【香港本地親子遊】4月29日(星期六)巴士迷必到：「復刻 ‧ 本地 ‧ 九巴」(內有巴士車型+會場限定紀念品預告)(活動已完結)

鍾意巴士的小朋友唔好錯過啦，今個星期六，4月29日，由朝早10:00到下午17:00，九龍巴士公司(下稱：九巴)會在尖沙咀文化中心露天廣場，舉行「復刻 ‧ 本地 ‧ 九巴」免費同樂日。

話哂瞳瞳爸爸以前都做過呢間公司，梗係唔止出面公佈既咁少料啦！所以我私底下都向舊同事八掛下，今次篇文會介紹當日會有咩巴士出現，仲有會場限定的紀念品！

早兩日九巴在佢地個Facebook已經透露左當日既活動內容，我地即刻睇下啦：（以下內容來自九巴Facebook）
當日會場分為兩大區：「復刻照相區」同「九巴遊樂場」。
於活動時間內，儲滿6個印章可免費換領一款 懷舊小食 乙份。

來自九巴Facebook

最簡易換到小食路線建議：

先去「復刻照相區」內錢箱大舞池影相（先蓋1個印章）＞再去搵大水牛影相同參觀（又攞多個印章）＞然後排「九巴照相機」叁陸零（咁就已經有3個印章）＞跟住去搵 特約車廂售票員－ 「九巴仔」 影相（攞多個印章）＞ 再去「九巴遊樂場」排任何2個懷舊遊戲，就儲滿6個印章！！！！

6個印章就可以去「九巴士多」換其中一款懷舊小食！
食完見口渴，like九巴專頁／follow九巴IG #kmbhongkong／於場內拍照的相片上載到自己社交平台帳戶，並hashtag九巴專頁或kmbhongkong，就可以換返杯懷舊濃縮果汁飲吓～

以上純粹建議，有關換領的細則及條款，請參考場內攤位告示。

展出的巴士車型

另外今次展出的巴士車型會有：「大水牛」(27/4 update 一定出場)、「長牛」(27/4 update 視乎古老巴士狀態才決定)，因為今年的主題係懷舊，所以係主要舊車為主。

「大水牛」係今年由一眾網友投票選出，等瞳瞳爸爸介紹下部巴士，講下故仔先：

1960年代香港人口急速增長，多個大型屋邨落成，居民對公共運輸需求大增。九巴原有的巴士已經不足以應付需求，因此要求英國的巴士製造商提供一款更長、載客量更大的巴士。由於當時英國巴士製造商沒有太多選擇給九巴，只有AEC可以為九巴度身訂造、提供及設計巨型巴士。於是在1962年至1966年，訂購了210輛全長34英呎的AEC Regent五型，34呎版本的AEC Regent五型是AEC專為九巴設計，在當時來說為獨一無二，亦是當年九巴車隊中最長、破紀錄的34呎長車身及118人的載客量，因其特大載客量，所以AEC Regent五型有「大水牛」之稱。

「大水牛」巴士　（來自九巴Facebook）

介紹完「大水牛」，瞳瞳爸爸又介紹一下「長牛」巴士：前面提及英國AEC車廠為九巴訂造了大水牛巴士（AEC Regent五型），另一間英國車廠丹拿Daimler亦不甘示弱，為了搶回香港市場的佔有率，於是向九巴提供了CVG6LX-34型新巴士，稱為「丹拿E型」，車長都稱呼巴士為「長牛」。這批巴士同樣為34呎長，載客量也有118人，最後九巴為了應付海底隧道開通及市區擴展需要，亦引入了超過200輛。

「大水牛」、「長牛」，兩款外型相似的巴士，但其實係由兩間不同的巴士製造商所造和為香港獨特的環境去設計。

下面果架就係「長牛」啦～　（來自九巴Facebook）

瞳瞳爸爸估計呢架為左今年九巴84周年的巴士全車身廣告巴士都會出場

謝謝Joseph兄提供圖片

會場限定紀念品

會場紀念版的Q版巴士，就係用上面架巴士做Q版巴士仔。

謝謝TY兄提供圖片

有用資料: 

