瞳遊樂 (八十後香港家庭的親子旅遊blog): 【香港本地酒店】【南區黃竹坑】香港首個地質公園主題酒店

2017年8月28日星期一

【香港本地酒店】【南區黃竹坑】香港首個地質公園主題酒店 - 如心南灣海景酒店

今年暑假，瞳瞳媽媽懷有我們新成員小B，所以就沒有離開香港出外遠遊，當然我都要照顧一下瞳瞳吧～整個暑假因為忙於小B及屋企裝修事宜，又怕瞳瞳好悶，於是一償瞳瞳心願，在香港住酒店玩過兩日一夜啦！

其實香港本地酒店周不時都會推出「入住計劃」，仲係比我地香港家庭參加，呢類入住計劃一般都會包括：一晚酒店住宿＋自助午餐或晚餐（或者兩樣都有包）＋免費享用酒店設施

今次我地手頭上有幾間酒店心水，但最後決定選擇左　－　位於黃竹坑的「如心南灣海景酒店」。「如心南灣海景酒店」吸引我的地方，因為位於港島南區黃竹坑，網上見佢景觀都幾靚，離家遠一點，會更有渡假feel！而且酒店更加係香港首個地質公園主題酒店，一於睇下有幾特別先。

係酒店公關姐姐安排下，瞳瞳一家順利入住酒店，今次等＜瞳遊樂＞同大家一齊去玩下啦！STEP BY STEP的如心南灣海景酒店住、玩、食攻略！我地分開5部份介紹：交通篇、房間篇、設施篇、餐飲篇　及　地質公園主題介紹。

交通篇

黃竹坑大家覺得好似好陌生、好遠，但一講「海洋公園」大家都知道了，無錯呀！酒店就係「海洋公園」附近，我地由酒店房間已經可以見到海洋公園同登山吊車，而隨著港鐵南港島綫通車，酒店同「黃竹坑站」 (B出口)只有步行5分鐘距離，南港島綫就可以伸延去到海洋公園、金鐘、鴨脷洲等地方去玩。

如果係搭巴士，大部份經香港仔隧道去南區的巴士路線，可以係「業興街」呢個站落車，對面就係啦！上車的時候可以問一問巴士車長！

５分鐘的步行距離

當然啦，「自駕」的家庭們都可以在酒店泊車，不過就記得要預先向酒店查詢同問一問收費詳情啦～

房間篇

我地當日就自駕去酒店，由新界出發，一穿過香港仔隧道不久，就到達「如心南灣海景酒店」，因為酒店停車場出入口係塘邊徑，事前要做好功夫，用GPS或地圖搵定路。一去到，酒店職員的哥哥們就替我地泊好車，我地輕輕鬆鬆拎行李落車，再由佢地引領我地到酒店大堂，服務很貼心呢！

如心南灣海景酒店

大堂位於5樓，空間好大好寛敞，透光度十足。

大堂另一邊有休閒區比旅客休息、交流，因為地方大、樓底高，多多人都唔怕呀！旁邊有咖啡機提供熱飲、各類雜誌、仲有電腦免費提供比大家使用。

咖啡機＆雜誌

大堂雖然好吸引，但我地要上去房間啦！酒店前台員工好勤快地為我地辦理好入住手續，最開心係酒店方面 upgrade 我地一家住「AQUA SUITE」的套房，「AQUA SUITE」位於酒店最高層37樓，我地好期待呀！！

房卡卡套已經好細心標示酒店設施

一開門，「嘩」左一聲！房間超大，有個客廳，大電視都有兩部，一部係廳一部係床頭；落地大玻璃的外面有一個小露台，可以眺望深水灣、海洋公園同鴨脷洲、香港仔避風塘的景色；至於浴室就大得更加誇張，以為只會在泰國出現的浴室呢度都有，分開的淋浴間及浴缸，足夠瞳瞳玩水玩個夠；其他細節的有Salvatore Ferragamo名牌洗手間沐浴用品、設有量度身高體重指數（BMI）的電子浴室磅、免費使用沖茶設備及Nespresso咖啡機、雪櫃、風筒等，通通都齊哂！

