其實香港本地酒店周不時都會推出「入住計劃」，仲係比我地香港家庭參加，呢類入住計劃一般都會包括：一晚酒店住宿＋自助午餐或晚餐（或者兩樣都有包）＋免費享用酒店設施
今次我地手頭上有幾間酒店心水，但最後決定選擇左 － 位於黃竹坑的「如心南灣海景酒店」 。「如心南灣海景酒店」 吸引我的地方，因為位於港島南區黃竹坑，網上見佢景觀都幾靚，離家遠一點，會更有渡假feel！而且酒店更加係香港首個地質公園主題酒店，一於睇下有幾特別先。
係酒店公關姐姐安排下，瞳瞳一家順利入住酒店，今次等＜瞳遊樂＞同大家一齊去玩下啦！STEP BY STEP的如心南灣海景酒店 住、玩、食攻略！我地分開5部份介紹：交通篇、房間篇、設施篇、餐飲篇 及 地質公園主題介紹。
交通篇
黃竹坑大家覺得好似好陌生、好遠，但一講「海洋公園」大家都知道了，無錯呀！酒店就係「海洋公園」附近，我地由酒店房間已經可以見到海洋公園同登山吊車，而隨著港鐵南港島綫通車，酒店同「黃竹坑站」 (B出口)只有步行5分鐘距離，南港島綫就可以伸延去到海洋公園、金鐘、鴨脷洲等地方去玩。
如果係搭巴士，大部份經香港仔隧道去南區的巴士路線，可以係「業興街」呢個站落車，對面就係啦！上車的時候可以問一問巴士車長！
 |
| ５分鐘的步行距離 |
房間篇
我地當日就自駕去酒店，由新界出發，一穿過香港仔隧道不久，就到達「如心南灣海景酒店」，因為酒店停車場出入口係塘邊徑，事前要做好功夫，用GPS或地圖搵定路。一去到，酒店職員的哥哥們就替我地泊好車，我地輕輕鬆鬆拎行李落車，再由佢地引領我地到酒店大堂，服務很貼心呢！
 |
| 如心南灣海景酒店 |
大堂位於5樓，空間好大好寛敞，透光度十足。
大堂另一邊有休閒區比旅客休息、交流，因為地方大、樓底高，多多人都唔怕呀！旁邊有咖啡機提供熱飲、各類雜誌、仲有電腦免費提供比大家使用。
 |
| 咖啡機＆雜誌 |
大堂雖然好吸引，但我地要上去房間啦！酒店前台員工好勤快地為我地辦理好入住手續，最開心係酒店方面 upgrade 我地一家住「AQUA SUITE」的套房，「AQUA SUITE」位於酒店最高層37樓，我地好期待呀！！
 |
| 房卡卡套已經好細心標示酒店設施 |
一開門，「嘩」左一聲！房間超大，有個客廳，大電視都有兩部，一部係廳一部係床頭；落地大玻璃的外面有一個小露台，可以眺望深水灣、海洋公園同鴨脷洲、香港仔避風塘的景色；至於浴室就大得更加誇張，以為只會在泰國出現的浴室呢度都有，分開的淋浴間及浴缸，足夠瞳瞳玩水玩個夠；其他細節的有Salvatore Ferragamo名牌洗手間沐浴用品、設有量度身高體重指數（BMI）的電子浴室磅、免費使用沖茶設備及Nespresso咖啡機、雪櫃、風筒等，通通都齊哂！
電視兩部、連洗手盤都有兩個，一家大細就唔駛爭嚟用！而且有樣野好抵讚，酒店好貼心，知道我地三個人，由支裝水到沐浴用品，都給我們三份，like！
 |
| 兩部大電視 |
 |
| 大床夠做一字馬 |
 |
| 洗手盤都有兩個，啱哂一家人，唔駛爭！ |
 |
| Salvatore Ferragamo名牌洗手間沐浴用品 |
 |
| 下面冰箱，上面就連微波爐都有 |
 |
| 免費使用沖茶設備及Nespresso咖啡機 |
 |