1. 活動：「復刻 ‧ 本地 ‧ 九巴」

日期：2017年4月29日(星期六)

時間：10:00 ~ 17:00

地點：尖沙咀文化中心露天廣場

詳情：Facebook內搜尋「KMB 九巴專頁」

【日本、東京、草津溫泉】2016東京+草津溫泉7日6夜聖誕卡通親子遊～「Day5：東京迪士尼樂園」

東京迪士尼樂園，我地抽了全天一日時間去，原來。。。。。。一天也不夠！

瞳瞳爸爸我自己承認，我係一個唔太鍾意去人多擠迫地方的人，最怕去玩又要左計算右計算，例如要幾點入場或者拎咩fast pass去玩，我地一家人就比較隨緣，玩到就玩，玩唔到就算，所以呢篇文係無咩攻略可言，我地就係「入場＞排隊＞玩」，就係咁簡單！

東京好幸福，擁有兩個不同主題的迪士尼樂園，分別係「東京迪士尼樂園」、「東京迪士尼海洋」，出發之前都做好功課，瞳瞳爸爸把資料過濾及綜合整理後，基本上可以將兩個樂園分類，隨自己的情況同需要去選擇：

「東京迪士尼樂園」：機動遊戲較多，好多都啱年紀較小的小朋友玩，有些直情寫明「適合三歲以下小孩」；巡遊也不要錯過；果排最HIT、最熱門的卡通人物都一定在呢邊先亮相。

「東京迪士尼海洋」：睇SHOW為主；好多船仔可以搭；整個環境都有人工湖、河流、假火山，影相會好靚；而所有「海洋類」的卡通人物，如＜海底奇兵＞、＜小魚仙＞等等都會集中係海洋呢一邊。

今次係我地第一次去東京迪士尼，所以就揀去　東京迪士尼樂園　！


交通：

最近東京迪士尼的車駅不像香港叫「迪士尼站」，而是叫「舞濱駅」。無論大家在東京邊一個位置上車，記得車站叫「舞濱駅」。由我地新宿既酒店出發：

JR中央線＞中央線東京駅＞步行10分鐘＞JR京葉線東京駅＞JR京葉線＞舞濱駅

不過由中央線東京駅行去京葉線東京駅，足足要行成十分鐘，就似我地由香港站行去中環轉車咁，但人流超多而且都幾迫下，雖然路程中會有好多商店，不過瞳瞳爸爸建議大家唔好咁轉車，寧願搵D同站、又唔駛行得好多路先轉到車的車站較好，例如新宿出發又可以：

JR崎京線＞新木場＞JR京葉線＞舞濱駅

只需要同站去另一個月台轉車就可以，帶住一家大細唔駛行得咁辛苦。去程唔覺累，回程玩到無哂電大家就知道重要了。


入場門票：

我地就預先在香港網上的旅行網站訂票，完成付款後就會收到電郵及電子門劵，下載後把門票列印，就可以直接在迪士尼樂園入口處直接入場。又或者嘗試去日本當地的「大黑屋」買，價錢可能會比教便宜。

東　京　迪　士　尼　樂　園！我　地　嚟　啦！

由「舞濱駅」一出，就係一個平台，向左走係「迪士尼海洋」，向右走係「迪士尼樂園」，我地轉右向迪士尼樂園方向，大約行10分鐘就到樂園門口啦～

向左走係「迪士尼海洋」，向右走係「迪士尼樂園」

玩具店見到的Tomy車仔，終於見到真車

圖中的架空火車係來回兩個樂園及酒店區

卡通人物合照

入場之後就已經見到主角米奇老鼠，因為係人氣主角，所以要排隊影相，人龍也長長的。其實在香港迪士尼樂園玩果陣，我地都有收集簽名的習慣，已經有好多個卡通人物的簽名，今次到東京迪士尼梗係唔放過啦！簽名簿可以係迪士尼的精品店買架～

同香港不同，除左排隊合照的卡通人物之外，佢仲有其他小角色走出嚟搞下氣氛，果D小角色就唔駛排隊，只要你在旁邊一角靜待，佢會隨意揀人揮手招你過去影相，不過大家都要識做，快快影完就比下一個。

