瞳遊樂 (八十後香港家庭的親子旅遊blog)

2023年10月16日星期一

【親子10日9夜自駕之旅～日本東京、靜岡小丸子、富士山、渥美半島、鳥羽、大阪】Day 2 : 靜岡鐵道「新靜岡到新清水」＞S-PULSE DREAM PLAZA櫻桃小丸子樂園 (3之1)

「櫻桃小丸子」由1986年開始連載，是以作者櫻桃子的童年（昭和49年，即1974年）生活為藍本的1970年代故事，主角的姓名也是與作者同名，故事背景是在日本靜岡縣清水市，但可惜作者櫻桃子在2018去世，令人十分婉惜。

多年前作者已經成立工作室，所以「櫻桃小丸子」卡通會一直流傳落去。當然作為陪伴小弟多年的卡通片，所以我有興趣去了解下呢套卡通背景地方，而「尋尋覓覓」都係旅行既一個目標同樂趣，於是就出發去搵櫻桃小丸子啦！今日行程主要分三部份：

1. 去S-PULSE DREAM PLAZA櫻桃小丸子樂園

2. 清水魚市場河岸市場 LUNCH

3. 真正走入清水市搵櫻桃小丸子卡通入面既真實場景

由靜岡出發，我地先由酒店所在的ＪＲ静岡駅，步行大約十分鐘，到靜岡鐵道(又稱靜鐵)的「新靜岡駅」。「靜鐵」係當地既一條小型鐵路，只有一條路線「靜岡清水線」，全程１１公里，共有１５個站，由新靜岡至新清水。我地今次就係由頭坐到尾，終點「新清水駅」落車。

因為係當地鐵路，人唔會太多。

小朋友坐電車的指定動作吧，祈祈也不例外

中途經過「靜鐵」電車既車廠

第１４個站叫「入江岡」，呢個車站經常係小丸子卡通入面出現，佢+姐姐+媽媽經常由屋企到「入江岡駅」搭電車，去靜岡市百貨公司SHOPPING。而小丸子讀書既小學，就係叫「入江小學」，感覺開始越嚟越近了。

正正就係「入江岡駅」，我地同對面線有小丸子塗裝的靜鐵列車相遇，即刻嚟個合照先。

好快，我地就到終站新清水，呢度係一個無咩人既寧靜小鎮。我地要坐免費穿梭巴士到S-PULSE DREAM PLAZA，不過巴士站唔係一出車站就有，要行一段路同跟地圖搵，同埋平日班次較為疏落。

地圖：上一個紅點「乘場」就係上車處，過對面馬路再行兩個街口就係

免費穿梭巴士每天上午 9 點至晚上 10 點運行，往返於 JR 清水站、靜岡鐵路新清水站和 S-Pulse Dream Plaza 之間。時間表按我

穿梭巴士站

穿梭巴士係一部紅色鮮明既單層巴士

大約１０分鐘，就由新清水到S-PULSE DREAM PLAZA，有一個大大摩天輪地標就係啦！佢本身係一個商場，外面平台就有機動遊戲設施，今次我地先去３／Ｆ嘅櫻桃小丸子樂園。

櫻桃小丸子樂園地方唔大，一小時內就可以完成，左手邊就係售票處，一陣我地會由右邊門口入，行一個圈，由左手邊既出口出返嚟。

櫻桃小丸子樂園正門

營業時間 10:00-20:00（最後入場時間19:30）全年 365 天營業

入場費成人（中學生以上）1,000日圓（含稅）

小朋友（3歲～小學生）700日圓（含稅）

*2歲以下兒童免費

今次仲贈送小丸子紙扇，炎炎夏日太好了！

入場前同金裝小太子合照先

一入去就見到小丸子同爺爺

之後就係人物角色介紹

同祈祈影相果陣，小丸子突然出現，原來呢個時間係卡通人物同大家合照時間，超開心！

影完相，繼續行，就係小丸子一家的場景啦！

爸爸：飲返杯先啦！

媽媽：仲爭Ｄ咩食材未買呢？

姐姐同小丸子間房好亂、姐姐好嬲呀！小丸子去左邊呢？

原來小丸子同嫲嫲傾緊計，睇佢表情，應該又有鬼主意！但漏左一個人咁喎。。。

無錯，就係爺爺，佢係門後面呀

下一個地方就係３年４班既課室啦！

見到佢地學校既鞋櫃，每個櫃都有對鞋，可以搵返故事入面班同學個名架！

呢個係洋蔥頭—永澤

一對好朋友—大野同杉山

小丸子卡通內，３年４班所有同學，你地又記唔記得佢地呢？

同小丸子比高

呢度有個放映室，無限播小丸子卡通（日文），雖然係日文，但卡通勝在大家都睇得明～

原來有人從後監視.....KI.....KI....KI.....

