今次住呢間酒店，感動到我地。😢
香港作為世界旅遊城市，旅遊及服務業一向重要。對於瞳祈爸爸來講，呢間酒店更加有一份情：話說以前瞳祈爸爸係IVE (HAKING WONG) 讀旅遊畢業出身，學校位於長沙灣，好多IVE關於旅遊、餐飲同酒店學系的課程，都集中係呢度上堂架，所以成日都見到到著住套裝呀呀西裝呀、廚師衫的同學在學校走來走去，最記得學校入面有中式同西式餐廳各一，用嚟做訓練之用。
所以，我要支持返自己的師弟師妹！
講完「那些年」。。。。都係時候介紹返主角先。
香港有一間訓練酒店，大家又知唔知呢？佢就係位於薄扶林的「The T Hotel」，「T」有Training 訓練的意思，酒店係由VTC的酒店及旅遊學院所營運，房間不多，要預約都不容易。既然難得到此一遊，晚上就直接在酒店西餐廳用餐。
The T Hotel由開門一刻的Bell boy＞到前台reception＞到房間house keeping＞到room service＞到餐廳侍應＞到廚房的廚師＞到水吧的bar tenders........全部都係由學院的年輕學生負責擔任，再輔以導師在旁指導，所以我地都成為咗俾佢地去訓練的目標啦。
出發！！
我和酒店幾次聯絡後，就下了Booking：一晚房間（海景房）＋加床＋３位早餐，共$1038。
酒店有提供免費泊車，只要預訂時向酒店告知便可，佢會比張卡片你放在車頭，有車牌號碼有日子有效期，咁你就可以入住期間無限次出入酒店。
不要以為訓練酒店就會比正常酒店次一等，反而獲獎無數：旅遊網站 TripAdvisor 2018 年「旅行者之選」(Travelers’ Choice) 3 個獎項，包括 「全中國 10 間最超值酒店」第 1 名、「全中國 25 間最佳酒店」第 3 名及「全亞洲 25 間最超值 酒店」第 11 名。更因酒店連續 5 年獲得卓越獎，故獲頒 “Certificate of Excellence Hall of Fame” 之證書。此外，更由 Hotels.com 選定為 2018 年「旅客最喜愛住宿」，住宿評分更高達 9.4 分（10 分為滿分）
酒店大堂簡潔明亮，樓底特高，空間感十足。我先去前台辦理check in手續，佢地細心安排抱住豬小B的瞳祈媽媽先在梳化區就坐，學員都勤快有禮～
立即走去窗邊望望，嘩！無敵大海景呀！T Hotel位於薄扶林山上，視野十分開揚，望到整個東博寮海峽、南丫島、長洲、坪洲等等，數碼港同豪宅貝沙灣都在你腳下，感覺超級優越呀！我地就係房間入面舒舒服服欣賞海景同夕陽。
房間非常整齊、企理、乾淨，而且傢俬、設備都保養得好好，實有賴House keeping同學的悉心打理，同時間亦因為我地人數的安排，所有物品都各有三份，非常細心。
寫字檯，瞳瞳扮我地返工又玩咗一陣～～～
迷你吧提供咖啡、奶茶、雪櫃都有冰凍飲品，但部份內容需要收費。
電熱水壺，正好啱哂豬小B沖奶奶同清潔奶樽需要～保險箱、熨斗、浴衣等都一應俱全。
留意拖鞋好細心！兩對大人，一對係小朋友架！
跟住我地去洗手間同浴室睇下，都係好乾淨，梳洗用品同樣都預備三套。浴室備有企缸同浴缸，浴缸仲有部電視嵌於牆內，令你浸浴當中都可以睇到電視。
估不到小小的訓練酒店都可以咁一絲不苟，置於浴缸附近的小電視～
沐浴露、洗髮水等十分齊備
毛巾還要摺到起角！
所以用品都有三份，細心，抵讚！
浴室可以直接望到房間，亦可以透過控制器用燈光把玻璃遮蔽～
酒店房間還有一個叫handy 智能手機的服務，佢可以讓訪港旅客在入住酒店期間，用呢部手機在香港境內上網同打電話，仲可以免費致電比指定的11個國家，外國人來香港真幸福！至少唔駛再為電話卡而煩惱！
「叮噹」，門鐘響起，原來是同學由導師帶領下，為每一間房間送上小食及冰塊，我地仲用英文互相交談咗幾句添。
酒店提供還有健身中心，提供健身器材、跑步機同單車機俾旅客使用～
