瞳遊樂 (八十後香港家庭的親子旅遊blog): 【澳門】7個步驟「親身體驗港珠澳大橋」過關攻略懶人包（澳門篇）

2018年11月14日星期三

【澳門】7個步驟「親身體驗港珠澳大橋」過關攻略懶人包（澳門篇）

來往香港、珠海、澳門的港珠澳大橋，於2018年10月24日正式通車，方便咗三地往來，亦方便各位大小朋友去玩，瞳祈爸爸覺得最方便係一班原本會「暈船浪」、怕搭船的小朋友，而家多咗一個方法去澳門。

今次教大家去用「港珠澳大橋」搭穿梭巴士(金巴)去澳門，因為我親身試過去澳門，所以返嚟即刻step by step教大家。

至於珠海，其實都係大同小異，只係證件上的分別。😁

去澳門證件

成人：香港永久性居民身份證

年滿11歲或以上的香港居民：須出示本地簽發的有效香港永久性居民身份證，或載有｢*｣、｢***｣或｢R｣標記的香港身份證

未滿11歲的兒童：須出示本地簽發的有效香港永久性居民身份證及有效香港特區護照。（即所謂：無相身份證＋香港特區護照）

＊＊如果小朋友無香港特區護照，就要申請及使用「回港證」＊＊

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
呢度只列明一般香港永久性居民前往澳門時的證件，如果有其他證件及查詢，請向香港政府人民入境事務處了解一下　https://www.gov.hk/tc/residents/immigration/traveldoc/index.htm
或致電：2824 6111

Step 1 由香港各區➔「港珠澳大橋香港口岸」

如果你屋企附近有城巴A11、A21、A22、A29、龍運A31、A33X、A36、A41、A33P～恭喜你！！！！你可以由屋企坐以上路線「一程過」去到「港珠澳大橋香港口岸」！！！

若然你屋企無以提及的巴士線，都唔駛怕，就要轉車啦，如果「A線」的話，可以係「青馬收費廣場」或者「機場二號客運大樓」轉返上面的巴士線；如果「E線」的話，最好係「青馬收費廣場」轉返上面的巴士線。

巴士公司有提供八達通轉乘車資優惠。但一定要記住城巴轉城巴；龍運轉龍運，同公司才有優惠！

就好似瞳祈爸爸我自己咁，住馬鞍山，就要由屋企搭A41P到「機場二號客運大樓」，再轉巴士。
搭港鐵MTR的朋友，可以係「欣澳站」轉城巴B5或者「東涌站」轉嶼巴B6(傳媒報導人山人海，不建議)

城巴：http://www.nwstbus.com.hk
龍運巴士：http://www.lwb.hk
新大嶼山巴士(一九七三)有限公司：http://www.newlantaobus.com/

Step 2 「港珠澳大橋香港口岸」出境

巴士一落車，就已經係香港口岸的出入境大樓，巴士會停係出境層，出入境大樓設計同外觀瀲似機場客運大樓，採光度夠高，好舒服，帶備證件過關就可以了。

Step 3 「港珠澳大橋香港口岸」買車票

香港出發去澳門／珠海，日間為＄６５，夜間深宵(24:00-05:59)為＄７０
留意會以出發地貨幣為單位：

香港出發為港幣

澳門出發為澳門幣

珠海出發為人民幣

自助售票機：
過咗關之後，名義上我地出咗境，之後會見到數十部的自助售票機，自助售票機好似一部大iPad咁，對年輕一輩來講，操作上十分容易。年長的叔叔伯伯姨姨都唔駛怕，當日所見有穿梭巴士公司的職員「一對一」咁教大家買車票，佢地會幫你處理的，放心。

選擇目的地（珠海／澳門）→車票數量→付款（微信、支付寶、八達通），就係咁簡單！

呢度要講明，香港買車票可以用alipayhk，但澳門回程時只可以用澳門版的支付寶

＊＊自助售票機暫時只可以買正價車票，小童及長者要到售票處買票＊＊

售票處：
發售小童及長者車票，可以現金及信用卡支付。

車票係一張印有QR code既紙仔，袋好去，準備下一步去搭車啦！

港珠澳大橋穿梭巴士公司資訊及查詢 http://www.hzmbus.com/

Step 4 「港珠澳大橋香港口岸」上車

拎住張車票，沿住指示行出去室外搭穿梭巴士，呢個時候就分開「澳門」同「珠海」啦！唔好排錯隊，亦都要小心比人打尖，安全要緊！工作人員會撕車票，一半佢收，一半比返你。當日都有二三百人排隊，巴士已經密密開，按工作人員指示上車就可以，佢有單層巴士、雙層巴士同旅遊巴士三款車去疏導人流，但要留意，巴士公司唔比十二歲以下小朋友坐車頭，單、雙層巴士都係，現場所見工作人員會對帶小朋友的家長特別提醒。

Step 5 穿梭巴士出發

除咗巴士公司唔比十二歲以下小朋友坐車頭之外，亦會提醒全車乘客扣好安全帶。車程約40分鐘，可以欣賞珠江口景色，仲有兩個「景點」瞳祈爸爸覺得都值得大家去捕下：
1. 人工島隧道
2. 香港出發不久，進入大陸地方，會有「廣東界」的路牌，表示為香港同內地的分界。

Step 6 「港珠澳大橋澳門口岸」入境

40分鐘帶大家到達澳門口岸，其實澳門口岸同珠海口岸位置上幾乎係平排，佢地兩個出入境大樓之間仲有通道連接（只開放0800-2200）

落巴士之後就行入去澳門口岸辦理入境手續。

Step 7 「港珠澳大橋澳門口岸」入境➔澳門市區

同以前搭船唔同，無一大堆酒店賭場的免費穿梭巴士（俗稱：發財車）等大家，公共巴士可以搭101X及102X分別接駁澳門市區及氹仔市區。而「發財車」就聯合統一整合兩條路線，分別去「外港碼頭」及「氹仔客運碼頭」，當中我地搭左去「外港碼頭」，車程大約15分鐘，基本上落車地方就係一陣返香港上車既地方。去到「外港碼頭」及「氹仔客運碼頭」再轉原本各間酒店的「發財車」就可以了～