瞳遊樂 (八十後香港家庭的親子旅遊blog): 11月 2023

2023年11月22日星期三

【親子10日9夜自駕之旅～日本東京、靜岡小丸子、富士山、渥美半島、鳥羽、大阪】Day 4 :可以揸車入去睇動物：富士野生動物園Fuji Safari Park＋渥美半島遊 (2之1)

一直以來，都好想揸車入去動物園同小朋友睇動物，終於遇上了：「富士野生動物園（Fuji Safari）」

我地暑假去，所以天氣好熱好熱，我地由Lakeland Hotel Mizunosato十點正check out離開之後，就用大約1小時車程去到動物園…

富士野生動物園（Fuji Safari）的介紹:「在富士山山腳下廣闊的大自然中，悠閒地生息著70種約900隻動物。野生動物區的動物們在接近自然的原生態環境下放養，互動區的動物們可以讓人更近地觀察、還可以給一部分動物餵食。」

先講門票收費：

門票（含消費稅）

成人（高中生以上）3,200日元

兒童（4歲～初中生）2,000日元

老年人折扣（65歲以上）2,500日元

我地揸車入去的話，只要俾一次錢，就可以自由遊覽，即係話，如果你對野生動物好有興趣的話，你係可以入完再入、入完再入咁…

如果唔揸車的朋友，就可以搭園區的特色叢林巴士，1500 yen/位。園區入面仲有互動區，可以餵下動物、摸下佢地咁，都係一個幾特別既體驗。不過我地一家，都係想揸車入去動物園同小朋友睇動物，呢個先係我地既主菜，要試下一D香港玩唔到既野。出發～

動物園入口都搵左一輪，Google Ｍap有少少失誤，後來唯有用傳統方法，就係目測「指示牌」，最後順利搵到！

汽車通道入口，就好似我地香港以前過行車隧道的收費亭咁，停車俾入場費

同時間，職員會有個提示俾你睇，開於一陣間入到園區的注意事項，最重要係唔可以開窗同唔可以落車。

其實只要跟足佢既提示，係十分安全，入面分為熊區、獅子區、老虎區、獵豹區、大象區、草食動物區（長頸鹿、白犀牛等）及山岳草食動物區(麋鹿、北美野牛、蠻羊等)，每一個區都有兩層鐵絲網分隔，避免不同區域的動物走埋一齊，而動物附近亦有工作人員坐吉普車戒備。

之前所講，如果唔揸車的朋友，就可以搭呢一種園區的特色叢林巴士，1500 yen/位

其實炎炎夏日，坐係涼浸浸私家車入面睇動物，又真係好舒服。大家亦都好守規矩同秩序，一架車跟住一架車，唔會打尖。

我地參觀果陣仲要正值中午時間，太陽好曬，動物們都好叻咁搵地方遮蔭，我發覺如果跟住叢林巴士，可以見到動物向巴士遊人討食物，幾有趣。今次自駕參觀車程大約45分鐘，行下停下，影下相咁。

我地行完一轉，出返停車場，去埋洗手間，問兩姐弟要唔要行下或者走多一轉？佢地都話夠啦～今次最重要完成左個主菜，已經好開心。夏天又唔想係動物園露天咁行，於是決定上車走啦，之後我地要揸３小時車程，到抵渥美半島（愛知縣田原市伊良湖）的酒店，都係一個香港人、甚至係遊客少去既地方。

之後行程就由右上方一路衝去左下角啦！

離開富士野生動物園，找個地方食Lunch，日本高速公路上的休息站係不二之選，與其話休息站，不如話係一個小型商場，入面設施齊備，有除左基本洗手間外，仲有不同的食店、便利店、當地名物土產店等等。公路上休息站分兩種「SA」同「PA」，以「SA」而言係規模較大，「PA」則細一點。

今次我地去咗「NEOPASA 靜岡」休息站，一個小小商場，仲有Food Court添

連休息站都變shopping點

簡單又好味，我地分別係3間不同的店家買，試多Ｄ！

最後食杯雪糕完滿！

人飽飽之後，就到私家車要入油，通常休息站旁邊都有加油站。之後我地就直去渥美半島，沿路風光都好靚呀！

渥美半島是日本屈指可數的蜜瓜產地，每年６月至９月當造，當地好多農場，而且可以任摘任食，不過同瞳祈媽媽商量過，蜜瓜放題無咩著數，都係買一個蜜瓜返去食，開心下就可以了！

