瞳遊樂 (八十後香港家庭的親子旅遊blog): 9月 2023

2023年9月27日星期三

【親子10日9夜自駕之旅～日本東京、靜岡小丸子、富士山、渥美半島、鳥羽、大阪】靜岡車駅零距離靜岡ASSOCIA飯店 (3之2)

話說我地由香港搭凌晨機，於早上到達日本成田機場後，就搭上成田特快「N'EX」到品川，然後由品川搭東海道新幹線去到靜岡。

靜岡，一個唔係好多香港會旅行既地方，因為佢係大阪同東京之間，「兩頭唔到岸」，一來香港無航班到靜岡，附近最近的有香港飛機到既地方得東京、大阪同名古屋。不過雖然係咁，陪伴我地好多年的卡通片「櫻桃小丸子」正正就係呢個地方周邊既場景發生。

我地由品川搭東海道新幹線，大約５７分鐘就到去到靜岡，靜岡地理上係近東京，所以我哋都由東京過嚟。一落車，係月台上，就已經望到我地頭兩晚住既酒店：靜岡ASSOCIA飯店。去日本旅行，一個地方最旺的多數都係車駅附近（井之頭五郎話既），所以酒店正正就係車駅旁邊，揀佢一來主要係近車駅，車站一出就已經到達，二來附近都係地下街、百貨公司同超級市場。三來，酒店地下正正係Toyota rent a car 靜岡ASSOCIA飯店分店，我預計當第三天離開酒店時，可以Check-out後直接拎車，一家大小加行李可以唔駛行咁遠。

車駅月台已經望到靜岡ASSOCIA飯店

由靜岡車駅北口出，見到指示牌已經寫住Hotel Associa Shizuoka(靜岡ASSOCIA飯店)，跟住行就可以，而我地都順道留意下四周：車駅本身都係一個商場，有超級市場、食店、百貨公司、藥妝，嚟緊會留係靜岡呢間酒店3日2夜。

轉個彎就到酒店入口(圖左邊)

酒店大堂非常闊落，仲有一個兒童圖書閣，祈祈都有睇，雖然佢睇唔明日文，但睇圖畫都一樣領會到意思，好耐都無見佢咁乖靜靜地睇書。由於時間尚早，我地先將行李寄存係酒店，然後出去行下，大約兩點左右返嚟拎房。

我地Book咗Superior Twin Room，有30平方米，在日本酒店嚟講空間算大，仲有小梳化同檯，活動空間夠哂我地一家四口，雖然係車駅旁邊，但景觀上就唔係向車駅，反而係百貨公司一邊，最令我地一surprise係竟然隱約見到富士山！

房間都係正常一般日本商務酒店，乾淨、舒服、企理，設施有電視、帶加濕功能的淨離子群空氣淨化器、水壺、免治馬桶、雪櫃、Wi-Fi等等，都好齊備啦！

日景

夜景

咁多次日本旅行經驗，瞳祈媽媽最注重洗衣房，一來旅行可以唔駛帶太多衣服，二來可以洗衫替換。去咗咁多次旅行，靜岡ASSOCIA飯店洗衣房真係值得一讚！洗衣房位於地下大堂，有４部洗衣乾衣機可以用，用呢ｄ設施，最怕落到去先知全部FULL哂，佢原來可以上酒店網頁即時睇到係唔係「使用中」，而且仲可以睇埋Ｄ衫仲剩餘幾多時間。機內已設定好有埋洗衣液，唔使額外再買，最後，佢洗得好乾淨，連埋乾衣，拎出黎既衫係熱辣辣，可以即刻著。

酒店另一面就係靜岡駅，就係今日落車的地方，夜景一覽。

至於酒店早餐，亦都係大堂位置，正門旁邊，「PERGOLA」的餐廳，我地兩天都係呢度用早餐，早餐都係以自助形式，有西式、日式，我地當然入鄉隨俗，整個日本set比自已先。

亦有安排小朋友區，提供小朋友餐盤餐具，仲有得油顏色，照顧細心。

中華燒賣，我呢個「燒賣怪」口袋又食多樣，日本燒賣係豬肉餡，又係好好味，而且好實在！

樣樣都係我心水，腸仔併盤，「腸仔怪」既我又嚟！ＸＰ

餃子都有，又係我飛佛，佢呢度係「濱松餃子」，個特色係芽菜墊底。

祈祈ｓｅｔ

老婆ｓｅｔ，我地大人就當然砌個日式早餐啦！

我自己既ｓｅｔ，燒賣真係忍唔住又偷食一粒　=)

全酒店最大特色，就係呢個用當地特產整既「靜岡奄列」，同平時有咩唔同呢？就係材料捨棄平時的火腿、蘑菇、蔬菜，而係改用靜岡產的白飯魚同櫻花蝦，口感較淋同濕，幾得意下。

最後留一張由酒店窗外影向富士山的照片，大家望見嗎?=)

有用資料:

1. 靜岡ASSOCIA飯店

地址：〒420-0851静岡県静岡市葵区黒金町56番地（静岡駅徒歩1分）
電話：054-254-4141
網頁：https://www.associa.com/sth/

參考資料：

【親子10日9夜自駕之旅～日本東京、靜岡小丸子、富士山、渥美半島、鳥羽、大阪】準備及介紹篇

Day 1：香港國際機場＞東京成田機場＞成田特快「N'EX」+東海道新幹線品川去靜岡 (3之1)

Day 1：靜岡車駅零距離靜岡ASSOCIA飯店 (3之2)

Day 1：靜岡市內閒逛+魂心家拉麵 (3之3)

Day 2 : 靜岡鐵道「新靜岡到新清水」＞S-PULSE DREAM PLAZA櫻桃小丸子樂園 (3之1)

