我地呢個非一般大阪「堺市」六天親子遊行程開始啦！之前我地講過，瞳瞳爸爸揀「堺市」呢個地方，就係覺得佢非常方便，由大阪關西空港出發，搭南海電鐵所有去難波既火車，不論係任何類型的快班次、慢班次、往返機場的 特急rapi:t 來回都一定會停「堺」駅，你睇下張路線圖你會明白有幾咁方便了～ 我地由「堺駅」去「難波駅」，亦只係3個站而已！
大阪關西機場內容我不重覆了，拎好行李、過埋海關，就搵「TRAIN」的指示牌，好快就去到鐵路車站大堂，我地揀搭的公司係「南海電鐵」，之前教過大家搭 特急rapi:t 就好似機場快線一樣去難波，同樣都可以係中途站「堺」落車。不過今次我地慳錢，改搭空港急行的班次列車，佢就好似東涌線咁，係一般市民都會搭既鐵路，停站較多，但記得不要坐「站站停」的「普通班次」，會好痛苦的！跟我地一樣揀「急行班次」，車費一樣，但停站較少。
兩種火車來往關西機場＜－＞堺的比較(2018年)
特急Rapi:t(普通席)＜－＞成人1330 yen＜－＞4個站＜－＞車程約33分鐘
空港急行＜－＞成人820 yen＜－＞8個站＜－＞車程約36分鐘
上車後，就要放好行李，因為佢唔似 特急rapi:t 有行李架，同我地平時港鐵車廂格局一樣，車程好快，約36分鐘就到「堺駅 Sakai」。「堺駅 」分為南口同北口，簡單D講就係車頭同車尾，我地設定車頭/北口係向難波方向，而車尾/南口就係向機場方向，Comfort Hotel Sakai就位於南口，即係車尾的一方，要留意南口只有樓梯，拎住行李就辛苦少少，不過都係一小段路，而且一到地面就差唔多到酒店了，可以接受。
如果真係唔想搬，車頭北口就有升降機，不過就要過河行返轉頭，時間會多左。下圖就係車口(藍色框)同酒店(紅色框)距離。
Comfort Hotel屬於Choice Hotels International, Inc.精品國際飯店公司旗下的酒店品牌之一，佢定位係商務酒店，大家可以投下信心一票。
因為我地唔係大阪市中心，只係佢外圍的一個城鎮，所以價錢比較相宜，我地大約10000yen一晚，即係700港紙左右，但近車站、包早餐、四人房、仲有一個小小的茶几偏廳咁既位置，房間亦都大，同大阪市內完全兩回事，如果好似我地咁一間酒店住多日，計落真係慳返唔少！
由車站行到地下，留意有一邊出口處有間Family Mart，望住Family Mart正門，右轉就見到我地酒店，就咁沿住火車橋底咁行過去只係兩分鐘咋！
行既時候大家都留意一下，兩邊都有好多不同類型的食肆，車站仲有間超級市場同街坊版的100円店，真係超級方便！
酒店大堂簡潔明亮，有個休閒區同好多關於堺市旅遊資訊可以係呢度搵到！另一邊就係餐廳，我地食早餐的地方。有個要讚的地方，我地旅行果時係仲夏，熱辣辣，佢係早餐完結之後到晚上十一時之間，係餐廳提供免費凍烏龍茶、橙汁同檸檬水，瞳瞳成日落黎斟水好開心。
大堂職員非常友善，好快就幫我地辦理好入住手續。簡單英文溝通都OK！
酒店亦都提供免費單車租用，不過因為單車未有車頭燈，為安全計，職員只會比日間租用。
早餐就係地下餐廳提供，提供簡單的早餐，由0630-0930供應，所以大家就早少少落黎食，有飯團、咖哩湯/麵豉湯、沙律、玉子、香腸、炸雞等等，未至於好大堆頭，但就夠飽！飯團我最鐘意，有幾款口味揀，好好味，係好有日本家庭feel.......餐廳有BB椅提供，職員仲恉一路Refill到早餐時間完結為止，非常好！
介紹一下酒店設施先：
首先酒店係全面禁煙，帶住一家大細就非常放心，唔駛再為酒店派錯smoking room而煩惱，洗衣房同汽水機都係3/F。
有得洗衫實在太好了！洗衣機300 yen一機，乾衣機100 yen/30分鐘，「以我經驗」來說，500 yen就剛剛好(300 yen洗衣＋200 yen@30分鐘x2次乾衣 )，即刻有衫可以著，夏天好重要呢～太太們又不用辛苦～♥♥♥♥
如果湊住小朋友分身不暇，連酒店都出唔到去，各位爸爸媽媽唔駛怕，呢度汽水機價錢就同便利店差不多，汽水、啤酒、果汁同茶都有，方便之選！
好啦！我地上房啦！今次酒店編我地住8樓，係最頂一層，一打開房門，嘩！超正！咁多次去日本住得最大面積的一次，瞳瞳祈祈兩條友最開心，蹦蹦跳跳！
我地住的房間叫TWIN HIGH CLASS，有30平方米咁大，房間有：烘乾機、空調、電視、WIFI、行李架、拖鞋、加濕空氣淨化器等。
拖鞋非一次過使用的，不過都經過消毒，可放心使用～
洗手間好乾淨，座廁同浴缸係上一級，出入時要小心。
洗頭水、沐浴露及護髮素一應俱全。一般日本酒店平常的格局，乾淨企理！
酒店特別為瞳瞳預備一份
間房大成咁
我地窗外係對住巴士站，所以好開揚。祈祈好叻仔，最鍾意企係窗邊睇巴士、望街景。
見唔見到瞳祈媽媽、瞳瞳同祈祈呀？😂
我地住了5晚，非常滿意今次住宿，房間又大，乾淨又企理～最重要價錢又相宜，如果係大阪市中心一定不可能了。今次Comfort Hotel Sakai因為屬於小城鎮，沒有太多遊客(包括香港及大陸)，地理上近南海電鐵「堺」駅，附近有便利店、食肆及大型購物中心"PLATPLAT"(「堺駅」北口)，一間CP值超高酒店！非常推介！
1. Comfort Hotel Sakai (コンフォートホテル堺)
地址：〒590-0972 大阪府堺市堺区竜神橋町1丁目5-1 (南海電鐵「堺駅」南口)
電話：072-233-7111
傳真：072-233-7137
2. 堺駅食肆推介＋PLATPLAT購物中心，超貼地感受生活
3. 海豚聚會+機動遊戲+動物園三合一：岬(Misaki)公園
4. 大阪百年歷史路面電車，體驗「阪堺電車」之旅
5. 尋找小石頭做御守，千年歷史「住吉大社」
沒有留言:
張貼留言