瞳遊樂 (八十後香港家庭的親子旅遊blog): 2月 2017

2017年2月23日星期四

【日本、東京、草津溫泉】2016東京+草津溫泉7日6夜聖誕卡通親子遊～「Day1 5之5：暖暖聖誕牛角燒肉放題＞期間限定的溫馨浪漫燈飾＞日本剪髮初體驗」

大家評下理，我似邊一個？

返到新宿燦路都廣場大飯店，酒店已經安排我們寄存的行李預先放在房間，輕鬆不少。休息過後，就商量下食咩晚餐，今晚係聖誕節呢～　Merry Christmas！

天氣凍凍地，一致決定食熱暖的食物，燒肉放題啱哂啦！我地由酒店行去附近，一個大家統稱叫「新宿駅西口」的地方。呢邊商店比較多，集中有藥妝店、各種不同類型的食肆，就連日本著名的電器、玩具、電子產品、文儀用品的百貨公司 ~ Yodobashi，係呢個區域分成10幢不同大樓，售賣不同種類的貨品。

暖暖聖誕「牛角」燒肉放題

由酒店行過去唔駛十分鐘

聖誕節，我地起初以為好多人食，好擔心已經無哂位。不過唔知好事定壞事，東京的聖誕氣氛始終無咁熾熱，我地見到「牛角」有燒肉放題，就拿拿聲入去坐低了。我地揀左中間價格的「牛角」4500 yen，提供100款食物+50款飲品，食物有唔同的類別：有肉有海鮮可以燒，又有飯、拉麵、湯，甚至連甜品等等都有得叫！佢用既爐係炭爐，唔係電爐，好有風味，又要眼明手快，小心「炭屎」痴係食物上面。味道唔錯架，可能自己心態問題，覺得日本食物質素都好有保證，而且佢可以選擇的款又多，連海鮮類的蝦、元貝、蜆都有，唔錯！

在日本食野，最擔心就係同店家溝通唔到，但係「牛角」呢度你可以完全放心，佢用iPad落單，而且有中文語言選擇，想柯打咩食物，只需要輸入號碼同數量就可以了，自助落單好方便，大家就唔駛怕唔好意思成日要搵店員幫手嘛！

iPad落單，很好呀！自已搞掂就可以！

海鮮亦新鮮，出面唔係間間燒肉店都有海鮮叫的～

炭爐，滋滋滋。。。。。

左上角個爆谷雪糕好好味！

期間限定的溫馨浪漫燈飾（新宿駅）

日本的聖誕節，氣氛無香港咁濃厚，可能係兩地文化差別，各有各不同。在新宿，我地見到既聖誕裝飾都唔多，偶爾商場、百貨公司櫥窗等才會見到有聖誕裝飾。不過最靚永遠留係最後：就係晚上街道上的燈飾。每年當地政府都會在11月至1月之間，在人流較多的街道，佈置好靚的燈飾，今次我地在新宿駅「新南口」的平台就遇上了。

去到現場睇仲靚，有一種浪漫、溫馨的感覺，好適合情侶在燈飾下浪漫一番。瞳瞳爸爸我梗係唔執輸，趁機會同我今世情人(瞳瞳媽媽)+上世情人(瞳瞳)漫步一下啦！

日本剪髮初體驗

我地呢一家出去玩，真係咩都夠膽試，話說我地行過新宿街頭，我見到專幫人剪頭髮的Qb House著綠燈(意思營業中，不用等候)，跟住瞳瞳媽媽話不如試下，結果一家三口係度剪頭髮。新宿呢間分店地方好大，地面加地庫一共兩層，每人收1080 yen 連税(比香港稍貴)，一入去就有4-5位職員招呼我地，有的幫我們買飛、有的幫我地掛起外套，招呼一流。我個髮型師似PPAP大叔，留有PPAP一樣的鬚，佢每做一個步驟交代好清楚，就連用電剃刀都問我有無問題，PPAP問我點剪，我話「Japan Style」，佢又明咁喎！嘩！心諗我呢舖仲唔發達！唔知一陣會變木村拓哉定香取慎吾呢？好，一於合埋雙眼抖下，既期待驚喜，又可以令PPAP壓力無咁大。一開眼，嘩！頂丫！真係似上電視喎！仲將我中學年代頭髮條界好細心咁搵返、梳返出嚟！PPAP仲笑笑口用英文同我講：「Japan Daddy Style！」嗚～～～上就係上電視，不過成個小丸子老豆或者大雄老豆咁款囉！

