瞳祈爸爸繼續捐窿捐罅，發掘一下香港其他隱世的好去處，今次我地瞄準咗香港科技大學，入面原來有間隱世嘅自助餐廳，一齊入去睇下啦！
自助餐廳位於「CONFERENCE LODGE」入面，科技大學叫佢做「李達三葉耀珍伉儷李本俊會議大樓」。「CONFERENCE LODGE」本來係大學入面的賓館，主要招待參與香港科技大學會議的代表、到訪學者和教授、研究生及大學來賓。
今次我地係自駕遊，揸車入去，我地係一般訪客，要由「科技大學南閘」入去，即係「清水灣道油站」、「舊TVB」果度入去。
途中經過「舊TVB」「舊邵氏大樓」果度入去。
入閘後，大學保安會問你去邊，你答：「食自助餐！」就可以啦～ 佢同時會比一張卡紙咁嘅泊車證你，好好Keep住帶埋去餐廳，因為臨走要拎免費泊車（科技大學泊車收費：頭兩小時每小時$10；第三小時開始起，每小時$50，餐廳滿$300 free 2小時，$600 free 3小時）
如果唔熟路的爸爸媽媽，可以入閘果陣問一問保安，佢地會教你點去～
終於到抵CONFERENCE LODGE，門外大量車位可泊！
大家留意一下，雖然係大學賓館，不過就交俾「L Hotel」去營運，「L Hotel」就係「如心酒店集團」啦！
我地的餐廳位於地下叫「UniQue」，逢星期六及日，提供周末自助早午餐，供應時間為上午11時至下午3時，收費及其他詳情： http://www.conferencelodge.hk/tc/food-beverage/unique.html
擺檯都叫闊落
大家最關心的既食物，開始～～～～
凍肉區、麵包區
沙律吧
「韓式滋味」主題，都幾有創意～
「泡菜小籠包」
「韓式粉絲」、「凍豆腐」
其實除咗係出面拎野食之外，每張餐檯都有一張餐牌，大家都可以柯打任叫餐牌上的食物，由廚房即叫即造，再由侍應端出來
烤美國安格斯肉眼扒，雖然細細塊，不過就好juicy～
炒蛋配豬肉腸
煎黑豚肉配芒果芥末
各式果汁無限量供應，旁邊仲有咖啡
水果及甜品區
仲有朱古力噴泉添呀～
大家睇下豬小B食得幾滋味！
餐廳坐得舒適，又面對靚靚海景，人亦唔多，絕對係一流享受。食物質素方面，如果二百幾蚊一個自助餐嚟講算係幾抵食，雖然款式有限，但心思十足（韓式主題），服務亦非常周到。唯一真係要講就係位置「唔就腳」，如果搭巴士嚟既朋友要行一大段路先上到嚟，亦因為咁面造就呢間真正既「隱世餐廳」。
用餐後大家可以參觀一下香港科技大學，悠悠閒閒就一天行程了～
有用資料:
1. CONFERENCE LODGE (UniQue)
地址：香港九龍清水灣香港科技大學李達三葉耀珍伉儷李本俊會議大樓
電話：3701 8822
交通：
九巴
91 清水灣 <->鑽石山站
91M 寶林<->鑽石山站
91M 寶林<->鑽石山站
「香港科技大學 (南閘) 總站」下車，再步行約10分鐘前往
自駕：自駕屬一般訪客，一定要由「科技大學南閘」入去，即係「清水灣道油站」、「舊TVB」果度入去。入閘後，大學保安會問你去邊，你答：「食自助餐！」就可以啦～ 佢同時會比一張卡紙咁嘅泊車證你，好好Keep住，帶埋去餐廳，因為要拎免費泊車（科技大學泊車收費：頭兩小時每小時$10；第三小時開始起，每小時$50，餐廳滿$300 free 2小時，$600 free 3小時）
