【日本、大阪、堺】非一般大阪「堺市」六天親子遊～海豚聚會+機動遊戲+動物園三合一：岬(Misaki)公園

親子旅行當中，去主題樂園既行程都走唔甩，可以比小朋友接觸一下動物同玩機動遊戲，一舉兩得！其中接觸動物的部份，更加係香港好少機會有添！

於是我就安排瞳瞳同祈祈去岬(Misaki)公園，我係香港預先經官網預訂「親親海豚活動」：http://www.nankai.co.jp/misaki.html　(只限夏天)，預訂好時間，就靜侯公園方面EmailL回覆，最後將Confirm letter印出黎，係指定日子同時間到公園的接待處交錢就可以了！

岬(Misaki)公園有少少似我地香港既海洋公園，不過人流少好多，亦唔多遊客去，以本地人為主。同樣地公園可以接觸動物同玩機動遊戲，我地去果陣已經係暑假，人唔多，反而我地玩得好舒服、好盡興！

由「堺駅」出發，搭南海電鐵南海線往和歌山方向的列車，就可以到「みさき公園」站，大約35分鐘就到達。

到達「みさき公園」站，車站規模都幾細幾荒蕪，車站主要服務岬(Misaki)公園，所以大部份落車既乘客都係去呢個公園架！

車站地下都已經寫好去公園的標示，所以唔會迷路，大可以放心！

由車站行過去大約5-8分鐘，就到公園大門啦！比個貼士大家，如果持外國護照，

入場劵有特別優惠：(2018)

成人（12歲以上） 1,350日圓→1,000日圓 

兒童（3歲以上） 700日圓→500日圓）

入場之後，如果再玩機動遊戲會再另收費，平均300至400 yen一項。佢另外仲有遊戲套票買既，不過瞳祈爸爸建議大家可以睇左想玩咩之後，先至再決定買唔買套票。

我地入場之後，第一時間衝去遊客中心報到，因為我地網上報名參加「親親海豚活動」，而家要交錢啦，同時間職員會俾埋張證件你，證明你係參加者。

呢度仲可以順便借埋BB車，費用：每輛車500 yen另外存入1500日元押金)

岬(Misaki)公園大致可以分為三部份：海洋動物、機動遊戲及動物園。地方好大好大，但遊人唔多。

公園餐廳提供餐飲服務，飯、拉麵、定食等等供應，最重要入面有冷氣，夏天時可以入去坐下抖抖。

一路向海邊行就會到達海洋世界。

企鵝於入口處同大家打招呼

我地到達集合處，由職員帶領下，同其他參加者一齊參加「親親海豚活動」，活動大約45分鐘。講下呢個活動的收費先，如果入去同海豚接觸,不論大人定小朋友，每人2,100 yen，瞳祈媽媽同瞳瞳姐姐就參加咗呢個；至於我同豬小B祈祈，因為BB太細個唔可以接觸動物，所以我地做旁觀者，都要比300 yen。(未夠3歲，豬小B仍然唔收錢)

因為我同豬小B係「旁觀者」，所以安排係側邊看台睇瞳瞳同瞳祈媽媽玩，不過正好可以幫佢地影相大影特影。

首先認識海豚，同海豚打招呼，摸摸佢。瞳瞳鍾意小動物，所以一點也不怕，仲好開心呢～

之後就可以同海豚互動做指令，今次係「華麗轉身」，海豚好叻，真係做到呀～每次做完動作我地都會餵魚仔獎勵佢地～

45分鐘時間好快就過去，到最後佢地會邀請埋我地「旁觀者」來個家庭大合照，超貼心！

眾人依依不捨地同海豚bye bye了

離開海洋世界，我地就原路行返出去機動遊戲地方，睇下有咩玩....

岬(Misaki)公園係由南海電鐵公司所開辦，所以入面都有個火車館，每位400 yen，主力全部都係展示南海電鐵公司的列車，對火車超喜愛的「鐵路迷」，不容錯過。

跳彈床，300 yen

小火車 300 yen

青蛙跳 300 yen，起初以為瞳瞳一個人包場，好彩最後有姐姐陪佢玩，哈哈～佢開頭無啦啦叫～好搞笑～玩左一陣就習慣咗啦！

貼紙相機、扭蛋機中心

動物園就係近入口處，呢度都有不少的動物，主要有三種：哺乳類、雀鳥及爬蟲類。動物有紅袋鼠、美國海狸、浣熊、印度孔雀、土撥鼠、麒麟綠鬣蜥、長頸鹿、小熊貓、白鸛紅鹮、貓頭鷹、斑馬、亞洲黑熊、日本獼猴、梅花鹿等等。沿住小山慢慢行，你可以揀「順時針」或「逆時針」行一個圈也可以。中途會經過一D遊樂場可以比小朋友玩下抖下～

呢部係自動售飼料賣機，100 yen，大家要預備好幾個100 yen銀仔，因為附近都無地方可以「唱散紙」，佢會跌出一包好似我地香港阿X羅的Monaka雪糕磚咁，你可以同樣地撕開，方便餵動物～

行完動物園一圈，在出口處仲可以買埋樂園獨有的紀念品同手信添！

我地行咗成日 岬（Misaki）公園，沿途見到的遊客唔多，我覺得大家可以當佢係一個放大版的「荔園」咁。但當中的海豚聚會千萬不要錯過，真係好難得俾小朋友一個好好接觸海豚的機會。

呢個公園可以行大半日，當日我地0900由酒店出發，大約下午3點左右離開，公園有BB車、餐廳等設施，親子行程必到，放鬆玩放心行！



有用資料: 

1. 岬（Misaki）公園

開放時間：9：30~16：00 

※根據具體情況，會改變開放時間和關閉時間。 

※最後入場時間是營業結束前30分鐘。

開放時間及各項入場收費請留意官方網頁：http://www.nankai.co.jp/misaki.html

交通：南海電鐵南海線(和歌山方向)到達「みさき公園」站直達

地址：大阪府泉南郡岬町淡輪3990番地

1. 距離堺駅步行3分鐘，食肆商店全都有：Comfort Hotel Sakai

2. 堺駅食肆推介＋PLATPLAT購物中心，超貼地感受生活

3. 海豚聚會+機動遊戲+動物園三合一：岬(Misaki)公園

4. 大阪百年歷史路面電車，體驗「阪堺電車」之旅

5. 尋找小石頭做御守，千年歷史「住吉大社」

6. 超級好玩！大阪府立大型兒童館BIG BANG！齊齊攀上53米高「遊具之塔」！