於是在路邊，我地隨意走入一間農店買蜜瓜

狹長的渥美半島兩邊都係海岸線，我地就在一個壯麗的沙灘影下相先，之後就入住伊良湖海濱渡假酒店(Irago Ocean Resort)，酒店正正係半島末端的一個山坡上。

沙灘上有人釣魚

有用資料:

1. 富士野生動物園Fuji Safari Park

地址：〒410-1231 静岡県裾野市須山字藤原2255-27
電郵：webmaster@fujisafari.co.jp
網頁：https://www.fujisafari.co.jp/

營業時間（全年無休日）

3月11日～10月31日 9:00～16:30

11月1日～3月10日 10:00～15:30

參考資料：

【親子10日9夜自駕之旅～日本東京、靜岡小丸子、富士山、渥美半島、鳥羽、大阪】準備及介紹篇

Day 1：香港國際機場＞東京成田機場＞成田特快「N'EX」+東海道新幹線品川去靜岡 (3之1)

Day 1：靜岡車駅零距離靜岡ASSOCIA飯店 (3之2)

Day 1：靜岡市內閒逛+魂心家拉麵 (3之3)

Day 2 : 靜岡鐵道「新靜岡到新清水」＞S-PULSE DREAM PLAZA櫻桃小丸子樂園 (3之1)

Day 2 :清水魚市場河岸の市 (3之2)

Day 2 :尋找櫻桃小丸子卡通真實場景 (3之3)

Day 3 :TOYOTA Rent a Car自駕租車，隨意自駕路邊UNIQLO+GU+無添壽司 (2之1)

Day 3 :富士河口湖水之里湖畔酒店一泊兩食 (2之2)

Day 4 :可以揸車入去睇動物：富士野生動物園Fuji Safari Park＋渥美半島遊 (2之1)

Day 4 :日本人渡假酒店體驗：伊良湖海濱渡假酒店(Irago Ocean Resort)一泊兩食(2之2)

Day 5 : 伊勢湾渡輪 (伊良湖去鳥羽) (3之1)

Day 5 :飼養種類約1200種，日本第一：鳥羽水族館＞麥當勞+鳥羽市內(3之2)

Day 5 : 新八屋溫泉旅館及晚餐 (3之3)

Day 6 : 相差海女小屋BBQ午餐體驗 (2之1)

Day 6 : 大阪天下茶屋小百合民宿(卡通片一樣的家)+商店街掃街 (2之2)

Day 7：三井LaLaport 堺 STUDIO ARC 影家庭照 (2之1)

Day 7：忍者堂忍者體驗 + 燒肉特急 (2之2)

Day 8 : Star Gate Hotel Kansai Airport (2之1)

Day 8 : Budget租車+Mega Donki+焼肉きんぐ+泉佐野漫遊 (2之2)

Day 9 : 大阪府立大型兒童館BigBang ，全天候室內遊樂設施 (2之1)

Day 9 : 浜寺公園，超好玩室外兒童遊樂場 (2之2)

Day 10 : 臨空城Outlet (1之1) ＞大阪關西機場 > 香港

2023年11月21日星期二

【親子10日9夜自駕之旅～日本東京、靜岡小丸子、富士山、渥美半島、鳥羽、大阪】Day 3 :富士河口湖水之里湖畔酒店一泊兩食 (2之2)

人生第一次去日本名山 —「富士山」

日本好多地方會見到富士山，亦因為祈祈話想睇富士山，而富士山就係靜岡附近，所以行程就特別安排去富士山啦！

富士山有好多種玩法，有人會由東京出發，即日來回；又有人真真正正登上富士山，屬於行山朋友的一個挑戰；但相信更多人同我地一樣，在富士山下，搵一間溫泉旅館，一泊兩食，就當去過架啦！

富士山下有幾個大湖，當中又以「河口湖」最出名、最多遊客去，因為果度係被認為睇富士山最靚既地方。不過亦因為咁，果度既溫泉旅館，價格都貴，而且稍為好Ｄ既質素，而又望到富士山既話，都會Full booking。

