【香港本地親子遊】【元朗新田】率先親身試玩「新田購物城」

「新田購物城」－唔知大家知唔合香港有呢個地方呢？上網搜查，發現無咩人介紹。於是我地一家人親身入去睇下有咩玩，反正新年假期唔係好多地方開，而且「新田購物城」新年期間照常開放，都係時候去走走。我諗我地都算係率先寫呢個地方的Blogger啦～

「新田購物城」位於元朗新田，近新田皇巴站，即係平時我地坐所謂的「皇巴士」返中國內地的巴士總站，建議大家可以由上水出發，搭九巴76K/276B，係「新田運輸交匯處」落車，過對面馬路繼續沿青山公路向元朗方向行，就已經見到banner，經指示行入去小路就係。

如果揸車的父母，可以在上水沿新田公路，跟「新田」出口到新田交匯處，然後追「新田公共運輸交匯處」，到青山公路之後向元朗方向行，在皇巴巴士站斜對面有條小路入去就係。

揸車可以泊入去「新田購物城」的停車場，每小時 $10，唔算貴，而且係入面消費，每$100 free 1小時；$200 free 2小時；$300 free 3小時，門檻唔高。

先介紹一下「新田購物城」先，官網咁話：「全港首個遊玩購物主題樂園The Boxes，位處中港門廊之一—落馬洲，毗鄰新田公共運輸交匯處，多條本地巴士及小巴直達，亦設有跨境穿梭巴士，交通便捷。The Boxes佔地420,000平方呎，場內逾200間店舖，網羅本地及進口知名品牌。

　　The Boxes率先引入嶄新「Shop-n-Play」概念，集遊樂及購物於一身，全場商舖以顏色鮮艷的仿貨櫃箱組成，配合場內大量消閒配套，如許願池、人力車、街頭藝術館及音樂會等，每月更會舉辦不同主題活動及適合親子玩樂的遊戲，讓顧客充份感受有如嘉年華會的歡樂氣氛，絕對是一家大小的假日玩樂好去處。」(撮自:http://www.theboxes.com.hk/tc/)

好！我地出發啦！

沿小路入去

「新田購物城」正門有市區及新界的士站，不過無車

「新田購物城」正門

「新田購物城」的佈局似一個圈圍住咁行，商舖用一個個貨櫃屋似的結構所組成，一邊有扔公仔、彈床之類的攤位遊戲，一邊就係食肆，其餘就係商舖啦！

可能未完全「入伙」，仲係試業期間，所以人流十分稀少........

無咩人行

有人力車可供遊人拍照

遊戲區有扔公仔、彈床之類的攤位遊戲，要兌換代幣玩，1代幣 = $5 HKD，我地所見的大部份攤位用4-6個代幣，至於玩彈床就要更多金幣啦！

食肆就得三四間進駐，有茶餐廳，小食店之類。

至於店舖，比較熟悉有「759阿信屋」同「優品360」，始終好多吉舖，未有太多野可以睇到。

因為人流唔多，主辦單位都有開辦免費跨境巴士吸引內地遊客，由福田崗廈到新田購物城，希望吸引人流。

總結：可能剛開業，而且環境較偏僻（新田），所以唔多人去，人流十分稀少，如果大家當一家人避開市區人流，搵個人少少地方行下就好。

有用資料: 

1. 新田購物城

地址：元朗青山公路新田村路３００號

交通：上水港鐵站，九巴76K/276B（往元朗/天水圍方向），新田運輸交匯處落車

網址：http://www.theboxes.com.hk/tc/