2019年3月26日 星期二

【香港本地親子遊】【上水古洞】地方闊落:初探上水天光甫有機士多啤梨園



每逢摘士多啤梨季節,都會好多朋友都問瞳祈爸爸:「去邊度摘士多啤梨好?」「有無士多啤梨園介紹呀?」,於是我地今年走訪多一個士多啤梨園,佢就係位於北區上水古洞的上水天光甫有機士多啤梨園

大家可以在上水港鐵站 轉乘:(約10分鐘車程) 
1. 17號紅頂小巴(元朗<>上水) - 叫天光甫落車 
2. 50K 51K 50A-專線小巴天光甫落車 
3. 76K 九巴 (上水-元朗) - 「金錢村」巴士站落車 
4. 新界的士約$30元 天光甫 巴士站落車 
5. 如果係揸車的爸爸媽媽,由建議由上水迴旋處來,轉入青山公路去元朗/新田/落馬洲方向,之後留意右手邊就可以了。





上水天光甫有機士多啤梨園,門口有得泊車,田地都算大,呢度就比較專一,大部份的地方都係種士多啤梨,只有路邊少少地方係種下蔬菜~

同其他的士多啤梨園一樣,入場免費,摘下來既士多啤梨先計錢,以磅計。






家姐瞳瞳同豬小B祈祈即刻落田去搵好味的士多啤梨,不過今年收成有可能受到颱風「山竹」的影響,所以味道同數量都爭D,影響到收成,不過一個大自然的運作就係咁,唔會永遠豐收,所以食物得來不易~

呢個場我個人覺得好空曠,感覺好大,而且好舒服!仲可以見到對面深圳的樓添!




呢度仲有個小小的漁池,用$5買包魚糧,俾小朋友餵下魚,都已經好開心啦!小心照顧同行既小朋友啊!




摘落嚟的士多啤梨可以拎去沖一沖洗,睇下豬小B食得幾滋味!自已摘自已食,確係寧捨好味!



除咗士多啤梨,我地仲買咗有機油麥菜返屋企添!回程途中,瞳祈媽媽突然大叫,原來一條好肥美的菜蟲由油麥菜入面慢慢爬出嚟,哈哈,證明好新鮮啦!

我要停車將菜蟲帶走我地先可以繼續行程~

最後送俾大家我地整理既士多啤梨攻略特集:本港士多啤梨園介紹+摘取攻略心得


有用資料: 

1. 上水天光甫有機士多啤梨園

地址:新界上水青山公路古洞段DD92


交通:
大家可以在上水港鐵站 轉乘:(約10分鐘車程) 
1. 17號紅頂小巴(元朗<>上水) - 叫天光甫落車 
2. 50K 51K 50A-專線小巴天光甫落車 
3. 76K 九巴 (上水-元朗) - 金錢村巴士落車 
4. 新界的士約$30元 天光甫 巴士站落車 
5. 如果係揸車的爸爸媽媽,由建議由上水迴旋處來,轉入青山公路去元朗/新田/落馬洲方向,之後留意右手邊就可以了。

電話:9768 3760

Facebook:搜尋「上水天光甫有機士多啤梨園」


2019年3月13日 星期三

【香港本地】【美食】【牛池灣】藏身鬧市邊,時光倒流的「寶福餐廳」



牛池灣呢一間「寶福餐廳」,早幾年瞳祈爸爸我都有留意,不過一直只見其招牌而未見其真身,而呢間餐廳我一直放在心上,直到最近,不知甚的,突然好想搵返呢一間餐廳,可能我都怕小店敵不過時代變遷,於是立定決心要將佢搵出嚟!

一間位於九龍牛池灣村的小店,資料和報導又點會多?不過總算叫做搵到少少,可以同親身去過的我互相印證。

小店位於九龍牛池灣村,正正在龍翔道路邊,如果要講牛池灣村的歷史,可以有排講,不過我都簡單介紹少少啦:今時今日的牛池灣村仍然係一條鄉村組織,所以入村會見到「牛池灣鄉牌坊」、「牛池灣鄉公所」,入面的石屋、寮屋互相交錯。

好!我地出發搵「寶福餐廳」!

首先唔好入村,在村外面的龍翔道行人路走,見到有九巴88、91、92巴士站,再一直向斧山道游泳池方向行。


留意差唔多去到一個入村的車路路口,旁邊有個垃圾收集站,就會見到「寶福餐廳」的招牌啦!旁邊有條樓梯,一落去,左手邊就見到架啦!


集合少少手頭上搵到的資料,「寶福餐廳」在1964年開業,至今已經超過50年,足足半個世紀,所以入面仍然保留舊的風貌,綠白色的調色,感覺好懷舊。

其實佢屬於一間寮屋建築,亦係香港僅存的「寮屋食物牌」的食肆,據講餐廳地方原本屬於屋後一間叫「萬佛堂」的佛寺,因為當年萬佛堂賣屋,由店主買下,經營食肆,現時仍然保持家庭式經營。



唔單止「裝修」懷舊,就連食物價錢亦一樣咁「懷舊」!早餐、常餐只係$27,中午客飯連紅豆冰都只係$34,學生只收$28咋!(2019年3月)



當日我到訪,就點了一個「B餐」試試:牛油多士+腸仔煎蛋+榨菜餐肉公仔麵+凍奶茶


麵包用上多士,不用加錢,另外沒有要求下,驚喜地給我太陽蛋,太好了!


榨菜+餐肉配搭的確有心思,出面的茶記多數只有一款料~

我亦要記下一個小故事,之後我亦有嚟幾次,有一次叫的沙爹牛肉麵因為大賣,牛肉已經賣哂,老闆娘向我陪個不是,她實在太客氣,外面茶記經常欠食材,所以我亦已有後備的應變計劃,結果未待我開口,就話換牛扒俾我,變成沙爹牛扒麵,哈哈~我受寵若驚。



吃飽飽,見有時間就不如去找找同餐廳甚有淵源的「萬佛堂」,萬佛堂創辦於1915年,為先天道派,最著名是為1918年快活谷馬棚大火受難者超渡,現時以靜修為主,不宜打擾。



沿樓梯返回龍翔道地面,有重回城市的感覺,路前巴士站可去西貢、清水灣,或步行去牛池灣公園(水牛公園)坪石遊樂場(恐龍公園)。留意店舖營業時間,平日0630-1600,好早收架!






有用資料: 


1. 寶福餐廳

地址:龍池徑牛池灣西村115A地下(龍翔道入去會較容易)
交通方法:港鐵彩虹站C2出口及多線巴士線前往