作者手稿展示區

參觀緊既時候，突然工作人員叫我地快快去下一個場景，原來係播小丸子主題曲...

突然間，小丸子出嚟，佢仲要係勁歌熱舞果隻，帶動全場氣氛！最後少不了再嚟張合照，嘩！今次之行同小丸子合照咗兩次啊！

嚟到呢個幻想世界，亦代表差唔多到出口了…

出口就係售票處，頭先賣門票既地方，外面就係賣手信既地方。

小丸子版本既「靜岡煮」

商場對出就係清水港，天氣好好呀～

見到S-PULSE DREAM PLAZA平台既機動遊戲，大家都想玩，因為係小朋友既遊樂設施，我奉獻出我人生第一次既過山車。

祈祈鬼咁開心

小朋友版本既過山車

玩完之後我地行下商場，商場都係超級市場為主，行一陣就要搭返我地頭先既免費穿梭巴士，不過今次唔係去「靜鐵新清水駅」，而係「JR靜岡駅」，我地會去下一站：清水魚市場河岸市場 LUNCH，下一篇見～

參考資料：

【親子10日9夜自駕之旅～日本東京、靜岡小丸子、富士山、渥美半島、鳥羽、大阪】準備及介紹篇

Day 1：香港國際機場＞東京成田機場＞成田特快「N'EX」+東海道新幹線品川去靜岡 (3之1)

Day 1：靜岡車駅零距離靜岡ASSOCIA飯店 (3之2)

Day 1：靜岡市內閒逛+魂心家拉麵 (3之3)

Day 2 : 靜岡鐵道「新靜岡到新清水」＞S-PULSE DREAM PLAZA櫻桃小丸子樂園 (3之1)

Day 2 :清水魚市場河岸の市 (3之2)

Day 2 :尋找櫻桃小丸子卡通真實場景 (3之3)

Day 3 :TOYOTA Rent a Car自駕租車，隨意自駕路邊UNIQLO+GU+無添壽司 (2之1)

Day 3 :富士河口湖水之里湖畔酒店一泊兩食 (2之2)

Day 4 :可以揸車入去睇動物：富士野生動物園Fuji Safari Park＋渥美半島遊 (2之1)

Day 4 :日本人渡假酒店體驗：伊良湖海濱渡假酒店(Irago Ocean Resort)一泊兩食(2之2)

Day 5 : 伊勢湾渡輪 (伊良湖去鳥羽) (3之1)

Day 5 :飼養種類約1200種，日本第一：鳥羽水族館＞麥當勞+鳥羽市內(3之2)

Day 5 : 新八屋溫泉旅館及晚餐 (3之3)

Day 6 : 相差海女小屋BBQ午餐體驗 (2之1)

Day 6 : 大阪天下茶屋小百合民宿(卡通片一樣的家)+商店街掃街 (2之2)

Day 7：三井LaLaport 堺 STUDIO ARC 影家庭照 (2之1)

Day 7：忍者堂忍者體驗 + 燒肉特急 (2之2)

Day 8 : Star Gate Hotel Kansai Airport (2之1)

Day 8 : Budget租車+Mega Donki+焼肉きんぐ+泉佐野漫遊 (2之2)

Day 9 : 大阪府立大型兒童館BigBang ，全天候室內遊樂設施 (2之1)

Day 9 : 浜寺公園，超好玩室外兒童遊樂場 (2之2)

Day 10 : 臨空城Outlet (1之1) ＞大阪關西機場 > 香港

2023年10月12日星期四

【親子10日9夜自駕之旅～日本東京、靜岡小丸子、富士山、渥美半島、鳥羽、大阪】靜岡市內閒逛+魂心家拉麵 (3之3)

