2019年12月30日 星期一

【香港本地親子遊】【塔門】無難度,輕輕鬆鬆塔門漫步一天遊


在西貢半島北面,有一個小島叫「塔門」,英語"Grass-Island",佩服改名的人,島上確切真真正正有一大片草地。

「塔門」島其實係一條小漁村,民風淳樸,地方亦唔大,主要得一條大街,一般大多數人簡簡單單繞一圈,絕對適合一家大細,遠離煩囂,輕輕鬆鬆親子遊~


準備好,我地就出發啦!

交通:

上文介紹「塔門」的地理位置係西貢大陸對出,但其實地區行政上係屬於大埔區,因歷史關係,住係西貢北部的村民、鄉民大多數會坐船往來大埔通商及貿易,所以正確叫「大埔塔門」。話明「塔門」島,就一定要坐船先可以到達,咁可以係邊度坐船呢?


1. 沙田大學馬料水碼頭

大家可以係港鐵大學站對出的馬料水碼頭,乘搭街渡至塔門,時間如下:(2019年12月資料)
時間表:http://www.traway.com.hk/ferry/


優點:對於大部份家庭來講係最方便,因為近港鐵站,又可以減少陸上交通時間,直接坐船到塔門,停中途站又可以當遊船河,順便遊覽更多地方!

缺點:班次少,要好好揸緊時間,簡直係容祖兒 - <不容有失>,另外船程亦較長,約1小時15分鐘。船係吐露港內行走,風浪唔算大,但唔坐得太耐船的朋友仔要多加考慮~


2. 西貢黃石碼頭



大家亦可以在西貢市搭九巴巴士94號,直達黃石碼頭。

基本上大多數去塔門的朋友都會由黃石碼頭出發,由黃石碼頭出發到塔門航程只係約30分鐘(街渡要停高流灣)
時間表:http://www.traway.com.hk/ferry/

優點:班次比馬料水多,如果「送船尾」,碼頭仲有另一個「選擇」(下文介紹)....

缺點:要由屋企先到西貢市,再轉巴士94到黃石碼頭,再轉船,陸上交通就轉折一點。

##揸車就唔可以啦,因為北潭涌到黃石碼頭之間係郊野公園禁區,如果自已揸私家車,就要係北潭涌泊車,最後都係要轉巴士/的士入去。##



瞳祈爸爸的方法

我的方法就比較簡單,因為我地家住馬鞍山,所以直接搭新界的士就好了(新界的士亦比市區的士收費平),由馬鞍山市中心出發到黃石碼頭,車資大約$150,就直送到碼頭了。

其實我都有「送船尾」的經驗架!哈哈,果一刻真係好無奈,不過黃石碼頭仲有另一個「選擇」,就係坐「快艇」去塔門,當你一家人去到碼頭,就已經有船家主勳問你去邊,塔門快艇一般收約$20左右一位,大小同價,所以豬小B都算一個收廿蚊。

其實船家生意好好,好多人都會坐呢D快艇去塔門,船程快一倍,只係15分鐘!





坐快艇又係另一種體驗

15分鐘後到達塔門

回望落船的塔門碼頭

環島行

當到達島上,建議大家一直靠左行,即天后廟方向。中間會經過塔門海傍街,呢度已經算係「塔門的市中心」最熱鬧的地方,食肆及賣手信的檔口都集中係度。


連椅子都有「TAP MUN」(塔門)兩字





之後右手邊會見到一條樓梯直上天后廟~

塔門天后廟建於清朝康熙年間,我先講一個簡單的傳說,相傳天后廟神檯下有秘洞,據講可以通去島的另一邊,伏低會聽到海浪聲。。。。。究竟有無?是真是假,就留俾大家去發現啦!


參觀完畢,面向天后廟,沿左手邊小徑上山,石屎路,無梯級,非常好行,大約上斜行15分鐘,就已經到達山上涼亭,可以見到塔門的靚靚海景了!




