【香港本地親子遊】【九龍塘】]隱藏在九龍塘的「中醫藥博物館」

香港浸會大學的中醫藥科都好出名，所以係佢中醫藥學院大樓地下，就有一間中醫藥博物館。不過因為在大學入面，所以比較少人去，其實佢係對外向公眾開放的，我地果日去就「包場」喇！

香港浸會大學「孔憲紹博士伉儷中醫藥博物館」除左介紹中華民族傳統中醫藥學之外，仲有介紹埋中醫藥在香港的發展歷史。

中藥店入面經常見到既「百子櫃」，可以親身接觸

原來中醫藥都經常出現係我地生活入面，呢度介紹左有關中醫藥的經典名言和成語典故，瞳瞳都可以當故事咁聽。仲有小朋友互動電腦遊戲玩，一D都唔會悶!!

原來中藥都包含好多方面，例如針灸、仲有「外科手術」既工具，真係大開眼界!

針灸工具

外科手術用既工具

古人好有智慧，例如針灸咁，無理由用真人比你試，萬一拮錯左咪弊!?於是係北宋年間，由一位醫官王惟一設計鑄造，名為「天聖銅人」，體表共刻657穴，穴位深約1.2 cm，教學或考試時，體表用蠟封閉，內灌注水，「針入水出」，這是古代較為精密的醫學模型。傳至明正統年間，明英宗令醫官仿宋重鑄，而冠名為「明代正統仿宋針灸銅人」。

「明代正統仿宋針灸銅人」複製品

行完地下的「中醫藥博物館」，就可以轉戰去二樓既「中藥標本中心」，有一比一的中藥標本，例如鹿、熊等等，仲有分辨真假中藥、相似但功能完全不同的中藥、含有劇毒的中藥、香港郊外常見中草藥等等。還有鎮館之寶：「人參壽星公」！

「人參壽星公」由2374支不同人參所砌成

近看壽星公

行完「中醫藥博物館」，在浸大入面有canteen(美心or 大家樂)可以補給，之後仲可以去旁邊既九龍仔公園(步行5分鐘)或者樂富廣場(步行15分鐘或巴士103)行下。

有用資料：


網頁：
http://cmmuseum.hkbu.edu.hk/intro.html　(孔憲紹博士伉儷中醫藥博物館)
http://cmmuseum.hkbu.edu.hk/bucmm/　(香港浸會大學中國銀行（香港）中藥標本中心)

開放時間：
星期一至六〈星期日及公眾假期休息〉
上午十時至下午五時
免費入場

位置：
九龍塘浸會大學道七號
賽馬會中醫藥學院大樓地下

交通：九巴208線(往廣播道方向)或103(往竹園方向)，「香港浸會大學」下車

自駕泊車：浸會大學道錶位