我地行入「美國小鎮大街」啦！我地淨係去過香港迪士尼樂園，好多人話，香港迪士尼係日本東京迪士尼既「縮細版」，果然無錯！個格局同香港差唔多，但地方同街道都非常闊落，連帶機動遊戲同機動遊戲之間都相隔好遠，不過同樣地，機動遊戲亦都好玩好多。

我地其實玩既機動遊戲一D都唔多，可能年尾特別多人，所以每個機動遊戲都要排得好耐時間，所以大家既任務就係排排排。。。。。。。

小飛象機動遊戲及園內爆谷

「小飛象」遊戲旁邊有部售賣爆谷的車仔檔，見大家排隊沒事幹，就去買個爆谷。當然，買爆谷也要排隊，呢度有唔同卡通造型的爆谷兜，有STAR WAR公仔頭、米奇老鼠等等，瞳瞳就揀左小飛象(2300 yen)，之後拎住呢個小飛象，可以去其他唔同的爆谷車仔檔Refill，每次大約500 yen(2016年價錢)，最好玩的係：唔同的爆谷車，所賣的爆谷口味都唔一樣架，有朱古力、焦糖、咖哩、蜂蜜、鹽、醬油等味道。即係如果你要試哂咁多隻味道，就要去勻哂啦！

小小世界

之後我地去玩「小小世界」，同樣都係排長龍。東京的「小小世界」絕對唔少，仲大好多，由路線到坐的船到場景都好大好大：首先路線差不多坐成8分鐘；一艘船可以載10人以上，兩船並發；場景規模同華麗幾靚，所以香港話果個係迷你版亦不為過。

白雪公主探險、小飛俠歷險、小熊維尼歷險之旅

之後我地玩左幾個機動遊戲：白雪公主探險、小飛俠歷險、小熊維尼歷險之旅，其實三個機動遊戲都好似，就係坐上去，之後一路行一路睇故事，形式一樣，只係內容唔同而已。不過燈光、視覺效果同其他聲效都好靚！

我地排隊等機動遊戲期間，就遇上巡遊，係兩者之間，我地只好選擇前者，好彩都算係「排住咁睇」。

唔知係咪日本人偏好小熊維尼，我地排小熊維尼歷險之旅係排得最耐，差唔多兩個小時，由日頭到天黑，但玩完之後你會覺得都值得排。

白雪公主探險

遇上巡遊

小飛俠歷險

外觀獨特的「小熊維尼歷險之旅」

我地玩完小熊維尼歷險之旅已經係夜晚，我地係樂園入面買左少少野食，行下精品店，就行去JR站搭火車返新宿食晚飯。

如果大家真係好想玩足本東京迪士尼樂園，一日時間真係唔夠，如果玩齊兩個樂園，時間更多。瞳瞳爸爸建議大家不妨到東京迪士尼樂園園區內的酒店網頁，會有住宿套餐方案連樂園入場劵，因為酒店位於園區，交通時間上可大大節省。另外如果單買入場劵，除了一日劵外，仲有2、3、4日門劵可揀，應該足夠你來狂玩大玩特玩，食勻園區內各種味道的爆谷！

＜迪士尼飯店＞

»  迪士尼大使大飯店

» 東京迪士尼海洋觀海景大飯店

» 東京迪士尼樂園大飯店

» 東京迪士尼樂祥飯店

＜東京迪士尼度假區公認飯店＞

» 東京燦路都廣場大飯店

» 東京灣舞濱酒店

» 東京灣舞濱酒店 度假俱樂部

» 希爾頓東京灣大飯店

» 東京灣大倉飯店

» 東京灣喜來登大飯店

有用資料: 