| 奉上果盤 |
 |
| 落地大玻璃同露台 |
 |
| 一面向深水灣、海洋公園 |
 |
| 海洋公園南朗山上的logo同吊車 |
 |
| 另一邊就鴨脷洲、香港仔避風塘景色 |
夏天嚟酒店，最緊要就係個酒店泳池，酒店泳池比公眾泳池使用人數相對少得多，所以帶年紀較細的小朋友去酒店泳池，我會放心一點。
酒店泳池位於酒店6樓，要先經過健身室進入，响呢度可以向健身室借毛巾（藍色的），順帶提一提，健身器械就唔太啱小朋友，但大朋友就不妨玩下，因為我見到有教練／職員睇場，你可以放心咁玩。
講返泳池，真係好啱小朋友嚟，再細個再baby的小朋友都可以，因為佢係一個三合一泳池，呈長方形，分為成人池(最深處約1.6米)與小童池(0.3米)，中間以一個噴泉池分隔開。無錯呀，小童池只係0.3米，小小baby都可以玩啦！當然記得一定一定要有大人陪同先可以用游泳池呀！
餐飲篇
是晚自助晚餐安排係3樓的「LIS Café」，主題係蠔，所以今日好多食物都會包含蠔的成份，每位先送椒鹽焗蠔或葡汁焗蠔，出面有牛扒、豬扒、雞扒、香腸等即叫即煎、紐西蘭生蠔亦任食、中菜、沙律、日本壽司、刺身、凍盤、海鮮如長腳蟹、蝦、螺、青口等，飲品咖啡茶果汁都齊備。
至於早餐，係同一間餐廳享用，有中式點心、乳酪、牛奶、炒麵、多士、炒蛋、火腿等等，都叫多款式可以揀。
「如心南灣海景酒店」香港聯合國教科文組織世界地質公園結為伙伴，成為本港首個的「香港地質公園酒店」。其實我地一行入酒店，就會感受到不一樣的氣氛，酒店各處都掛有香港地質公園的相片同裝飾；大堂有「地質公園資訊站」，用電腦就可以輕鬆瀏覽到地質公園資訊，旁邊仲有小冊子免費索取；亦有一個飾櫃，有化石展覽同紀念品可以賣；就連我地係酒店房的TV入面，有一條介紹地質公園的頻道。
酒店有推出地質公園導賞團比大家參加，亦有住宿套餐，一個價錢包導賞團及來回酒店的交通，大家不妨留意酒店網頁。=)
 |
| 地質遊覽團介紹 |
 |
| 地質公園資訊站 |
 |
| 小冊子免費索取 |
如心南灣海景酒店 － ＜瞳遊樂＞絕對推薦
"$1,088 食、玩、住" 熱賣優惠! @ 如心南灣海景酒店
(2017年4月1日至9月30日)
星級熱賣優惠反應熱烈，如心南灣海景酒店與眾同樂，特別加推激安住宿連餐飲優惠，讓賓客隨時出走休閒南區，在簡約、時尚的客房內放鬆心神及於酒店餐廳歎盡環球海鮮美饌! 優惠淨價港幣$1,088!
加上港鐵南港島線現已開通，賓客乘搭港鐵從金鐘站至黃竹坑站只需8分鐘車程，非常方便快捷，現在想玩就玩! 心動不如行動!
- 星期一至日: 淨價港幣$1,088
優惠包括:
- 單人或雙人入住高級都市客房一晚
- 於LIS Café享用二人自助晚餐
- 免費享用Wi-Fi無線上網及有線寬頻上網服務
- 免費享用酒店健身中心 (視乎酒店情況而定)
- 訂房部
(852)3968 8838 l rsvns.lis@lhotelgroup.com
有用資料:
1. 如心南灣海景酒店
地址：香港香港仔黃竹坑道55號
熱線：(852) 3968 8888
傳真：(852) 3968 8899
電郵：info.lis@lhotelgroup.com
2. 香港地質公園
電郵：geopark@afcd.gov.hk
