瞳遊樂 (八十後香港家庭的親子旅遊blog): 【香港本地親子遊】【山頂】警隊博物館+甘道兒童遊樂場 & 灣仔峽道公園三地遊

2016年3月14日星期一

【香港本地親子遊】【山頂】警隊博物館+甘道兒童遊樂場 & 灣仔峽道公園三地遊

以前瞳瞳爸爸讀旅遊，實習加工作都上過好多次太平山頂，偏偏在半山腰的「警隊博物館」就最容易錯過。今次，連我自己都係第一次上嚟！

首先，搭公共交通工具的家庭朋友，可以搭新巴１５號（沿途會經過中環碼頭、交易廣場、港鐵金鐘站都可以上車），到達中途站「灣仔峽道」落車，落車向車尾方向行，沿指示行１５分鐘就到。

至於好似瞳瞳一家咁自駕遊揸車去玩，在警隊博物館「對落」有停車場，提供大約１５個車位，假期常常爆滿，有幾個係旅遊巴停車位，所以大家唔好搞錯。

警隊博物館「對落」的停車場

可以拍照留念

「對落」。。。。我好強調架！唔去過都唔知道，原來警隊博物館在山上面！我地抵達停車場之後，仲要繼續行大約６０幾級樓梯上去！大家慢慢行，行下停下，中間又睇下Ｄ文物，例如呢個六七十年代的交通指揮亭，影下相，不知不覺就到達博物館啦！

未有紅綠燈之前，就係靠警察在個指揮亭入面指揮交通啦！

由以前係度當值的警察自已造的模型

講返下呢間博物館既歷史，其實博物館前身係叫「灣仔峽警署」，建於１９３９年，係一間好典型的英式殖民警署建築，白色牆身藍色窗。昔日英國人好識去監控本地市民，基本上殖民地時期建立的警署，都一定係山上面，一來方便監視，二來易守難攻。好似以前屏山警署、沙田警署、大埔警署都係一樣位置。

博物館要分為四個展覽廳：歷史展覽廳、三合會及毒品展覽廳、警隊今昔展覽廳以及專題展覽廳（本期題目：警署歷史），博物館展品數目約６００餘件，咁多野！點睇得哂？

（請諒：警察博物館內嚴禁拍照）

（相片來自http://www.police.gov.hk/ppp_tc/01_about_us/pm.html）

唔怕，瞳瞳爸爸教你入面有幾樣必睇既，就算精華遊，都唔會執輸：

１　上水之虎標本－於１９１５年被新界區指揮官在龍躍頭擊斃的虎頭標本

２　三合會祭壇、禮袍及武器

３　爆炸品處理組拆彈專家制服及拆彈機器人

（相片來自http://www.police.gov.hk/ppp_tc/01_about_us/pm.html）

４　１９９０年由水警總區截獲的越南船民柳條船，好似一頂大的帽子，原來可以坐人

５　舊式海洛因製毒工場──於1980年代搗破海洛因製毒工場復原，包括毒品原材料、器皿、爐具及包裝工具

１８９６年至今已有１２０年歷史的野戰炮

大約參觀４５分鐘到１小時左右，入面有洗手間，瞳瞳爸爸就覺得會比較適合６歲以上小朋友，因為文字部份都比較多，小學開始識字就啱啦！

離開警隊博物館，行返落去頭先既停車場，其實停車場旁邊就「甘道兒童遊樂場」，再過對面馬路，就係「灣仔峽道公園」。

甘道兒童遊樂場＆灣仔峽道公園

因為兩個公園太接近（只相隔一條馬路），令好多人都以為係一個公園，所以大家都會兩邊走兩邊玩。

兩個公園都係提供攀爬、滑梯、韆鞦之類，不過唔知係咪位處山頂，富貴人家多，感覺上小朋友都好有禮貌，而且設施保養都好好，就當日所見，沒有設施因損毀而停用。地方都保持得好乾淨，公園旁邊有一列的長檯，好適合野餐。

洗手間同小食亭都設在灣仔峽道公園，小食亭有燒賣、魚蛋、公仔麵等供應，而且價錢非常合理（燒賣、魚蛋＄６／六粒），稍作醫肚亦不錯。