瞳遊樂 (八十後香港家庭的親子旅遊blog)

2017年2月15日星期三

【日本、東京、草津溫泉】2016東京+草津溫泉7日6夜聖誕卡通親子遊～「Day1 5之3：新宿站6分鐘、交通便利、早餐非常豐富：新宿燦路都廣場大飯店」

新宿燦路都廣場大飯店

香港人會去東京既幾個主要地方，如：東京、品川、渉谷、新宿、池袋、上野等等，所以瞳瞳爸爸揀酒店都以呢幾個地方為主，最後我地揀左「新宿」，因為新宿有巴士或者火車去草津溫泉，二來夜晚多野行，方便我地由朝玩到晚。

不過今次真係幾有難度，因為我地分開兩段時間入住，中間去草津溫泉，行李要放在酒店最少一晚。後來問了數間酒店，查詢空房之餘，又要問埋可唔可以寄存行李，兩者都要兼顧。

瞳瞳爸爸只好逐間逐間用利用電郵去問，衡量過之後，最後揀左「新宿燦路都廣場大飯店 Hotel Sunroute Plaza Shinjuku」。

酒店位置

新宿燦路都廣場大飯店位置極好，於「新宿駅南口」附近，出閘之後轉一個路口就到，步程大約6分鐘。酒店附近已經有三四間LAWSON或者FamilyMart便利店、行2分鐘就有麥當勞、附近有食肆、藥妝店，去YODOBASHI都只係8分鐘咋！而且酒店旁邊竟然有日本慢慢消失的「屋台」，呢個之後會詳細介紹。

當然，如果係想去歌舞伎町北口果邊，就可能比較遠啦～　不過瞳瞳爸爸覺得南口呢邊叫做「旺中帶靜」，人流就無歌舞伎町咁複雜。

由新宿駅南口行過去，只係6分鐘就到

酒店附近的地方圖。其實只要住得近車站，就不愁沒有地方行街。

新宿駅南口一出就轉右手邊

紅色長條型招牌果個路口行入去就係啦(留意到前面已經有一間藥妝店)

新宿燦路都廣場大飯店

酒店服務及職員

行入酒店大堂，空間感好大，去到Counter，效率都好快，接待的酒店職員都好有禮貌，會講流暢的英文，所以溝通完全沒有問題。大堂仲有一樣好特別既接待機械人，提供酒店的資訊，深得小朋友歡迎。因為我地到酒店果陣仲係上午時間，未可以check-in住 (15:00 Check in)，所以先將行李在酒店寄存，然後出去玩足一日先返黎拎行李。當我地返到酒店，職員告知行李已經放在房間內，唔駛自己搬，真好！

樓底好高的大堂

酒店機械人歡迎我地

聖誕樹提醒我地今日仲係聖誕節！（坐凌晨機好容易搞錯時間！哈！ XP）

酒店設施

酒店有一間bar<Kukon>同一間意大利菜餐廳<Villaza>，<Villaza>係我地每天用早餐既地方，早餐內容下面再講。在酒店不同樓層有間洗衣房，內有投幣的洗衣機及乾衣機，也有自助售賣機，有啤酒、汽水、茶類各式飲品，我見價錢都合理，大約130 yen一罐左右，旁邊亦有冰塊自取，如果夜晚湊住小朋友唔行得遠但又想買嘢飲，唔駛離開酒店都可以解決了。

酒店門口就係「利木津巴士」車站，特別係離開東京果日，當你有一抽二抽行李既時候就係最大幫手啦！之後到走果一日我地另文介紹。

利木津巴士就係酒店正門

時間表，不要搞錯機場啊！

房間設施

房間同平時的日本酒店一樣唔算好大，緊緊夠「攤開」個行李箱。其他如牙刷套組、浴巾、毛巾、洗髮精、護髮乳、香皂、洗澡海綿、梳、睡衣、拖鞋、刮鬍刀、冰箱、吹風筒等等都一概齊備，仲有free wifi提供；房間的冷暖氣舒適，唔會忽冷忽熱或者好焗既感覺；浴缸就啱比瞳瞳玩水浸下；整體房間都係好整潔、乾淨、舒服。