講真，佢地好nice，服務一流！可能知道我地係遊客，所以剪得比較穏陣，總算係一個唔錯體驗～嗚～

日本本地既Qb house地方好大呀～

大家評下理，我似邊一個？

有用資料:

1. 焼肉なら「牛角」（新宿西口店）

電話：03-5909-3829

地址：東京都新宿区西新宿1-15-8 アトラス西新宿ビル3Ｆ・4Ｆ・5Ｆ

營業時間：（請按此）

網頁：http://www.gyukaku.ne.jp/

2. 東京霓彩燈飾

可留意東京的觀光官方網頁

網頁：http://www.gotokyo.org/tc/tourists/attractions/fourseasons/illumination.html

3. Qb house（新宿南口店）

地址：東京都渋谷区代々木2-10-10東京プラザビル1F&B1F

電話：03-3828-5171
營業時間：（請按此）

網頁：http://www.qbhouse.co.jp/

延伸閱讀：

2016聖誕節東京+草津溫泉七日六夜卡通親子遊 (準備篇)

http://tungbama.blogspot.hk/2017/01/2016.html

2016東京+草津溫泉7日6夜聖誕卡通親子遊～「Day1 5之1：將更好的帶上雲霄：香港航空」

http://tungbama.blogspot.hk/2017/02/2016.html

2016東京+草津溫泉7日6夜聖誕卡通親子遊～「Day1 5之2：成田機場買「JR東京廣域周遊券」及乘坐成田N'EX到新宿」

http://tungbama.blogspot.hk/2017/02/201676day1-52jrnex.html

2016東京+草津溫泉7日6夜聖誕卡通親子遊～「Day1 5之3：新宿站6分鐘、交通便利、早餐非常豐富：新宿燦路都廣場大飯店」

http://tungbama.blogspot.hk/2017/02/201676day1-536.html

2016東京+草津溫泉7日6夜聖誕卡通親子遊～「Day1 5之4：新宿站先取未來兩天車票＞無添くら寿司@池袋＞歷史悠久的「上野動物園」」

http://tungbama.blogspot.hk/2017/02/201676day1-54.html

2016東京+草津溫泉7日6夜聖誕卡通親子遊～「Day1 5之5：暖暖聖誕牛角燒肉放題＞期間限定的溫馨浪漫燈飾＞日本剪髮初體驗」

http://tungbama.blogspot.hk/2017/02/201676day1-55.html

2016東京+草津溫泉7日6夜聖誕卡通親子遊～「Day2 3之1：出發去全日本排行第一溫泉～必食好味的火車弁當＞新宿到草津溫泉交通攻略」

http://tungbama.blogspot.hk/2017/03/201676day2-31.html

2016東京+草津溫泉7日6夜聖誕卡通親子遊～「Day2 3之2：全日本第一溫泉：「草津溫泉」+溫泉旅館大阪屋（一泊兩食）」

http://tungbama.blogspot.hk/2017/03/201676day2-32.html

2016東京+草津溫泉7日6夜聖誕卡通親子遊～「Day2 3之3：吾妻燒肉＞草津溫泉傳統文化體驗：揉湯＞漫步草津溫泉街、光泉寺、美食」

http://tungbama.blogspot.hk/2017/03/201676day2-33.html

2016東京+草津溫泉7日6夜聖誕卡通親子遊～「Day3 2之1 溫泉旅館＞JR巴士到長野原草津口駅＞高崎駅＞輕井澤王子OUTLET」

http://tungbama.blogspot.hk/2017/03/201676day3-21-jroutlet.html

2016東京+草津溫泉7日6夜聖誕卡通親子遊～「Day3 2之2 輕井澤駅巧遇火車迷慕名弁當＞新宿晚餐：日本麥當勞＞宵夜：日本特色～屋台拉麵」

http://tungbama.blogspot.hk/2017/03/201676day3-22.html

2016東京+草津溫泉7日6夜聖誕卡通親子遊～「Day4 2之1：人人期望可達到～藤子·F·不二雄博物館(多啦A夢全面睇)」

http://tungbama.blogspot.hk/2017/03/201676day4-21fa.html

2016東京+草津溫泉7日6夜聖誕卡通親子遊～「Day4 2之2：日本平價門票專賣店-「大黑屋」介紹、為Ahiru No Pekkle而來，玩盡Sanrio Puroland+多摩市100yen店超好買+遇上地震經歷」

