝Paresa的經理：Nina，她非常熱情，這兩日一夜的體驗對瞳瞳一家非常照顧，thank you so much！
離開Paresa，剛剛好又是13:00，我們在「天堂中的天堂」享受了24小時的日與夜！
 |
| Paresa 奪得多個大獎 |
 |
| 呢位就係呢兩日負責接待的Angel -「PANG」 |
有用資料:
1. Paresa Resort Phuket
地址：49 Moo6, Layi-Nakalay Road, Kamala Kathu, Phuket 83150, Thailand
電話：+66 76 302 000
電郵：reservations@paresaresorts.com
延伸閱讀：
2016 七日六夜泰國布吉親子遊攻略 - 準備篇
2016 七日六夜泰國布吉親子遊攻略 - 「Man哥」安排接送及活動篇
2016 七日六夜泰國布吉親子遊攻略 - 住宿篇 - 活在天堂日與夜的「Paresa Resort Phuket」
2016 七日六夜泰國布吉親子遊攻略 - 住宿篇 - 擁有全芭東最大的酒店泳池「Novotel Phuket Vintage Park」
2016 七日六夜泰國布吉親子遊攻略 - 玩樂篇 - 蛋島半日搶灘風雨團
2016 七日六夜泰國布吉親子遊攻略 - 玩樂篇 - 騎大象之旅
2016 七日六夜泰國布吉親子遊攻略 - 飲食篇
2016 七日六夜泰國布吉親子遊攻略 - 行街購物篇
2016 七日六夜泰國布吉親子遊攻略 - SO THAI SPA
