瞳遊樂 (八十後香港家庭的親子旅遊blog): 【日本、大阪、堺】非一般大阪「堺市」六天親子遊～超級好玩！大阪府立大型兒童館BIG BANG！齊齊攀上53米高「遊具之塔」！

2019年4月16日星期二

【日本、大阪、堺】非一般大阪「堺市」六天親子遊～超級好玩！大阪府立大型兒童館BIG BANG！齊齊攀上53米高「遊具之塔」！

位於大阪堺市「泉ヶ丘車站」旁邊的「大阪府立大型兒童館BIG BANG」，瞳瞳一家非常推介，首先佢係一個室內的遊樂園，唔會受到天氣影響，冬暖夏涼；另外如果係好動、鍾意攀爬的小朋友，就絕對啱哂啦！佢有一個高53米、穿越4層樓高的「遊具之塔」，當中有17個不同的機關要經過，香港絕對玩唔到的一個大型攀爬遊戲，絕對不可錯過！

＊＊　南海電鐵有做一個pass：「BIG BANG+南海電鐵來回車票」，大人收費1620 yen，足足大約平75%架！網頁如下：http://www.nankai.co.jp/traffic/otoku/bigbang.html

如果大家好似我地係大阪堺市出發：南海電鐵「堺」＞「天下茶屋」＞同站轉泉北高速鐵道線到「泉ヶ丘」下車

如果由大阪難波、梅田、心齋橋等等香港家庭常住的地方，可以先搭大阪地下鐵御堂筋線到「中百舌鳥」＞同站轉泉北高速鐵道線到「泉ヶ丘」下車

我地出發啦！

「泉ヶ丘」我覺得係住宅區的地方，附近無咩遊客，多數以居民為主，車站連結商場，感覺非常街坊，就似我地沙田中心、好運中心果類型咁，賣下日常生活雜貨、街坊食肆、平價服裝店咁，總之就好地道啦～所以我地都行得好舒服呀！

因為車站附近的景點得「大阪府立大型兒童館BIG BANG」，所以佢都有好清楚指示牌話俾大家知點行過去。

首先出車站右轉，就見到天花「大阪府立大型兒童館BIG BANG」呢種既指示牌～

然後會見到右手邊有條樓梯上二樓

上到二樓繼續沿指示行大約5分鐘

見到UFO飛碟咁既建築物，就係我地今日既目的地：「大阪府立大型兒童館BIG BANG」啦！

BIG BANG即場門票，收費如下：

大人 1,000日圆

中學生 800日圆

小學生 800日圆

幼兒(超過3歲) 600日圆

3歲未滿的幼兒免費

全幢BIG BANG一共有四層：1/F、2/F、3/F、4/F，另外附加一個高53米的「遊具之塔」。

我地一入去就係1/F～呢度有醫療室、餐廳"supesudaina"，大約有70個座位，提供簡食、飲品，另外分佈館內亦有不同的自助售賣機同飲水機，非常方便。

仲有個兒童劇場，不過只有表演時才會租用，呢層功能性的比較多，玩的唔多。可以直接搭升降機到最頂4樓，由上而下玩落嚟。

升降機入面有唔同樓層介紹，雖然日文比較多，不過唔駛怕，繼續睇我地＜瞳遊樂＞介紹～哈哈～

出到4/F，完全唔同感受，我地去咗舊時代日本，皆因呢度重建了昭和30年代的街景，打卡熱點～

仲可以重現當年小店環境，我就同瞳瞳姐姐玩燒章魚小丸子：小丸子造型超似，仲有竹籤、紙兜同道具錢，一絲不苛。

現場有不少情景，非常適合影相

仲有不少昔日舊遊戲、小玩意等供遊人懷緬，雖然我地唔係日本人，不過有好多遊戲同我地都好相似，或者曾經大家會係卡通片上見過（例如玩陀螺、紙足球）

之後有個地方叫「機關馬戲團」，有各式各樣觸感奇怪的玩具、有機關的玩具，甚至成為玩具角的一部份！年紀較細的小朋友都啱玩！

瞳瞳變成洋娃娃呀～好搞笑！

呢個咪沙律醬BB？祈祈都話要同佢握握手～

急不及待，要介紹一下「遊具之塔」！！！！因為佢係4樓出入口，就要介紹一下，由地上25m(4F)～53m(8F)分成8層，中間設置垂直不同的17種室內遊戲機關，可以話係一個巨型的攀登架。

我地去當日遊人唔多，唔駛排隊就玩到啦！到自己果陣，工作人員會幫你戴上頭盔，同時知道我地係遊客，比咗一張中文漢字的卡我地睇，內容大概係講風險同萬一體力不繼，可以在中途退出，行樓梯或升降機離開。