http://tungbama.blogspot.hk/2017/04/201676day4-22ahiru-no-pekklesanrio.html

2016東京+草津溫泉7日6夜聖誕卡通親子遊～「Day5：東京迪士尼樂園」

http://tungbama.blogspot.hk/2017/04/201676day5-21.html

2016東京+草津溫泉7日6夜聖誕卡通親子遊～「Day6：新宿站周邊散策-Yodobashi、和幸豬扒、博多天神拉麵、磯丸水產」

http://tungbama.blogspot.hk/2017/05/201676day6-yodobashi.html

2016東京+草津溫泉7日6夜聖誕卡通親子遊～「Day7：利木津巴士到東京成田機場」

http://tungbama.blogspot.hk/2017/05/201676day7.html

2017年2月22日星期三

【日本、東京、草津溫泉】2016 7日6夜聖誕卡通親子遊～「Day1 5之4：新宿站先取未來兩天車票＞無添くら寿司@池袋＞歷史悠久的「上野動物園」」

細個果陣，好鍾意買玩具車仔玩，特別係巴士，當中又以日本製造的雙層巴士最為喜愛，車頭地點牌寫著「上野」，呢個算係我認識「東京」以外的第二個日本地方名，所以「上野」一直埋在我心底深深處，哈，好想知道係咩地方嚟嘅。

親子遊，當然以小朋友角度為先啦！以前我地去過大阪的市立動物園，感覺唔錯，於是瞳瞳爸爸都想安排一個動物園行程，讓瞳瞳可以同動物互動一下，腦海一閃記得有「上野動物園」呢個地方，即刻放入行程！

講返今日行程，我地啱啱落機，去到酒店Check in寄存好行李，才1045，凌晨機就係有呢半日「賺」既好處，我地一家在日本行程正式出發啦！首先要醫下個肚，之前我地去大阪果陣強力推薦－「無添壽司」，念念不忘，嚟到東京又要搵下佢！「無添壽司」係日本連鎖店，所以全日本都有分店，今次去的是「池袋」分店。

=======================================================

新宿站JR東日本旅行服務中心，先取未來兩天車票

上車之前，我仲有個任務要做，就係要到新宿駅「*新南口」的「新宿站JR東日本旅行服務中心」，預先拎未來兩天要用的車票，可以有兩個方法去做：

第一，如果你成日都去日本玩，又經常坐JR周圍去，咁就可以上到JR東日本網站(http://www.jreast.co.jp/index.html/)，免費登記開戶口，用信用卡在出發前幾日就可以網上劃位，但要留意，該系統用全日文，無其他語言選擇，所以使用時要非常小心。

第二，就係同之前成田機場一樣，請職員即場幫你劃位，最好你預先準備好日子、時間、方向寫好俾佢，咁佢可以一次過幫你拎哂D飛。

我地之前係成田機場已經買左「JR東京廣域周遊券」，咁就拎住呢張Pass，在服務中心入面排隊，之後向職員提出你要換邊幾套車票就可以了，我地當日係25號，26、27號既車票我地都可以拎定好了。職員識講英文，所以溝通絕無問題。朋友告知，人多既時候，每人只可以換一套車票，如果換幾套就要排多幾次隊，不過我今次就一次過換哂四套，沒有問題，當然，大家去到再執生啦！

四套車票如下：

1. 26/12 「10:10 赤羽」草津1号－＞「長野原草津口」
2. 27/12 「10:37 長野原草津口」－＞「高崎」
3. 27/12 「13:02 高崎淺間 609あさま長野」－＞「輕井澤」
4. 27/12 輕井澤－＞新宿

新宿站JR東日本旅行服務中心

四套車票

*留意新宿駅的「南口」同「新南口」係兩個地方，中間只係隔左一條馬路，唔好搵錯，可以向車站職員問路。
=======================================================