去到呢個涼亭附近位置,都有唔少牛牛,小朋友最好保持安全距離觀察,唔好嚇親牛牛呀~


有興趣行山的家庭,可以繼續沿路牌行去「呂字疊石」,再經山的另一邊返回塔門碼頭(即剛才落船的地方),全程石屎路,又有明確路牌,不會迷路,行程大約1小時左右。

至於我地今次「BB班」,在山上涼亭打卡,欣賞風景之後就沿路落山,落山腳程比上山快,只要十分鐘就返回大街上,可以隨意找一間食肆用餐。

塔門島上食肆基本上食的差不多:「海膽炒飯」、「手打墨魚丸」係必食,我都有問過塔門的朋友,佢地都話基本上沒有特別好與不好。下面幾間係瞳祈爸爸我親身食過,仲有大家要留意,島上食肆一般下午五點到六點左右就關門,沒有晚市!

弓字邊:在碼頭的另一邊,所以人會比較少,不過就真正在海邊~


白灼魷魚超鮮甜

塔門名物:海膽炒飯


新有記:在大街上,「新惠和」對面,同樣有海膽炒飯,亦有手打墨魚丸,好彈牙!

椒盬鮮魷好惹味,值得一試!



新惠和:在大街上,「新有記」打對面,可以當係塔門茶記,一樣有炒飯麵供應,佢亦係塔門最早開的一間食肆,大約早上七點就開門,好多露營人士朝早會落山嚟嘆奶茶、食個餐蛋麵。


最後奉上「塔門的日與夜」



塔門一個小島,但人情滿滿,地方唔大,但總算一個遠離煩囂的好地方,輕鬆漫步上山,到碼頭又有幾間食肆可以用餐,雖然無便利店,但閒來轉換一下飲返一支豆漿、凍柑蜜,已經好開心!


有用資料: 

1. 
塔門

交通:http://www.traway.com.hk/
留意船期,特別平日和假日會有不同



2019年12月17日 星期二

【香港本地親子遊】【柴灣】隱藏柴灣工廠區內的古蹟~「羅屋民俗館」


「羅屋民俗館」我最深刻印象係小學的時候參觀過,唔知點解呢個模糊印象我仲好記得,可能本身我細個係「新界牛」(住新界)的關係 XP,可以跟學校去到「香港島」仲要柴灣咁遠,覺得好難得。

每當我地一講起傳統村屋,第一時間都係諗起新界地方,但原來香港島都有呢類的中國傳統村屋,仲係我地香港嘅法定古蹟,就係位於柴灣的「羅屋民俗館」。村屋估計建於18世紀,因城市發展,現時為柴灣區目前碩果僅存的一座古村屋,原有的屋主姓羅,故名「羅屋」。

帶小朋友嚟到,可以俾佢地感受同分辨昔日和現代不同的住屋環境,亦可以讓佢地估一估、猜一猜舊時的家具、農具的用途,用下腦筋,幾好玩架!





屋主本身係客家人,所以村屋係客家風格。「羅屋民俗館」佔地不大,基本上可以參觀的地方就係大家眼前呢一間村屋啦~瞳祈爸爸我就對舊文化都有少少研究,正好可以介紹俾佢地知道了。


羅屋是典型的三間兩廊式客家民居,建築布局簡約對稱。羅屋的中央為正廳,正廳與大門之間設有天井,天井兩旁分別為建有閣樓的房間、廚房和雜物房。

屋中央的「正廳」,設有供奉祖先神位,亦係家族成員聚會的地方~

中間的桌椅有名堂,叫八仙枱,八仙枱故名思義,每邊坐兩個人,大約可以俾8個人坐,係昔日傳統家具。

另一邊廚房的灶頭陳設,我同瞳瞳講,以前「煮一餐飯」並唔客易,由劈木、斬柴、生火、打水.....,講緊未去到「煮」呢個階段,事前準備功夫已不少。現代家居生活就有自來水、煤氣,相比之下方便好多好多。






本來仲有卧室,不過參觀當日因為維修,暫停開放。

之後我地再出屋外參觀,出面的空地俗稱「禾坪」,是村民曬穀、晾衣及聚會的地方。而家四周都放置了昔日柴灣、柴灣發展、「羅屋」介紹、客家文化等介紹板。




「羅屋民俗館」地方不大,大約半小時就可以參觀完。一家大小來到香港島參觀傳統客家村屋,又或者住港島區的朋友唔駛去到新界都可以參觀村屋,都係一個幾特別的體驗。


有用資料

1. 羅屋民俗館


地址:香港柴灣吉勝街14號

開放時間:
星期一至三、五至日:1000至1800 
聖誕前夕及農曆新年除夕:1000至1700
休館日:逢星期四(公眾假期除外)、農曆年初一及年初

交通:港鐵柴灣站B出口