每年的農曆新年前後，又係摘士多啤梨的好時候，所以每年瞳瞳爸爸都會編排摘士多啤梨活動係農曆新年假期，既親近大自然，又可以在頻繁的拜年活動之中抖下。
香港本土有好多士多啤梨園，我地之前都介紹過：[本地親子遊20170201]本港士多啤梨園介紹+摘取攻略心得 http://tungbama.blogspot.hk/2017/02/20170201.html
今次我地去位於流浮山的士多啤梨園－陶氏休閒生態農莊。如果坐巴士出發，大家可以到元朗搭港鐵巴士K65，巴士由元朗西鐵站開出，經元朗大馬路、天水圍西鐵站，總站流浮山落車，落車之後沿深灣路向白泥方向行大約五分鐘，就會見到陶氏休閒生態農莊的路口。
如果揸車的朋友，直接到農莊，有免費車位可泊車。
 |
| 農莊正門 |
農莊都算易搵，不過要俾入場費$5/人，而呢$5入場係硬食，無得係農莊入面用番，不過唔緊要，$5就當見識下，其實農莊地方都好大，佢最主要係中間辦事處位置的燒烤區(需要事先預訂)、旁邊有個地標式的大水車，影相一流；入面仲見有彈床、小朋友電動車等遊戲區，項目統統額外收費，因為我地目的係摘士多啤梨，所以目光放係農田上。
農莊的士多啤梨田分兩個位置，一個近門口、另一個就行到尾，過左燒烤場位置就見到。今年士多啤梨收成看來不錯，因為少雨水，反而少浸爛，以往雨水多，濕到爛，行落田都有難度，今年好好多。。。。。。（touch wood）
同樣去到田入口處，拎個籃同較剪就出發了，之後就磅重計數埋單。呢度士多啤梨size都大粒，而且幾靚，唔難揀。
之後我地再去另一個邊田地，中途經過呢個農莊的地標：水車，梗係影返張合照啦！
呢度都有養小動物，當日我地見到羊同兔仔，小朋友可以買飼料去餵佢地。
雖然呢度又收入場費，樣樣玩既都計錢，但點解瞳瞳爸爸都嚟呢？因為我地早幾年嚟既時候，食過呢度種的唐生菜，非常好味，好甜好新鮮，我記得果晚仲即刻用來打邊爐，美味可口，非常懷念！今次都例外，照舊買菜走，今次菜田姨姨俾瞳瞳親手割菜，有板有眼噃！一次難得的體驗，亦希望小朋友從中得知珍惜食物的道理。
 |
| 要搵出個底根，都唔容易架！ |
 |
| 成功！ |
閃遊流浮山
去完「陶氏休閒生態農莊」，可以返回原路到流浮山搭K65巴士離開，離開前不妨到流浮山行下，補給或者買下手信。一般我地親子家庭而言，行既只有流浮山大街，由巴士站旁邊行入去，一直行到出海邊就算大功告成，大街兩旁以手信店、海鮮檔同海鮮酒家為主。
流浮山盛產蠔，可說係香港蠔鄉，我地又點可以錯過呢？手信店都係以賣蠔鼓、海味為主，亦有小食店有炸蠔、燒蠔作招徠，如果運氣好，仲會見到有人即場開蠔添！雖叫大街，但其實係小路，人多會較擠擁，由巴士站行到出海邊有時要15分鐘。
 |
| 流浮山海邊 |
有用資料:
1. 陶氏休閒生態農莊
地址：元朗流浮山深灣路 (榮真學校後面)
交通：元朗或天水圍港鐵站，港鐵巴士K65（往流浮山），流浮山總站落車
電話：2266 0003
沒有留言:
張貼留言