每日為我地清潔房間的房務員，都會留下一張卡片，印象深刻。

早餐非常豐富

我地的住宿套餐包埋有早餐，於是我地就憑早餐劵入去Villaza食早餐：門口先交早餐劵比職員，由佢地安排我地坐低，同時間會比張卡我地放係檯面，張卡的意思大約係話「呢張檯有人用緊」，咁一家人就可以放心出去拎野食，當用畢早餐，就要張卡交返去門口職員就可以啦！

早餐好豐富呀～有西式同日式兩種，西式有炒蛋、香腸、火腿、各式麵包、多士、生果、凍肉併盤等；日式有白飯、味噌湯、納豆、玉子、烤魚、各種醃漬物、海苔等；飲品都係咖啡、熱茶、牛奶同三至四款果汁。我地三個每日都好似當地日本人一樣食，弄一set日式早餐，朝朝早都食碗飯，「oishii」！

整體感覺：位置超級方便，四通八達，又有去機場的巴士站，酒店附近的便利店、麥當勞都有。整體房間都係好整潔、乾淨、舒服，個人用品又齊備，要知道東京市的酒店絕不便宜，所以呢間叫做服務、設施都俾足我地，非常好！

有用資料:

1. 新宿燦路都廣場大飯店　Hotel Sunroute Plaza Shinjuku

地址：2-3-1 Yoyogi, Shibuya-ku, 151-0053 Tokyo - Japan

電話：+81-3-3375-3211

傳真：+81-3-5365-4110

電郵：plaza-shinjuku@sunroute.jp

網頁：http://en.sunrouteplazashinjuku.jp/

延伸閱讀：

2016聖誕節東京+草津溫泉七日六夜卡通親子遊 (準備篇)

