2019年1月25日 星期五

【香港本地】【美食】【西營盤】港島太平洋酒店:抵食!有意頭!「潮食海味」新春自助餐!(活動已完結)


瞳祈爸爸好鍾意去西營盤呢間<中.西環>餐廳食自助餐,貪佢有一個特色~就係「香港特色」,佢的自助餐當中經常加入不少香港特色或者懷舊味道,令人覺得好有感情!

多謝港島太平洋酒店邀請,今次農曆新年自助餐主題就係「潮食海味」,餐廳位於西營盤,所以今次係潮洲美食之外,仲會加入附近「海味街」的海味,最緊要係價錢一D都唔貴,始終一家大細去食自助餐,瞳祈爸爸我當然會精打細算啦!

先講下價錢啦,瞳祈爸爸我留意到,如果用網上預訂自助餐,有7折優惠,折扣後連服務費自助晚餐大人每位$342元就算係農曆新年期間,自助午餐最平$250.2起,自助晚餐最平$463.6起


網上預訂可享高達7折優惠




仲未決定團年飯或者開年飯去邊度食?不妨睇下我地推介啦!😁


我地1月23日去食自助晚餐,轉咗呢個「潮食海味」主題無幾耐,不過餐廳已經有哂靚靚新年佈置,再加上原有舊香港的裝潢,好有氣氛!



我地安頓好之後,就立即出去巡一圈睇下有咩好食啦!

甫坐下,侍應就端上每人一客「海鮮鮑魚一口酥」(寓意:財源廣進)」,鮑魚大大隻,精燉入味,下層以薯茸同酥皮作底,焗得層層分明,入口鬆化。


 話明「潮食海味」,餐廳set咗個打冷檔口,師傅源源不斷奉上滷水併盤:有鵝肉、鵝頭、鵝掌、大墨魚、大腸、紅腸、滷水蛋、豆腐等等....



潮洲食品又點少得潮洲粥?即叫即製潮式生滾粥,粥底又綿又滑,佢有4款口味:「方魚肉碎粥」、「蠔仔粥」、「海蝦粥」同「鹹菜豬肚粥」。我地叫咗「蠔仔粥」,粒粒蠔仔好肥美,意頭又好,祝大家「豐衣粥食」



當然仲有我最受的蠔餅,蠔仔多過蛋,每一口都唔會失望。


「慢燒蝦醬豬肋骨」,我好鍾意,蝦醬易入口,好有餘香!


仲有足料燉湯,源源不絕供應,瞳瞳竟然自己飲咗兩盅。😂


海產區都好豐富架~~~




刺身同壽司區



海味都可以整甜品?呢度的甜品好多都用上「海味」去入饌,材料有花旗蔘、燕窩、紅棗、花膠、蟲草花等等。。。。


「蟲草花紅棗糕(花開富貴)」:紅棗不但補血益氣,製作而成的紅棗糕更是晶瑩通透,清甜煙韌,配以有潤肺、補腎功效的蟲草花,滋潤養顏,仲有陣陣清香。


「烏龍煮香梨」,一個睇落簡單,但自已好少會做的一個甜品,好好味!


之後到懷舊甜品區,今次又睇下有咩搞作先~

平時大家都食過雞蛋仔,今日介紹得既梗係唔係一般的雞蛋仔啦!係「XO醬櫻花蝦雞蛋仔(金玉滿堂)」,XO醬 x 櫻花蝦,味道好特別,我地食下食下,味道又出奇地夾到,瞳瞳最後食哂成底雞蛋仔。





話明懷舊,呢度仲有龍鬚糖、麥芽糖餅同砵仔糕添呀!我同瞳祈媽媽一路食一路想當年😂



糖水同棉花糖



最後睇下雪糕啦,三百蚊左右的自助晚餐,仲要有Häagen-Dazs雪糕食,算係咁啦~


我地一家人各有各的精選呀!渡過咗一個好開心既晚上!

瞳瞳好鍾意呢度既PIZZA~

我的精選!




瞳祈媽媽精選



雖然唔算得上係好高檔,不過一家大細去食就自然要睇緊荷包啦!三四百蚊,仲要過年期間都唔貴,的確係中上環區自助餐性價比極高之選!



有用資料: 

1. 港島太平洋酒店,<中.西環>


地址:西環西營盤干諾道西151至153號
電話:21315908




2019年1月22日 星期二

【日本、大阪、堺】非一般大阪「堺市」六天親子遊~尋找小石頭做御守,千年歷史「住吉大社」


親子遊我都好少會講太多歷史,因為一對子女:瞳瞳(7歲)同祈祈(1歲)年紀仲細,唔會講得太深同太多。不過我就鍾意用講故仔形式同動手感受一下當地文化。。。。

今次我地去參觀的「住吉大社」,全國有2300間住吉神社,而位於大阪住吉區的「住吉大社」就係佢地的總本社。每年年初會約有200萬以上的人前來參拜,向神明祈求一整年的健康與繁榮。

前文所講,我地坐百年路面電車-「阪堺電車」去「住吉大社」。提提大家,如果去「住吉大社」,記得係「住吉鳥居前」站落車行既距離會比較近,適合一家大小,如果「住吉」站落車就會比較遠了。


「住吉鳥居前」站落車,對面就係「住吉大社」入口了


反橋

話明「住吉大社」,佔地同建築都好大,但感覺就非常寧靜,好舒服!