最後我揀左「水之里湖畔酒店Lakeland Hotel Mizunosato」

酒店位於河口湖同富士山之間，未必做唔到「河口湖在富士山前面」既景觀，所以價錢就相對無咁貴(其實都貴XP)，不過就有私人風呂同埋對住富士山，值得一試！

由無添壽司富士宮店出發去「水之里湖畔酒店Lakeland Hotel Mizunosato」，我專登揸車行富士山西面去河口湖，車程大約一小時，由城市進入郊區，樹多、牧場多、空氣又好。

Hello富士山！好Lucky，天氣好好，就見到啦！

以前的經驗話我知，去日本溫泉酒店千其唔好太晏，太晏會錯過好多野，連溫泉都浸少幾次，唔太抵，今次要放鬆，好好享受！

我地一到酒店大門前，就即刻有酒店職員出來迎接，為我地打點停車位，其實泊車地方正正就係酒店正門前面，酒店外觀感覺好有規模。

入面真係大，呢度係大堂，日本人一向都好有禮貌，好快手就完成Check in啦！

同一時間，瞳祈媽媽就負責幫兩個小朋友揀浴衣，款式都算幾多，揀好就可以拎上房。

我地住的係「庭付き露天風呂付客室」

一推門，房間超大，呢度就係我地既起居室，夜晚就會放上床舖，祈祈最開心，可以跑呀跑呀跑！

窗外風景，好靚，四周都係平房同農田

檯上已經放好小食同茶具，我地當然自已來一個泡茶，好好享受一下富士山茶。

附上的小點心，好好味，係豆沙餡的夾餅，最後忍唔住，臨走前去手信店買左幾盒，成為我地帶返香港既手信

就係經過呢個「庭園」到達私人風呂（都係房間入面範圍）

私人風呂，有木造的浴池，仲有沖身的地方，好方便，附近都係平房，所以私隱度都高。

風呂向住富士山，一路浸一路望住富士山，正！

之後我地就去酒店餐廳晚餐，酒店安排咗我地坐係角落位，兩面都係落地大玻璃，可以廣闊無遮無擋咁睇風景，而對出就係河口湖啦！晚餐非常豐富，佢地會為小朋友準備兒童餐，非常貼心～

通往餐廳

餐廳都幾大，晚餐同第二朝早餐都安排係度食

落地大玻璃，出面就係河口湖啦！

美食＋美景

飲杯！

甜品

真係由有太陽食到無太陽XP

當返到房果陣，酒店已經為我地舖好床舖啦！

除左自已房的私人風呂，酒店的大浴場都可以用，每天男、女浴場會互換一次，所以留宿兩天的話，就可以試哂兩邊。介紹下先，一個係室內浴場，但可以係入面睇到富士山，另一個有室內+室外+屋頂浴桶，夜晚同祈祈上去睇星星，好有feel，我仲巧遇到流星添！(即刻許願)

溫泉名稱：河口湖溫泉

品質：鈣、硫酸鈉、氯化物泉（低滲透壓鹼性溫泉）

（老泉品質名稱：含鹽石膏泉）

功效：神經痛、肌肉痛、關節痛、肩周炎、運動麻痺、關節僵硬、跌打損傷、扭傷、慢性消化系統疾病、痔瘡、寒顫、病後恢復期、疲勞恢復、保健、動脈硬化、割傷、燒傷、慢性病皮膚病、兒童體質弱、慢性婦科病

夜晚的富士山，有光的地方係登山道和山中小屋，登山人士日出登頂的話，就會係山中小屋過夜同休息。

第二朝，富士山日出，當時正值夏天，大約四點幾好早就天光，瞳祈媽媽即刻把握機會影相。

食早餐啦！朝早早餐日式、西式都有，同樣豐富、同樣好食，兩個小朋友好有胃口！欣賞住靚景享受，一流！

小朋友的餐都好豐富喎！

十點鐘，我地就要退房啦！臨退房前收到酒店房內電話，原來問我地要唔要趕搭佢地既穿梭巴士，咁我回覆我地有自己車啦，咁酒店就放心叫巴士開車，由此可見佢地既細心。

我負責辦理退房手續，老婆同兩個小朋友就行下旁邊的手信店，有好多關於富士山的手信紀念品，我地係度都有好多收獲呀！

酒店對正就係河口湖，點可以唔去行下呢？

好多人都話去河口湖，今次我地真真正正走到湖邊，呢度有個湖邊公園，有個大草坪，無咩人，空氣超清新！