http://tungbama.blogspot.hk/2017/01/2016.html

2016東京+草津溫泉7日6夜聖誕卡通親子遊～「Day1 5之1：將更好的帶上雲霄：香港航空」

http://tungbama.blogspot.hk/2017/02/2016.html

2016東京+草津溫泉7日6夜聖誕卡通親子遊～「Day1 5之2：成田機場買「JR東京廣域周遊券」及乘坐成田N'EX到新宿」

http://tungbama.blogspot.hk/2017/02/201676day1-52jrnex.html

2016東京+草津溫泉7日6夜聖誕卡通親子遊～「Day1 5之3：新宿站6分鐘、交通便利、早餐非常豐富：新宿燦路都廣場大飯店」

http://tungbama.blogspot.hk/2017/02/201676day1-536.html

2016東京+草津溫泉7日6夜聖誕卡通親子遊～「Day1 5之4：新宿站先取未來兩天車票＞無添くら寿司@池袋＞歷史悠久的「上野動物園」」

http://tungbama.blogspot.hk/2017/02/201676day1-54.html

2016東京+草津溫泉7日6夜聖誕卡通親子遊～「Day1 5之5：暖暖聖誕牛角燒肉放題＞期間限定的溫馨浪漫燈飾＞日本剪髮初體驗」

http://tungbama.blogspot.hk/2017/02/201676day1-55.html

2016東京+草津溫泉7日6夜聖誕卡通親子遊～「Day2 3之1：出發去全日本排行第一溫泉～必食好味的火車弁當＞新宿到草津溫泉交通攻略」

http://tungbama.blogspot.hk/2017/03/201676day2-31.html

2016東京+草津溫泉7日6夜聖誕卡通親子遊～「Day2 3之2：全日本第一溫泉：「草津溫泉」+溫泉旅館大阪屋（一泊兩食）」

http://tungbama.blogspot.hk/2017/03/201676day2-32.html

2016東京+草津溫泉7日6夜聖誕卡通親子遊～「Day2 3之3：吾妻燒肉＞草津溫泉傳統文化體驗：揉湯＞漫步草津溫泉街、光泉寺、美食」

http://tungbama.blogspot.hk/2017/03/201676day2-33.html

2016東京+草津溫泉7日6夜聖誕卡通親子遊～「Day3 2之1 溫泉旅館＞JR巴士到長野原草津口駅＞高崎駅＞輕井澤王子OUTLET」

http://tungbama.blogspot.hk/2017/03/201676day3-21-jroutlet.html

2016東京+草津溫泉7日6夜聖誕卡通親子遊～「Day3 2之2 輕井澤駅巧遇火車迷慕名弁當＞新宿晚餐：日本麥當勞＞宵夜：日本特色～屋台拉麵」

http://tungbama.blogspot.hk/2017/03/201676day3-22.html

2016東京+草津溫泉7日6夜聖誕卡通親子遊～「Day4 2之1：人人期望可達到～藤子·F·不二雄博物館(多啦A夢全面睇)」

http://tungbama.blogspot.hk/2017/03/201676day4-21fa.html

2016東京+草津溫泉7日6夜聖誕卡通親子遊～「Day4 2之2：日本平價門票專賣店-「大黑屋」介紹、為Ahiru No Pekkle而來，玩盡Sanrio Puroland+多摩市100yen店超好買+遇上地震經歷」

http://tungbama.blogspot.hk/2017/04/201676day4-22ahiru-no-pekklesanrio.html

2016東京+草津溫泉7日6夜聖誕卡通親子遊～「Day5：東京迪士尼樂園」

http://tungbama.blogspot.hk/2017/04/201676day5-21.html

2016東京+草津溫泉7日6夜聖誕卡通親子遊～「Day6：新宿站周邊散策-Yodobashi、和幸豬扒、博多天神拉麵、磯丸水產」

http://tungbama.blogspot.hk/2017/05/201676day6-yodobashi.html

2016東京+草津溫泉7日6夜聖誕卡通親子遊～「Day7：利木津巴士到東京成田機場」

http://tungbama.blogspot.hk/2017/05/201676day7.html

2017年2月9日星期四

【日本、東京、草津溫泉】2016東京+草津溫泉7日6夜聖誕卡通親子遊～「Day1 5之2：成田機場買「JR東京廣域周遊券」及乘坐成田N'EX到新宿」

乘坐成田N'EX到新宿，車程大約1小時30分鐘～

經過大約3小時30分鐘的飛機航程，我地終於到左日本東京的成田國際機場，一如其他國家一樣，辦理入境手續，不過當日咁啱有其他飛機都同時間到達，所以好多人排隊入境，大約排30分鐘就過到關(其實在日本嚟講算快！)，之後我地就拎行李，準備搭火車出東京市區啦！

成田機場　去　東京市區，Skyliner定成田N'EX？

由成田機場出去東京市區，有好多方法嘅：巴士、火車任君選擇，火車再分好多種唔同類別你揀，有平、有貴、有快、有慢。多數遊客會比較「京成電鐵的Skyliner」同「JR的成田N'EX」兩種，視乎大家想去邊度地方，Skyliner係快，但只限去上野果面，如果要去池袋、新宿就要轉車，呢度親子遊就唔推介啦，因為日本車站通道暫時都係以樓梯為主，帶住一家大細＋行李，要上上落落都幾辛苦架！無謂頻撲！

所以瞳瞳爸爸寧願推介大家坐JR的「成田N'EX」，雖然車程長少少，大約1小時30分鐘，但基本上我地香港人會去東京既幾個主要地方，如：東京、品川、渉谷、新宿、池袋，一程車就可以去到，咁就「輕輕鬆鬆鄧梓峰」啦！加上我地今次行程住「新宿」，所以一定揀「成田N'EX」，仲有可以用到我地下面介紹的「JR東京廣域周遊券」。

無買Pass既朋友都唔駛怕，而家「成田N'EX」推出4000 yen來回票的優惠，可以留意一下。

我地今次行程住「新宿」，再加上有Pass可用，所以揀左紅線「成田N'EX」(圖片來自成田機場)