1. 東京迪士尼樂園／東京迪士尼海洋

電話：+81-45-330-5211

網頁：http://www.tokyodisneyresort.jp/tc/

延伸閱讀：

2016聖誕節 東京+草津溫泉 七日六夜卡通親子遊 (準備篇)

http://tungbama.blogspot.hk/2017/01/2016.html

2016東京+草津溫泉7日6夜聖誕卡通親子遊～「Day1 5之1：將更好的帶上雲霄：香港航空」

http://tungbama.blogspot.hk/2017/02/2016.html

2016東京+草津溫泉7日6夜聖誕卡通親子遊～「Day1 5之2：成田機場買「JR東京廣域周遊券」及乘坐成田N'EX到新宿」

http://tungbama.blogspot.hk/2017/02/201676day1-52jrnex.html

2016東京+草津溫泉7日6夜聖誕卡通親子遊～「Day1 5之3：新宿站6分鐘、交通便利、早餐非常豐富：新宿燦路都廣場大飯店」

http://tungbama.blogspot.hk/2017/02/201676day1-536.html

2016東京+草津溫泉7日6夜聖誕卡通親子遊～「Day1 5之4：新宿站先取未來兩天車票＞無添くら寿司@池袋＞歷史悠久的「上野動物園」」

http://tungbama.blogspot.hk/2017/02/201676day1-54.html

2016東京+草津溫泉7日6夜聖誕卡通親子遊～「Day1 5之5：暖暖聖誕牛角燒肉放題＞期間限定的溫馨浪漫燈飾＞日本剪髮初體驗」

http://tungbama.blogspot.hk/2017/02/201676day1-55.html

2016東京+草津溫泉7日6夜聖誕卡通親子遊～「Day2 3之1：出發去全日本排行第一溫泉～必食好味的火車弁當＞新宿到草津溫泉交通攻略」

http://tungbama.blogspot.hk/2017/03/201676day2-31.html

2016東京+草津溫泉7日6夜聖誕卡通親子遊～「Day2 3之2：全日本第一溫泉：「草津溫泉」+溫泉旅館 大阪屋（一泊兩食）」

http://tungbama.blogspot.hk/2017/03/201676day2-32.html

2016東京+草津溫泉7日6夜聖誕卡通親子遊～「Day2 3之3：吾妻燒肉＞草津溫泉傳統文化體驗：揉湯＞漫步草津溫泉街、光泉寺、美食」

http://tungbama.blogspot.hk/2017/03/201676day2-33.html

2016東京+草津溫泉7日6夜聖誕卡通親子遊～「Day3 2之1 溫泉旅館＞JR巴士到長野原草津口駅＞高崎駅＞輕井澤王子OUTLET」

http://tungbama.blogspot.hk/2017/03/201676day3-21-jroutlet.html

2016東京+草津溫泉7日6夜聖誕卡通親子遊～「Day3 2之2 輕井澤駅巧遇火車迷慕名弁當＞新宿晚餐：日本麥當勞＞宵夜：日本特色～屋台拉麵」

http://tungbama.blogspot.hk/2017/03/201676day3-22.html

2016東京+草津溫泉7日6夜聖誕卡通親子遊～「Day4 2之1：人人期望可達到～藤子·F·不二雄博物館(多啦A夢全面睇)」

http://tungbama.blogspot.hk/2017/03/201676day4-21fa.html

2016東京+草津溫泉7日6夜聖誕卡通親子遊～「Day4 2之2：日本平價門票專賣店-「大黑屋」介紹、為Ahiru No Pekkle而來，玩盡Sanrio Puroland+多摩市100yen店超好買+遇上地震經歷」

http://tungbama.blogspot.hk/2017/04/201676day4-22ahiru-no-pekklesanrio.html

2016東京+草津溫泉7日6夜聖誕卡通親子遊～「Day5：東京迪士尼樂園」

http://tungbama.blogspot.hk/2017/04/201676day5-21.html

2016東京+草津溫泉7日6夜聖誕卡通親子遊～「Day6：新宿站周邊散策-Yodobashi、和幸豬扒、博多天神拉麵、磯丸水產」

http://tungbama.blogspot.hk/2017/05/201676day6-yodobashi.html

2016東京+草津溫泉7日6夜聖誕卡通親子遊～「Day7：利木津巴士到東京成田機場」

http://tungbama.blogspot.hk/2017/05/201676day7.html