「............寧願沒擁抱共你可到老
任由你 來去自如在我心底仍愛慕
如若碰到 他比我好
只望停在遠處祝君安好
雖不可親口細訴...........」
一聽到呢段歌，就好自然地諗起以前一套劇集，而呢套劇集背景正正就係我地香港一海之隔的「澳門」！
澳門，以前同香港叫妹妹埠，因為同位處於珠江兩邊，大家都曾經被外國成為殖民地（香港係英國，澳門係葡萄牙），所以有好多相似的地方。
以前瞳祈爸爸細細個果陣，去「澳門」旅行已經有如而家嘅坐飛機，今時今日的澳門，雖然未必係香港家庭旅行的第一選擇，但勝在交通時間短，兩地文化背景相近，反而成為好多爸爸媽媽帶小朋友外遊的「踏腳石」。
以前去澳門只有坐高速雙體船去外港碼頭，不過隨住港珠澳大橋通車，搭巴士都可以到澳門啦！「澳門」近年係以「玩酒店」為主，在路氹城的一邊，有好多美侖美奐的新酒店落成：威尼斯人、新濠影匯、巴黎人等等。。。調返轉今日澳門半島外港碼頭一帶相比就無以前咁興旺，但酒店價錢反而變得吸引，相比路氹城一帶更加經濟！
我地經港珠澳大橋到達澳門，當中過關過程詳情可參考：
由港珠澳大橋到達澳門口岸坐往外港碼頭的免費巴士，抵達外港碼頭後，巴士站正正係一眾賭場／酒店接駁車之中，只要細心搵到「往漁人碼頭」的免費接駁車就可以了～
漁人碼頭接駁車主要停靠漁人碼頭內的三間酒店，停站次序為：勵宮酒店＞勵庭海景酒店(今次入住)＞萊斯酒店。
今次目的就係住間酒店，游下水、食下野，簡簡單單咁，話哂第一次去澳門，未同瞳瞳祈祈去太多人的地方，小試牛刀先！
左手邊金色建築係「金沙娛樂城」，右手邊係勵庭海景酒店
我地酒店就係「金沙」對面咋，所以夜晚就我地就去咗「金沙」食自助餐，質素一般，但叫做近酒店。
穿梭巴士車程大約5-8分鐘就到了，落車位置正正在「勵庭海景酒店」旁邊，行入去就係酒店大堂！嘩！超級豪華！
職員好勤快，仲幫我地升級海景房，非常感動！
連升降機都一樣咁豪華，我地呢邊大堂一共有4部，完全唔駛擔心等太耐！
酒店樓高九層，客房集中係4至9樓
我地今次獲派九樓，電梯大堂佈置
連走廊都好有design，係豪華古典英式風
連房門都十分講究
房間好大，兩張床，基本設備全部有齊，TV有香港電視睇，同老人家嚟都唔怕悶親。
熱水壺、茶、咖啡、免費樽裝水齊備
浴袍、保險箱、拖鞋、衣架
洗手間都十分豪華，浴缸可以讓小朋友浸浴，家長可以透過玻璃安全觀察到佢地
至於窗外，就係靚靚的漁人碼頭景色，仲見到外港碼頭，來往港澳的雙體船來來往往，最遠可以見到友誼大橋(連接澳門半島及氹仔)
漁人碼頭日與夜
～套房篇～
因為真係愛上呢間酒店，令到已經好耐無去澳門嘅我地，在同一個月再去多一次澳門，本來只係計劃一天遊，但忽發奇想，去到酒店大堂話不如住一晚，小朋友又無咁辛苦，於是就即刻用手機apps訂酒店，價錢唔錯，酒店最後仲upgrade咗我地住「套房」，勁開心！
門口一入去就係一個大廳，電視梳化係齊度，一家人夜晚睇住電視食野最開心～
小吧台，仲有自助咖啡機提供～
本來套房可以通往私人花園，但現時鎖上了，好可惜出唔到去，只能窺探。
睡房內兩張靚靚雙人床，瞳瞳話好有童話城堡feel～
好多爸爸媽媽擔心澳門唔知點玩，其實我地都係懶人家庭，哈哈，唔想太勞累，放假都係想輕鬆，所以沒有特別追景點行程，於是搵一間好的酒店休息一下，享用一下入面的設施。勵庭海景酒店對面係「金沙娛樂城」，過對面馬路就係了！酒店本身位於澳門漁人碼頭，周不時都有活動舉辦，而且有好多食肆（比較高檔）。如果想平大眾化一點，可以行去對面金沙娛樂城的後面，果度係住宅區，有平價食肆、澳門當地的超級市場行下，買下獨有的包裝「柑桔茶」，正！！！
有用資料:
1. 澳門勵庭海景酒店
地址：澳門孫逸仙大馬路澳門漁人碼頭
電話：(853) 8799 6688
傳真：(853) 8799 6699
電郵：harbourviewhotel@fishermanswharf.com.mo
沒有留言:
張貼留言