10000 yen、玩3日的「JR東京廣域周遊券」

出發之前，瞳瞳爸爸做哂功課，決定為今次行程買張pass。日本JR集團會根據唔同區域由不同公司營運，東京都大多數由「JR東日本」經營，我地決定買一張「JR東京廣域周遊券」，大人10000 yen/小童5000 yen，呢張pass適用於覆蓋東京及其週邊「關東地區」一帶的優惠套票。在3天裡不限次數乘坐區域內的新幹線、特快列車等普通車廂的指定座席。雖然只係有效期3天，但正正就覆蓋了我地去草津溫泉、輕井澤的地方，再加上連入市區果程既「成田N'EX」都用到，真係玩到盡：

「JR東京廣域周遊券」：大人10000 yen

我地行程計劃：
第一天(25/12) 成田N'EX＞機場：3190 yen
第二天(26/12) 新宿＞赤羽＞長野原草津口：5770 yen
第三天(27/12)
長野原草津口＞高崎＞輕井澤：4800 yen
輕井澤＞大宮＞新宿：5500 yen

基本已經一共19260 yen，仲未計我地在東京搭「山手線」、「中央線」等、有時我地仲會在轉車站出閘行街街、甚至因為新宿駅太大而用pass穿過車站、或者車站入閘行入面舖頭........

所以我地已經賺左張pass足足一倍咁多！

成田機場找櫃位買Pass

我地香港航空係停泊「成田機場二號候機樓」，所以拎左行李出去之後，轉左手邊，會見到「鐵道 Train」字樣，之後就搭扶手電梯落下一層，轉右，就係火車的售票大堂。

圖中紅色箭咀，認住「鐵道 Train」呢個牌，落去車站買火車票同搭火車。

如果你係0630 - 0815 或者 2000 - 2145抵達東京成田機場，就在右手邊的「JR售票處」買pass；如果你係0815-2000抵達東京成田機場，就在左手邊的「JR東日本旅行服務中心」買pass～
其實好簡單，同一個售票大堂，一左一右，各佔一邊。

服務時間為0815-2000「JR東日本旅行服務中心」，當日我地早於0815，所以要去對面買車票。

同上面互相cover既「JR售票處」，在0630 - 0815 或者 2000 - 2145期間，會有pass發售

好多人排隊，大家要有耐性呀～

我排緊隊既時候，呢兩位女士已經準備在日本第一站既shopping～

就係去左family mart買早餐啦，當中個蜜瓜包好好味，日本好多卡通人物都鍾意食～

排隊買pass，可以用信用卡比錢，同時間就請職員為你把成田N'EX　成田機場＞新宿　劃位(指定席)，然後「持pass+車票」入閘，之後睇顯示板到月台等車。月台上都有車卡顯示，記住唔好上錯車卡，因為日本火車運作：有時候會8卡火車一齊出發，去到某個中途站會分開，1-4卡去A目的地，5-8卡去B目的地咁樣架！

左手邊係我地既「JR東京廣域周遊券」(Pass)，右手邊係因為Pass而換到的成田N'EX車票～

沿路有好多顯示屏話比我地知開車時間

我地行去JR閘口了

Welcome to Japan

車票上面右下方寫明我地坐的車卡同坐位：car 9 seat 12A (即第九卡12A位)

支熱茶有保暖作用～

「成田N'EX」架火車外型好特別架，鍾意火車既小朋友一定好Like！如果座位安排近車頭的話，不妨可以走去車頭影相。但如果你地好似我咁係中間(第9卡)的車卡，咁就要把握機會，係埋站果一刻影相啦！

上到車，就要放好行李。在每一卡車的頭尾兩端，都有行李位俾大家擺放行李，而且仲有個密碼鎖加強保安，不過大家要留意，如果密碼鎖有問題，要去到總站先有車站的專門職員幫你「解圍」，亦即係話原本你要中途站落車，無得落車，要坐到總站先有人幫你解鎖件行李。

成田N'EX坐位2+2為主，我地跟返車票上安排的坐位去坐，唔好坐錯位，呢個係禮貌來的。之後的中途站其實都會陸續有人上車。車入面都有顯示牌話俾我地知道下一站同現時位置，所以唔駛怕落錯車，架車好快但亦都好穩定，約1小時30分鐘，我地就正正式式踏入市中心，抵達新宿駅。