Day 2 :清水魚市場河岸の市 (3之2)

Day 2 :尋找櫻桃小丸子卡通真實場景 (3之3)

Day 3 :TOYOTA Rent a Car自駕租車，隨意自駕路邊UNIQLO+GU+無添壽司 (2之1)

Day 3 :富士河口湖水之里湖畔酒店一泊兩食 (2之2)

Day 4 :可以揸車入去睇動物：富士野生動物園Fuji Safari Park＋渥美半島遊 (2之1)

Day 4 :日本人渡假酒店體驗：伊良湖海濱渡假酒店(Irago Ocean Resort)一泊兩食(2之2)

Day 5 : 伊勢湾渡輪 (伊良湖去鳥羽) (3之1)

Day 5 :飼養種類約1200種，日本第一：鳥羽水族館＞麥當勞+鳥羽市內(3之2)

Day 5 : 新八屋溫泉旅館及晚餐 (3之3)

Day 6 : 相差海女小屋BBQ午餐體驗 (2之1)

Day 6 : 大阪天下茶屋小百合民宿(卡通片一樣的家)+商店街掃街 (2之2)

Day 7：三井LaLaport 堺 STUDIO ARC 影家庭照 (2之1)

Day 7：忍者堂忍者體驗 + 燒肉特急 (2之2)

Day 8 : Star Gate Hotel Kansai Airport (2之1)

Day 8 : Budget租車+Mega Donki+焼肉きんぐ+泉佐野漫遊 (2之2)

Day 9 : 大阪府立大型兒童館BigBang ，全天候室內遊樂設施 (2之1)

Day 9 : 浜寺公園，超好玩室外兒童遊樂場 (2之2)

Day 10 : 臨空城Outlet (1之1) ＞大阪關西機場 > 香港

2023年9月23日星期六

【親子10日9夜自駕之旅～日本東京、靜岡小丸子、富士山、渥美半島、鳥羽、大阪】香港國際機場＞東京成田機場＞成田特快「N'EX」+東海道新幹線品川去靜岡 (3之1)

自從疫情之後，好耐無同屋企人入嚟機場，由於工作關係，瞳祈爸爸都有係疫情最嚴重既時候，入過機場禁區，真係水靜鵝飛，人都無個，真係幾冷清。

今次終於同屋企人入嚟機場啦，用旅客既身份，亦都不忘介紹下機場「景點」，而家機場都開返好多野，亦都多咗好多小朋友遊玩設施：

離港層的左手邊，近11號登機門，就有一個全新的攀爬設施。兩個小朋友真係未出發，先興奮，仲話返黎要再玩，不過返黎果時已經係抵港層，唔係離港層，所以要把握出發先得玩！

如果有時間，在12同24登機門之間，就有全新地標「天際走廊」正式，用來連接一號客運大樓及T1衛星客運廊，上面有可以俯瞰飛機係腳底經過，仲有觀景台同「三跑」介紹，因為我地坐既係凌晨機，天色昏暗，所以無影太多! (記得預好鬆時間先好過去，都幾遠下)

T1衛星客運廊的兒童區

差唔多上機啦，我地今次搭國泰航空CX524出發到東京成田機場。

飛機食個簡單包食、打下機睇下電影，好快就到日本，當時已經係早上，而且天都光哂。

今次去日本入境手續同疫情前有分別，就係日本政府推出咗Visit Japan Web (網址:https://vjw-lp.digital.go.jp/zh-hant/)，將入境的所以資料輸入去，咁係飛機上面、出入境時都唔再需要向空中服務員拎出入境卡填。最大好處係如果同行布小朋友或長者，亦都可以預先將家人資料文係自己個戶口，一齊過關。我就係一個人戶口入哂４個人，４個人一齊行埋去一次過關。

網上好多教學，搵幾個容易明白既介紹比大家：

1. 香港01

2. 樂吃購！日本

日本入境過程都算快，亦可能因為我地係凌晨機，人算少，但排隊仍然要。拎埋行李，我地就要出發去靜岡啦。首先我地到JR Counter 買車票，基本上由成田機場出發去靜岡，就係要坐火車出去到東京，問題係東京、上野、新宿、品川邊度轉車，因為都要夾時間。

而我的煩惱，就交哂比JR Counter職員解決，我只要講出我要去既目的地，佢地會好專業咁幫我夾時間、轉車站安排，同埋劃位，令次職員就推薦先坐成田特快「N'EX」到品川，之後同站再轉東海道新幹線去靜岡，轉車次數最少、車與車之間侯車時間最短，最重要坐位都已經幫我地安排好了。

成田特快「N'EX」由成田機場開去品川，車程大約1小時，按車票座位坐好就是，相信好多香港家庭都坐過。

一小時車程正好補眠

來到品川站啦！因為我地朝早日本關係，正餐仲未食，趁轉車仲有大約半小時既時間，即刻去著名火車弁當「駅弁屋」揀弁當。本來想幫祈祈揀有火車造型的弁當，好可惜呢間品川分店無呀，有少少失望。最後我地都各自各揀左心水弁當！！

買好弁當，又要趕去新幹線月台搭新幹線列車Ｎ７００，沿路指示清晰，今次係搭「HIKARI507」班次，佢由品川＞新橫濱＞熱海＞靜岡，只停三個站就到靜岡，車程大約５７分鐘，列車埋站好快，到站已經影唔切，我地快快手上車，又係睇車票坐好，祈祈當然好興奮啦，第一次搭新幹線列車，３＋２座位，雖然無窗口位坐，但都好開心啦！之後就準備開餐，體驗新幹線列車上食弁當。