電視兩部、連洗手盤都有兩個，一家大細就唔駛爭嚟用！而且有樣野好抵讚，酒店好貼心，知道我地三個人，由支裝水到沐浴用品，都給我們三份，like！

兩部大電視

大床夠做一字馬

洗手盤都有兩個，啱哂一家人，唔駛爭！

Salvatore Ferragamo名牌洗手間沐浴用品

下面冰箱，上面就連微波爐都有

免費使用沖茶設備及Nespresso咖啡機

奉上果盤

落地大玻璃同露台

一面向深水灣、海洋公園

海洋公園南朗山上的logo同吊車

另一邊就鴨脷洲、香港仔避風塘景色

設施篇

夏天嚟酒店，最緊要就係個酒店泳池，酒店泳池比公眾泳池使用人數相對少得多，所以帶年紀較細的小朋友去酒店泳池，我會放心一點。

酒店泳池位於酒店6樓，要先經過健身室進入，响呢度可以向健身室借毛巾（藍色的），順帶提一提，健身器械就唔太啱小朋友，但大朋友就不妨玩下，因為我見到有教練／職員睇場，你可以放心咁玩。

講返泳池，真係好啱小朋友嚟，再細個再baby的小朋友都可以，因為佢係一個三合一泳池，呈長方形，分為成人池(最深處約1.6米)與小童池(0.3米)，中間以一個噴泉池分隔開。無錯呀，小童池只係0.3米，小小baby都可以玩啦！當然記得一定一定要有大人陪同先可以用游泳池呀！

餐飲篇

是晚自助晚餐安排係3樓的「LIS Café」，主題係蠔，所以今日好多食物都會包含蠔的成份，每位先送椒鹽焗蠔或葡汁焗蠔，出面有牛扒、豬扒、雞扒、香腸等即叫即煎、紐西蘭生蠔亦任食、中菜、沙律、日本壽司、刺身、凍盤、海鮮如長腳蟹、蝦、螺、青口等，飲品咖啡茶果汁都齊備。

至於早餐，係同一間餐廳享用，有中式點心、乳酪、牛奶、炒麵、多士、炒蛋、火腿等等，都叫多款式可以揀。

地質公園主題介紹

「如心南灣海景酒店」香港聯合國教科文組織世界地質公園結為伙伴，成為本港首個的「香港地質公園酒店」。其實我地一行入酒店，就會感受到不一樣的氣氛，酒店各處都掛有香港地質公園的相片同裝飾；大堂有「地質公園資訊站」，用電腦就可以輕鬆瀏覽到地質公園資訊，旁邊仲有小冊子免費索取；亦有一個飾櫃，有化石展覽同紀念品可以賣；就連我地係酒店房的TV入面，有一條介紹地質公園的頻道。

酒店有推出地質公園導賞團比大家參加，亦有住宿套餐，一個價錢包導賞團及來回酒店的交通，大家不妨留意酒店網頁。=)

地質遊覽團介紹

地質公園資訊站

小冊子免費索取

酒店餐廳還會推出地質公園美食，廚師好有心機咁設計模仿地質公園的型態，大家又睇下似唔似？

整體而言，我地玩得好開心，亦算係我地住過幾間本地香港酒店嚟講，房間最大、設施最齊的一間，而且好適合一家大細玩，再細的Baby都無問題。身為「過來人」，瞳瞳爸爸都明白有時候小朋友太細個，真係唔方便出去遠遊，除左照顧問題之外，時間同金錢都係需要考慮，但又想放假放輕鬆又可以點呢？留係香港，嘆返間靚酒店，享用酒店所有的設施，都係一個好好的選擇！

如心南灣海景酒店　－　＜瞳遊樂＞絕對推薦