靜岡市，真係同大城市唔同，但又未至於「鄉下」地方，佢係一種寧靜大城市，地方大，人唔多，好輕鬆，現代化的商場、品牌都會有。今次呢篇會係多圖少字，比大家一覽靜岡市內的環境。雖則叫靜岡市，但我地行既地方都係JR靜岡駅附近，其他的就等大家去發掘。

由於小丸子太深入民心，所以好多地方都見到小丸子的蹤影，好似呢個水渠蓋～

小丸子主題巴士

承上一篇，連埋地圖講解下，去日本旅行，一個地方最旺的多數都係車駅附近（井之頭五郎話既），所以酒店我揀咗靜岡ASSOCIA飯店，JR靜岡駅本身已經係一個商場，而當地比較旺的地方，就係「JR靜岡駅」同「靜岡鐵路新清水駅」之間：紅色就係車駅的行人隧道網，而隧道網大都連結百貨公司，所以呢幾日我地好多時做「地底人」：天氣熱，唔想曬太陽，但要涼冷氣，就靠地下隧道行，一直可以由JR靜岡駅通到新清水駅前的百貨公司—「新靜岡CENOVA」。

JR靜岡駅上蓋商場「PARCHE」，入面有超級市場、專賣弁當既「食彩館」、ABC-MART、UNIQLO、100 yen店等等。

果期正正做緊蠟筆小新既宣傳。

發現一間火車迷好啱去的地方，原來呢度有一個大路軌配置，可以比火車迷「放火車」落路軌玩，尤其屋企唔夠大既火車迷，我同祈祈都睇左一陣！

樂在其中

除咗放火。。。。。車之鯡，本身佢係一間賣有關日本火車精品既店舖，鍾意火車既小朋友唔好錯過。

當然要行下超級市場，買水果返酒店一家人食

「食彩館」你可以當係一個美食廣場，不過就外賣為主，日本水果搾既果汁都唔唔同Ｄ～

天婦羅蝦有成隻手臂咁長，所以有一晚安排係超級市場外賣返酒店食，選擇多又好味，照顧哂一家大細，我地食得好開心！

我成日都相信係日本二線地方都可以尋寶搵到好野，呢間店舖專係賣模型、精品，都消磨咗我一段時間，無論新品、中古都有！

中古區幫老婆搵鴨仔(Ahiru No Pekkuru)，有收獲！

任天堂紅白機遊戲帶，好齊！

行到累，就隨意搵間小店坐下，飲下野

又或者到西餅店，買個靚靚的ＣＡＫＥ食。我同老婆都比佢吸引咗，首先係揀ＣＡＫＥ，揀好之後就佢會將ＣＡＫＥ「擺盤」俾你望一望，最後才放入禮盒及包裝好。

登！登！登！登！ＣＡＫＥ既舞台！

夜晚，我地都有出去行下，又搵下食。今次目標係拉麵，靜岡都有唔同既拉麵店，小朋友嚟講最啱食！行下行下，就見到呢間魂心家

「美味到最後一滴！橫濱家庭拉麵靈魂店。特製的中粗面，配上原汁原味的濃鬱豬骨湯，讓人過癮。請務必嘗試最好的家庭風味！」

呢個係店家的自我介紹，大人叫咗「６３１（ろくさんいち）ラーメン」，６３１意思就係有６片紫菜、３片烤五花肉、１隻蛋、菠菜和鵪鶉蛋。兩姐弟因為食量少，於是就叫咗「魂心家の定番ラーメン」真係好好味！最後仲有不可不吃既煎餃子，好香口，好味！

店內都好多簽名板，睇得出好受歡迎～

同阿女負責係自助售票機買飛（忙亂中）

我地既餐單：６３１拉麵ｘ２碗＋魂心家の定番ラーメンｘ２碗＋煎餃子ｘ２份

我地食飽飽，離開魂心家，旁邊有間當地的稲荷神社，見有人圍觀，於是行入去睇下，原來神社正準備舉行一場小小的煙火表演！地方唔大，不過就好好睇，距離近，而且主辦人都好有心思，神社地方有限但都佈置到煙花有「走線」，即係由一邊燒到另一邊，仲有唔同顏色添，心思同氣氛滿分，我地全家都睇到好開心，尤其祈祈第一次親眼睇到煙火，好開心！！呢Ｄ就係旅行上遇到既驚喜～