瞳瞳爸爸多年來都係沙田友，兩歲開始在沙田區居住，幼稚園、小學、中學、拍拖、結婚........就連擺酒果一晚、婚後的生活、「瞳瞳」「祈祈」出世的醫院，全部都係沙田區，我都算個「根正苗紅」的「沙田友」吧！哈～
「車公廟」，大家一定好熟悉，但你又知唔知道車公廟在每一年的其中一日會24小時通宵開放，凌晨三四點可以拜到神？當全香港的年宵市場在年三十收爐，但車公門口的小型年宵市場，就由年廿八開到正月十五（2018年），足足跨年18日？
由瞳瞳爸爸講下故仔，關於車公廟的歷史先：
「車公廟建於何時已不可考究，但嘉慶年間的《新安縣志》已有"在縣東九十里瀝源村下有車公古廟"的記載。
沙田車公廟的歷來主要有兩個傳說：
其一指鄉民於車公廟附近立村時，曾請風水師視察環境，發現村前為河流匯集之處，風水極佳，如能建廟座鎮，便可丁財兩旺。村民於是集資建廟，供奉車大元帥。
其二，當年瘟疫橫行，尤以「瀝源」（沙田舊稱）為甚，死者無數，鄉人研究典藉，發現宋朝車大元帥，不單平賊有功，所到之處，疫症即止。村民經商議後，遂向西貢蠔涌車公廟襄借車大元帥神像出巡相助，唯對方只肯借出車公孫兒神像。居民把神像抬回瀝源再圍繞各村巡遊，所到之處，疫症即止。自此，村民對車大元帥奉祀甚殷，為答謝神恩庇佑，每十年進行打醮，至今仍舊遵行。
其實車公誕每年有四個，分別為「正月初二」、「三月廿七日」、「六月初六」及 「八月十六日」；其中以正月的頭誕最為熱鬧，但不少市民為避「赤口」，多於「正月初三」前往車公廟參拜。」（部分撮至華人廟宇委員會網頁）
以前我細個過年，爸爸媽媽會帶我到大圍車公廟拜神，果時記得車公廟門口有個池塘，行入去係泥路小徑，人山人海，有次我仲因為人多而叉錯腳落去池塘度XP，所以印象特別深刻！（沒臉）
以前車公廟係細細間，今時今日大家見到的係1994年重建的新廟，但古廟依然保留，就係大殿車公像後面，可以隔住玻璃見到！
車公廟在每一年的其中一日會24小時通宵開放，凌晨三四點可以拜到神？
係呀，就係「大年初二跨去大年初三」的當晚。
平時小朋友返學、家長們返工，我就唔介紹啦～不過新年期間放大假，小朋友情緒特別Hyper，瞓又瞓唔到的話，不妨可以過黎行下，由年初二晚上開始大家已經可以出發，我建議大家可以食完開年飯，晚上十點左右黎，或者過左午夜十二點都得，人流會較少。
果晚瞳瞳爸爸就凌晨三點半到車公廟，一齊入去體驗一下夜晚拜神係點既......
 |
| 車公廟正門，雖然凌晨三點半，但亦有不少善信到來 |
雖然凌晨三點半，但仲有好多人係度參拜架！因為人多關係，有規定攜帶線香的數量。最多人相信就係車公廟能夠轉運，轉運就要靠風車，所以廟內設有多個「風車」，給善信轉動。轉動風車也有技巧，相傳如果上一年好運，你希望把運勢延長，就「順時針」轉；如果上一年運氣麻麻，就要「逆時針」轉，扭轉劣勢。
當全香港的年宵市場在年三十收爐，但車公門口的小型年宵市場，就由年廿八開到正月十五（2020年開放時間），足足跨年18日？
車公門口的小型年宵市場，又叫車公誕市場，在2020年其有44個攤位，最主要就係售賣風車，其次就係香燭、相命、解簽等等。
我又講多少少關於風車，因為風車可能多父母會買俾小朋友：首先唔好急，慢慢黎，因為不同攤檔的價錢都有分別，務必格價；第二，買的風車一定要轉到，否則又不太靈；第三，揀拜過神的風車（應該全部都有做呢個儀式）
其實日頭夜晚去車公廟都可以，而且交通方便，多線巴士都會到達，我作為沙田友，講過秘密你知，其實由「大圍站」行去車公廟係近過「車公廟站」架！所以大家記得「大圍站」落車直接行過去車公廟啦！
如果你係凌晨到車公廟，有三條通宵巴士線服務：
N281 來往錦英苑及紅磡鐵路站：經馬鞍山、旺角、油麻地、尖沙咀。
N170 來往華富及沙田市中心：經銅鑼灣、香港仔
N182 來往中環（港澳碼頭）及沙田（廣源）：經沙田第一城、灣仔、中環
有用資料:
1. 車公廟
地址：大圍車公廟 （通宵開放只會「大年初二跨去大年初三」的當晚）
2. 車公誕市場
地址：大圍車公廟正門，翠田街球場
時間：2020年車公誕市場為期18日，由2020年1月22日至2020年2月8日止(包括首尾兩天)。
沒有留言:
張貼留言