元朗白泥，大家第一個印象總想到係「日落」、「黃昏」、「晚霞」同「泥灘」，但近年該處亦有不少營地出現，而且設備齊全，提供冷暖氣、洗手間、浴室、床舖等等。由從前細個要自己帶帳幕搭營的「挑戰營」到現今適合一家大細的「享受營」，今次我地就帶大家去兩日一夜白泥隱世野營部落Glamping Land～
出發當日天氣不好，狂風暴雨，所以相片質素爭一DD，還望大家見諒！
先講出發，如果乘搭公共交通工具，大家可以先到元朗（泰豐街），即係近肥韜元朗大榮華酒家附近，搭小巴33號，目的地係下白泥，過咗流浮山之後，上車可以同小巴司機講定一聲：「樂逍遙魚場會有落」，落車就會有指示牌前往「野營部落」。
如果好似我地咁揸車入去的話就更方便，睇睇我地教學，出發啦：
由天水圍經流浮山轉入稔灣路向白泥方向行，留意路窄兼單線雙程行車，大家互相禮讓～
「白泥」地方牌，香港呢種的地方牌已經非常少見，見到佢亦即係話我地已經進入白泥範圍～
留意右手邊的「樂逍遙魚場」
過咗樂逍遙魚場，過行車橋之前，留意右手邊有一個小路口，立即右轉到空地處，就可以泊車了～
無論你搭小巴定自已揸車，落車之後都要行一小段草地路，環境空曠，感覺近大自然，令我地好期待呀！
終於去到門口啦！駐場工作人員Ling姐好熱心，趕忙幫我地辦理入住手續，未及介紹，又落起暴雨來。。。。。。。
我地怱怱走入營先，呢度主要有三款營可以租用，分別係星空營，部落營及帆船營，我地今次入住係部落營
營入面提供牛角扇同流動冷氣機，我個人感覺都夠用，至少不會在營內流汗～
專誠訂製澳洲五星級床褥，真係好舒服！露營都可以咁豪華！
有毛巾、水、拖鞋、衣架等等提供，好似酒店一樣
好多爸爸媽媽關心的「洗手間」問題，我地揭盅啦！
洗手間係營後面位置，如果要去洗手間，先要出營，然後走到營後面位置就是。整個浴室及用廁空間都係獨立設計，有照明燈、抽風系統及無間斷冷熱水供應，仲提供埋個人沐浴用品（家長們又可以帶少幾樣野），夜晚去廁所都唔駛怕。
介紹下營舍先，野營部落Glamping Land分為部落營（2-4人）、星空營（2-4人）同帆船營（4-6人） 三款，主要視乎返你入住的人數。
今次住的部落營
外面擺放木檯的地方，就係BBQ位置，營友可以借用BBQ爐。
右手邊就係佢可供4-6人入住的帆船營
星空營（2-4人），營的側面係透明設計～
呢個大帳篷就係廚房啦，有長長的洗手盤區域，兩三家人一齊用都唔怕，仲提供冷藏櫃級數的雪櫃俾大家冷藏食物同飲品～
營地都有少少物品可以賣，以備不時之需（價錢為19年8月）
我地果日天氣真係麻麻，忽然天晴又忽然狂風大暴雨，不過我地見一停雨，把握機會，即刻衝出嚟玩！！yeah！！
門口處有張彈床，瞳瞳同祈祈兩個已經玩得好開心！！原來開心就係咁簡單！！
入到嚟可以同朋友自成一角BBQ或是打邊爐，訂營前請先同場地夾一夾，睇睇可以提供咩工具比大家，咁大家就唔駛帶咁多野。如果連煮都唔想煮，又可以搭返車返出流浮山行下海鮮街、天水圍大型商場或元朗食肆用餐都得，但要留意小巴尾班車時間，不然就要搭新界的士。
至於玩樂方面，如果天氣好的話，可以到隔離釣魚場、或者請教營地點樣行出泥灘玩。
是時候放低手機，享受大自然！
其他有關附近地點介紹，可參考：【香港本地】【元朗流浮山】行程買一送一：「陶氏休閒生態農莊」士多啤梨有機菜體驗+閃遊流浮山
有用資料:
1. 野營部落Glamping Land
地址：元朗流浮山上白泥村154號
電話（whatsapp）：98674232 客服辦公時間為上午10時至晚上7時
交通：元朗（泰豐街）搭小巴33號，目的地係下白泥，上車可以同司機講定一聲：「樂逍遙魚場有落」
