大家搭巴士或者揸車經過九龍城聯合道，有無留意係侯王古廟對面有一個公園既地方，旁邊有一排唔顯眼的舊石屋，究竟係咩東東嚟呢？
原來係政府「活化古蹟」政策下的一個項目：
九龍城「石屋家園」
石屋的歷史
講下少少故事先，呢一個位於路邊唔顯眼的舊石屋，原來係有一段珍貴的歷史：話說日治期間，日軍為擴建啟德機場而拆卸了多條九龍城的村落。其後，日軍在聯合道一帶的土地上興建平房以安置受影響的村民（根本不足以安置，用而家的角度就係一場公關Show）。戰後，大量內地移民移居香港，石屋附近一帶成為寮屋區，更開設了多間片場，包括世光片場、友僑片場及長城電影製片有限公司，製作不少以前電視台半夜先會播的粵語長片。
後來寮屋區在2001年全面清拆，僅遺下現存的石屋。
而家「石屋家園」由社區組織所營運，大致上可分為三部份：
1. 明陣花園
2. 文物探知中心
3. 石屋咖啡冰室
我地實地去同大家介紹一下，今次由豬小B做主角，出發！
明陣花園
（開放時間: 每日 6:30 – 22:00）
其實就係石屋家園屋外的一個公共空間，地面圖案以1964年航空照片的觀察作為設計藍本，地方大，啱哂小朋友行行走走，旁邊都有椅子供人休息。另外亦有一個類似廣場的設計，可以舉行活動。
在花園不同角落都擺放了不同的鐵牌，訴說著九龍城區多年來的發展。
有一部人力車可以拍照打卡，實物來的，而家香港已經見唔到可以載人行走的人力車了。
文物探知中心
（開放時間：週二至六上午10:00-下午5:30
週日中午12:00-下午5:30
逢週一及公眾假期休館）
機構將32號單位復修，石屋樓高兩層，用花崗石及混凝土築建而成，屋頂以中式筒瓦和板瓦鋪設而成，原有煙囪亦有保留。而家石屋一部份成為「文物探知中心」，另一部份為「咖啡冰室」。
文物探知中心有上下兩層，係完全開放比大家參觀，大家可以循樓梯上二樓，腳踏木結構樓板，另有一番滋味。
地下展廳介紹九龍城地區的產物為主題。昔日的九龍城一帶，因為近海，所以盛產「盬」，另外地區亦有不同的農業、漁業發展，一一介紹～
經樓梯可以上到二樓，上落時大家要小心梯級，小朋友要拖實大人啊！
二樓主要介紹石屋歷史、九龍城區的經歷變遷同昔日居民生活，有以前的日常生活用品擺設，一定會令大家有回憶，齊齊想當年！
入面仲有播放影片介紹九龍城區，等大家更加容易明白
石屋咖啡冰室
（營業時間：星期二至日 8:00 – 18:00 (逢週一休息)）
最後來到「石屋咖啡冰室」，我地來得太晚，接近關門時間，所以未能一嘗佢地的美食飲品。冰室的座位分室外同室內，各有各喜好！
冰室的正門
我地睇過meun，價格合理
室內佈置其實都好有心思，好似時光倒流，去返五六十年代咁，即係阿爸阿媽細個果陣呢～哈哈～
以前小朋友玩的三輪車，豬小B你係咪都想玩呢？
將以前的日常生活用品變咗做裝飾
仲有以前的廣告同宣傳衛生的海報，唔好話而家的小朋友，就連我都未見過，哈哈
（小心自己年齡秘密）
係冰室咖啡上方二樓，原來有個隱藏版的「小朋友冰室」，上落都係果句：「要小心呀」：上面有兒童圖書角同幾張卡位，如果幾個家庭一齊嚟就啱啱好，可以坐滿上層，小朋友可以「困」係度，大人可以放心用餐啦～
因為時間太晚，趕唔一切試唔到呢度的咖啡，都好呀，成為下一次再來的理由，支持一下呢間社企營運的冰室。
呢度仲有洗手間設施、導賞服務同桌遊服務。
導賞服務：導賞團時間 星期二至六，10:30 及 14:30，星期日 - 14:30 費用全免，最多25人，預約電話：23250111）
桌遊服務：提供超過100款桌上遊戲(Board games)任玩，不僅適合親子同樂，也是好友相聚的好去處，如果唔識玩，唔緊要，佢地有專人教你玩添架！
（服務時間：逢星期五至六，晚上18:30 – 22:00，收費每位$30 (大小同價)，12歲以下小朋友需由家長陪同，訂座電話：23250111）
大家來玩同參觀，記得留意時間，因為3個地方的開放同休息時間各有不同。~
馬路對面不遠處就係賈炳達道公園，有個大大的兒童遊樂場，大家仲可以順路行埋九龍寨城公園、九龍城廣場同探訪侯王古廟，如果沿聯合道北上，仲可以到達樂富中心添～
有用資料:
1. 石屋家園
地址：九龍城聯合道133號
電話：2325 0111
交通：九巴1, 10, 11D, 11K, 75X, 7B, 85, 85A, 85B, 113