首先我地會見到反橋,佢係神社的地標象徵,當地人相信只要橫渡此橋,即能去邪、使心靈澄淨。每晚都會點燈,由日落後至晚上九點左右為止,所以晚上有燈火的橋又有另一番風味。





手水舍

在日本,無論大或小的神社,通常都會在社內設有「手水舍」的洗手池,當地人會先洗淨雙手(有時候會漱口),代表淨身,然後再入內參拜,以顯示對神明的尊敬~

我地都入鄉隨俗,一家四口都洗洗手,係咁熱的天氣之下,都係消暑的一個好方法!




豬小B感覺好新奇,佢以為有得玩水


我地又重溫一下日本神社參拜方法:

投入香油錢 > 鞠躬2次 > 拍手2下 > 鞠躬1次


石燈籠

為日本神社常見擺設,置於神社之內,呢度的巨大的石燈籠,以前係為了祈求「航海安全」讓船隻順利出海,平安回航而供奉。


我叫瞳瞳拍埋去影相,就可以對比出個SIZE係幾咁大!



進內,穿過幾間神社建築,沿指示找「五所御前」,果度就係我地拾石仔做御守的地方。




五所御前

大家唔駛四圍搵,全間神社得呢個地方有幸運石仔可以拾,「五所御前」被視為住吉大神降臨的聖地,據說只要收集到圍籬內的「五」、「大」及「力」3種小石頭,可以作為護身符(御守),願望就會實現。裝石頭的「御守袋」在剛剛經過的建築群旁邊有售,一個約300 yen~

瞳瞳伸手入圍籬搵,我地見都好多石仔有字,不過要搵齊「五」、「大」及「力」3種小石頭,就要靠小朋友的能力啦!瞳瞳都算好快搵到,我地都有買個靚靚御守袋,用來袋住3粒小石仔。






有用資料: 

1. 住吉大社
參拜時間:
4月〜9月 06:00〜17:00
10月〜3月 06:30〜17:00
(土產店09:00 〜17:00/無定休日)

電話:06-6672-0753

地址: 558-0045 大阪府大阪市住吉區住吉 2丁目9 - 89

交通: 
「阪堺電車」~「住吉鳥居前」站
「南海鐵道南海本線」~「住吉大社」站




1. 距離堺駅步行3分鐘,食肆商店全都有:Comfort Hotel Sakai

2. 堺駅食肆推介+PLATPLAT購物中心,超貼地感受生活

3. 海豚聚會+機動遊戲+動物園三合一:岬(Misaki)公園

4. 大阪百年歷史路面電車,體驗「阪堺電車」之旅

5. 尋找小石頭做御守,千年歷史「住吉大社」

6. 超級好玩!大阪府立大型兒童館BIG BANG!齊齊攀上53米高「遊具之塔」!

2019年1月9日 星期三

【香港本地親子遊】【西貢】地質小教室~香港聯合國教科文組織世界地質公園「西貢火山探知館」

「火山探知館」位於西貢市中心,剛剛在西貢巴士總站旁邊,一個不太顯眼的位置,遊人去得最多的可能係旁邊的公共洗手間,來也怱怱,去也怱怱。

「火山探知館」地方不大,面積真的像學校裡的一間小課室。地方雖小,但展品同教育意義卻不少。瞳祈爸爸最鍾意佢用深入淺出的方法,利用簡單的文字,小朋友透過可以觸摸的展品,去初步了解火山爆發、連串的火山活動同現時西貢六角形岩柱群形成的經過。

進入展館,首先會經過「火成岩長廊」,展出在世界各地搜集,由不同火山產生的岩石標本,可近距離觀察其特色。


似唔似一個菠蘿包呢?



原來香港都有「火山」架!小朋友又知唔知呢?我地嘅地理學家同專家們發現,西貢在一億四千萬年前,曾經發生極度猛烈的火山爆發,正是因為連串的火山活動,讓我們現時能在西貢一帶找到宏偉壯麗的六角形岩柱群。



大部份展品大家都可以親手觸摸,係過程當中可以加深了解比較抽象的科學原理。




「火山探知館」仲有不同種類的導賞服務,如果大家有興趣可以到以下連結:https://www.volcanodiscoverycentre.hk/index.php?option=com_content&view=article&id=5&Itemid=118&lang=zh


香港聯合國教科文組織世界地質公園「西貢火山探知館」位置圖



有用資料: 

1. 香港聯合國教科文組織世界地質公園「西貢火山探知館」

開放時間:
服務台:每天上午9時至下午5時
展覽區:每天上午9時30分至下午4時30分
農曆年初一及初二休館

查詢電話: 2394-1538

地址: 西貢海濱公園

交通: 
九巴92、96R(只限假日)、99號、299X及新巴792M
專線小巴1、1A、12及101M