無添くら寿司@池袋

親子遊，我明白家長們開支都好大，介紹間又經濟又好味既壽司店比大家先。因為有Pass關係，我地在東京市內搭所有「通勤」的JR線都唔駛再俾錢，「通勤」就好似平時香港坐既港鐵一樣模式，普通卡車、唔駛劃位就是。由新宿駅搭「JR崎京線」的快速列車，5分鐘就到達池袋駅。（放心，搭車的顯示牌有方向提示：池袋、上野行）

今次無添くら寿司在東京的「池袋分店」，位於地庫層，我地大約1130左右到，已經要輪侯等位，好受歡迎。佢大部份壽司都係100 yen一碟(連稅就 108 yen)，基本上香港元氣壽司食到既佢都有，當然更加鮮味啦！而且呢間分店都係用「運輸帶」送出柯打，就等於元氣高速線分店一樣。雖然只係普通迴轉壽司連鎖店，但質素好有保證！

當然，都要講返呢度既特色，就係每食夠5碟壽司，把碟放入收碟口，就會隨機電腦出現小遊戲，你唔駛控制，純粹random，如果中左獎，會由上面的扭蛋機跌出一隻扭蛋玩具出嚟，名乎其實「有得食、有得玩」，家長們仲可以吸引小朋友食多幾碟添！

無添くら寿司

三文魚好肥美，雖然佢係普通迴轉壽司連鎖店，但質素好有保證！

燉蛋都一絲不苟，起碼見到蟹腳 XP

除了壽司，呢度仲有定食／熟食叫，呢個係鰻魚定食

蟹膏壽司，果陣海水鮮味好難忘

每食夠5碟壽司，把碟放入收碟口

電腦game開始轉動

中了扭蛋! yeah!

=======================================================

歷史悠久的「上野動物園」

離開池袋，繼續向「上野」出發。行返去JR池袋駅，搭山手線 (上野／東京方面) 到上野駅。基本上，上野駅附近最大的景點就係「上野動物園」，所以一出月台搵出口指示牌，好快就會搵到「公園改札」，呢個出口代表去上野動物園。

跟「公園改札」就可以到達上野動物園入口

由車站行去上野動物園，都要10分鐘左右，在門口先來個合照，之後就買入場劵入場，入場劵係由自動售票機發售，大人600 yen，0至12歲小童係免費，所以我地買兩張大人門票就夠了。提提大家，動物園開放時間為上午9:30至下午17:00（售票至下午16:00），逢星期一休息。

當日去都好多人

就係用呢部機買入場券，好易用架！

整個「上野動物園」可以分為東園同西園，我的計劃就東園入、西園出。入場果陣記得拎返份動物園地圖，咁就唔會蕩失路！動物園在1882年開幕，至今已經有130多年歷史，所以在東京大有名氣，就我地所見，都好多當地家庭、情侶入場參觀，所以都好多人。

動物園入面有小食亭、飲水機、洗手間，都算幾易搵到，指示清晰。約有450隻動物大家可以參觀，由大象、猩猩、熊貓、老虎、北極熊、羊、牛、各種禽鳥、部份海洋生物等等。我地去的當日係聖誕節，連介紹動物的工作人員都打扮成聖誕老人，非常投入。入面有個地方瞳瞳爸爸覺得幾特別，就係可以隔住玻璃見到園內獸醫診所，見到獸醫為動物進行檢查，係一個幾特別的體驗。我地走馬看花，都行左兩個多小時。

上野動物園一覽

日本動物園小食亭經常有雪糕供應，唔食唔得～好好味～

當日係聖誕節，連介紹動物的工作人員都打扮成聖誕老人。

有模型介紹鳥蛋的結構

可以隔住玻璃見到園內獸醫診所，見到獸醫為動物進行檢查，係一個幾特別的體驗

我地由西園區門口出，中間經過一個湖叫「不忍池」。湖上面有好多遊人划船，湖邊就綠樹成蔭，閒來行下日本的公園，一片悠閒寧靜，令人覺得好舒服。大約行20分鐘，就可以去到JR御徒町駅，之後坐返JR去新宿。提提大家，在JR御徒町駅車站旁邊，正正有座大樓，入面有GU同Uniqlo，兩間都係大分店，各佔幾層面積，真係有排你行～