【香港本地親子遊】【大埔大埔滘】新手上路，漫步大埔滘自然保護區

其實我一直都好想同瞳瞳行山，過下行山癮，於是就搵個地方走走。小朋友都係細個，就揀條簡簡單單、屋企附近的山徑行下。行山其實都係其次，最想係佢可以親親大自然，如果可以，我盡量都會俾佢試下摸下，等佢知道下係咩手感~

今次目的地係「大埔滘自然護理區」，我地由屋企出發，如果自駕揸車可以沿大埔公路到松仔園，門口有少量車位。如果係搭公共交通工具，有72/72A/73A/74A，於「松仔園」站落車就到。

門口有管理員把守，郊野公園地區竟然要有人把守？就算其他郊野公園的路都不會「隆重地」找人看住！原因後面再談，先保持神秘.............跟瞳瞳上山先～

沒有分叉路，只要沿車路一路上行就無錯啦！
大埔滘自然保護區都有紅葉影架....不過就唔多，只有幾棵，夾啱時間不妨可以影，大約每年11尾到1月左右，呢度的紅葉無人影，唔駛迫，慢慢來。一路行一路行..........空氣勁清新...

撿起地上的紅葉觀察

我地大埔滘既品種係三瓣的

瞳瞳幫媽媽影相

大埔滘自然保護區亦都係一個觀賞螢火蟲的好地方，沿路都有告示牌提醒睇螢火蟲的人要遵守守則，不過想睇螢火蟲就要等到每年的夏天先有了。

可以接觸大自然，大家都要小心，唔好傷害動植物，如果唔確定係咪安全，就千其唔好掂啦！

沿路瞳瞳都問我地好多問題：

「點解有水既？」

「棵樹好大」

「樹枝好（桔）手」

大埔滘自然保護區仲主要的四色徑，當中以黃徑最長，而且可以接到對外的路去城門水塘、火炭、梧桐寨.....不過我地今次唔行四色徑，而去左野外研習園。

想挑戰長程的朋友，可以選擇黃徑行一圈

今次我地跟野外研習園的路牌

其實由我地起步到園區，指示牌只係寫15分鐘，但我地漫行左半個小時。大埔滘野外研習園其實都係教大家認識園內植物，入面的介紹牌我覺得算係幾得意，唔會悶或者太學術性，正好適合爸媽解釋比小朋友知道。地方唔大，就咁行一個圈只需大約半個小時，中途有個涼亭比我地大休，最特別係我地可以近距離觀察小鳥新居，雖然我地見唔到有雀鳥，不過有羽毛，應該有「住客」，我地唔打擾了。

到達大埔滘野外研習園, 又黎個合照

入園地圖

一草一石都好奇

中途有個涼亭比我地大休

由池塘望回我地頭先休息的亭

有趣、易明的介紹牌

小鳥新居

之後我地返回原路出返大埔公路就可以了，我覺得好適合新手爸媽帶小朋友初次行山的體驗，路程唔長、又多大自然的事物可以觀賞、交通亦算便利。

開估先：之前咪話有「管理員」在入口處把守既。看看途中路牌，「滘鉛段」，滘指大埔滘、鉛指鉛礦坳。如果你把地圖打開，其實有一條農林護理通道(行車的)，可以由荃灣的城門水塘，一直「駕車」到大埔滘出來，不過當然只限漁護署車輛，亦因為怕有人駕車進入危險，唔想無掩雞籠，所以大埔呢一邊有人把守，至於荃灣一邊就有欄杆擋住。

有用資料: 

1. 大埔滘自然保護區

交通：

可於沙田或大埔乘搭以下路線前往，於「松仔園」下車

７２　　長沙灣　＜＞　大埔太和邨

７２Ａ　大圍鐵路站　＜＞　大埔工業村

７３Ａ　沙田愉翠苑　＜＞　粉嶺華明邨

７４Ａ　啟業　＜＞　大埔太和邨