酒店有兩間餐廳，主要分為中式同西式，兩間餐廳的開放時間要向前台同學問下，因為兩間餐廳本身都只招待會員Member only，平時做預約booking為主，今次我地知道西餐廳夜晚有開放，所以就試下西餐啦！提提你，翌日早餐都係呢度食架！
餐廳環境舒服優雅，對出有露台，亦係向海。點餐方面都係逐樣點，雖然沒有套餐提供，但價錢合理。最重要係我文章開頭所講，支持同學仔實習，餐廳整個運作同樣由學生負責，再加上導師從旁指導。
咁難得嚟到，當然咩都要試下啦，最後我地叫左：１個湯＋１份沙律＋２個頭盤＋１個甜品，因為我唔敢將食物亂翻譯成中文，費事失體，都係用英文原汁原味好過～😅
落柯打時，同學會嘗試為我地落單，可能會遇上落幾次柯打，或者負責烹飪的同學，烹飪或上菜速度較慢，大家都要包容同有耐性，準備一個輕鬆的心情進餐更好！
落柯打時，同學會嘗試為我地落單，可能會遇上落幾次柯打，或者負責烹飪的同學，烹飪或上菜速度較慢，大家都要包容同有耐性，準備一個輕鬆的心情進餐更好！
Mexican tortilla soup：湯料十足，還加了墨西哥脆片加強口感
Chicken caesar salad：好好味，份量大，雞肉係亮點，唔肥好juicy～
Stewed kurobuta pork belly：超出色，簡單來說就係西式版扣肉，但一樣好味，沒有肥膩感！
Pan-seared USDA choice Nebraska sirloin steak：我地點了 medium，亦都好美味，真的控制到在medium的熟度，旁邊青綠色的醬汁非常惹味！
Baked apple pie：以美味甜品作為終結，擺盆好靚，食的時候記得要沾碟底的糖醬，好好味，非一般的蘋果批～
翌日早餐都係同一間餐廳，自助形式，多選擇，都豐富架！水果、冷盤、炒烏冬、各式飽餅、中式粥、蘿蔔糕等，仲即場有學員為大家整奄列添，好好味，不錯！瞳瞳一家對早餐就非常滿意啦～今次中式西式仲可以一次過試哂添！
（小心，內有洋蔥.................）
話明訓練酒店，亦都係一所學校，我又問下阿SIR：「訓練時候少不免會打爛碟喎，咁咪損失慘重？」阿SIR：「其實係呢度就一定預左打爛架啦，好多學生一打爛就問阿Sir點算，我就話拎掃把掃左去再黎過囉，其實係呢度真係無所謂，好過第二時出去做就俾人鬧架！」就算導師看似嚴厲，但感覺到好有一種愛護學員既心，「寧願今日你係度俾我話，好過你日後出去俾人鬧」。
是真的！在外面的一所餐廳實際營運，一定比現在辛苦有過之而無不及。
見到他們努力學習，又有熱誠，非常感動！各位！加油！💪💪💪💪
各位有機會的話，可以支持下佢地～瞳祈媽媽已經要求我地既紀念日要嚟呢度了～
有用資料:
1. The T Hotel
地址：香港薄扶林道145號職業訓練局薄扶林大樓6樓
熱線：(852) 3717 7388
傳真：(852) 3717 7377
電郵：res-thotel@vtc.edu.hk
網頁：http://www.thotel.edu.hk
交通：新巴及城巴報站系統播報，會列出「薄扶林村、職業訓練局薄扶林大樓」（Pok Fu Lam Village, VTC Pokfulam Complex），下車後沿職業訓練局步行５分鐘就到
新巴
4 華富（南） - 中環
91 中環碼頭 - 鴨脷洲邨
970 數碼港 - 蘇屋邨
970X 香港仔 - 蘇屋邨
城巴
7 中環碼頭 - 石排灣
30X 數碼港 - 中環（交易廣場）
37A 置富花園 - 中環（循環線）
37B 置富花園 - 金鐘（循環線）
40 華富（北） - 灣仔北
40M 華富（北） - 金鐘（政府總部）
71 黃竹坑 - 中環（永和街）
90B 海怡半島 - 金鐘（東）
973 赤柱市場 - 尖沙咀（麼地道）
A10 機場（地面運輸中心） - 鴨脷洲邨
