瞳遊樂 (八十後香港家庭的親子旅遊blog)

2024年2月23日星期五

【親子10日9夜自駕之旅～日本東京、靜岡小丸子、富士山、渥美半島、鳥羽、大阪】Day 5 :飼養種類約1200種，日本第一：鳥羽水族館＞麥當勞+鳥羽市內(3之2)

今個旅程，我地去完富士動物園睇陸上動物，之後就輪到鳥羽水族館睇海洋動物啦！

位於鳥羽的鳥羽水族館，飼養種類約1200種，號稱「日本第一」！亦都係亞洲唯一能見到儒艮的水族館。

我地從伊勢灣汽車渡輪一落船，碼頭旁邊正正就係鳥羽水族館，接住跟從工作人員指示，我地駛上停車場，停車費每日800 yen。

泊好車，就行去水族館入口啦，入場費如下：

成年人 2,800日元

兒童 (6-15歲) 1,600日元

幼兒 (3-5歲) 800日元

嬰幼兒 (0-2歲) 免費

全個水族館好大好大，一共有3層，分「室內」同「室外」，不過為左令參觀者容易分別，佢劃出12個區域，展示不同的生物，由英文字「A」到「L」：

A 表演場地

B 海獣の王国

C 古代の海

D 珊瑚礁

E 伊勢志摩海/ 日本海

F 叢林世界

G 神奇森林

H 儒艮

I 極地海

J 日本河

K奇異生物研究所

L 水廊（Aqua Promenade）

水族館每個角落，有哂電子顯示版，可以知道實時邊一個區有表演活動，好方便！我地就立即去親親海象時間，嘩！好多人已經坐係度等，雖然場地有天幕，我記得果日係非常非常之熱，我地睇左一陣，趁早走左去睇其他動物，避開散場人群。

旁邊都有好多動物睇架！

日本水族館或者動物園都好，都可以讓小朋友觸摸下動物，體驗不一樣，呢度係魔鬼魚同鯊魚。

配合夏天，水族館都好又心整個夏祭，加埋遊戲成分入去。

到淡水區的佈置，好有心思

小朋友可以再一次伸手去摸魚，今次係類似「溫泉魚」的魚子，會啄下啄下手，幾得意咁。

之後再返入去睇下水族館個大水族箱啦！

少不免行下紀念品店，祈祈就買左鯊魚機械人。我地又買咗幾件ｔｅｅ，水族館都可以令人人都滿載而歸。

總括而言，安排半天行水族館(約2-3小時)就可以，可以親親小動物既地方可以留耐D。夏天去，佢8成地方都係有冷氣，但都非常之弱同埋人多，所以自已要準備好風扇仔。

離開水族館，就去食醫肚，果時差唔多點零兩點，又未夠二點到旅館check in，於是就去日本名物「麥當勞」，呢度唔駛多介紹，日本麥當勞幾乎香港!人都會去食，尤其果一後時間有新品，都會貪得意試下，最重要佢大部份野食都好食。

我地就再極致D，鐘意搵有「兒童樂園」既麥當勞，俾兩個小朋友又玩下，唔比佢地停。

有用資料:

1. 鳥羽水族館

營業時間：09:00～17:00

（＊7/20～8/31 08:30～17:30）閉館前1小時將停止入場・終年無休

地址：三重縣鳥羽市鳥羽3-3-6 517-8517

電話：+81-599-25-2555

網頁：https://aquarium.co.jp/tc/

參考資料：

【親子10日9夜自駕之旅～日本東京、靜岡小丸子、富士山、渥美半島、鳥羽、大阪】準備及介紹篇

Day 1：香港國際機場＞東京成田機場＞成田特快「N'EX」+東海道新幹線品川去靜岡 (3之1)

Day 1：靜岡車駅零距離靜岡ASSOCIA飯店 (3之2)

Day 1：靜岡市內閒逛+魂心家拉麵 (3之3)

Day 2 : 靜岡鐵道「新靜岡到新清水」＞S-PULSE DREAM PLAZA櫻桃小丸子樂園 (3之1)

Day 2 :清水魚市場河岸の市 (3之2)

Day 2 :尋找櫻桃小丸子卡通真實場景 (3之3)

Day 3 :TOYOTA Rent a Car自駕租車，隨意自駕路邊UNIQLO+GU+無添壽司 (2之1)

Day 3 :富士河口湖水之里湖畔酒店一泊兩食 (2之2)

Day 4 :可以揸車入去睇動物：富士野生動物園Fuji Safari Park＋渥美半島遊 (2之1)

Day 4 :日本人渡假酒店體驗：伊良湖海濱渡假酒店(Irago Ocean Resort)一泊兩食(2之2)

Day 5 : 伊勢湾渡輪 (伊良湖去鳥羽) (3之1)

Day 5 :飼養種類約1200種，日本第一：鳥羽水族館＞麥當勞+鳥羽市內(3之2)

Day 5 : 新八屋溫泉旅館及晚餐 (3之3)

Day 6 : 相差海女小屋BBQ午餐體驗 (2之1)

Day 6 : 大阪天下茶屋小百合民宿(卡通片一樣的家)+商店街掃街 (2之2)

Day 7：三井LaLaport 堺 STUDIO ARC 影家庭照 (2之1)

Day 7：忍者堂忍者體驗 + 燒肉特急 (2之2)

Day 8 : Star Gate Hotel Kansai Airport (2之1)

Day 8 : Budget租車+Mega Donki+焼肉きんぐ+泉佐野漫遊 (2之2)

Day 9 : 大阪府立大型兒童館BigBang ，全天候室內遊樂設施 (2之1)

Day 9 : 浜寺公園，超好玩室外兒童遊樂場 (2之2)

Day 10 : 臨空城Outlet (1之1) ＞大阪關西機場 > 香港

2024年1月22日星期一

【親子10日9夜自駕之旅～日本東京、靜岡小丸子、富士山、渥美半島、鳥羽、大阪】Day 5 :伊勢灣汽車渡輪 :由伊勢灣去鳥羽(3之1)

香港交通發達，已經有多條海底隧道，汽車渡輪係香港變得式微，不過係島國日本，汽車渡輪仍然係佔重要席位，連繫島與島之間。

前面我地講到，本來離開富士山之後，可以循大路經名古屋落去鳥羽水族館，不過發現行大圈，反而渥美半島的盡頭，有汽車渡輪(伊勢灣郵輪)直接過對面岸的鳥羽，而鳥羽水族館更加正正係碼頭旁邊，所以今次決定在伊良湖岬過一晚夜。

今次，我地係「連人帶車」由伊勢灣去鳥羽，航程大約55分鐘。

其實在酒店入住之前，我都有詢問一下前台，要唔要預早預約，回覆得知:「唔需要，直接到碼頭就可以」，酒店Check out 時間一般10:00，我地想搭的航班係10:40，由伊良湖海濱渡假酒店到碼頭只需要5分鐘，所以時間係十分充裕。我地當然不敢怠慢，怕誤了船期，於是吃過早餐，就快快上車出發到碼頭。

呢度就一步一步教大家點搭汽車渡輪啦!

1. 由酒店出發，5分鐘後真係到達碼頭，然後就見指示入車場，好快就見到工作人員,佢會安排你泊車的位置，停好車

2. 然後我係駕駛者，我落車走到旁邊的一個建築物，入面係售票處買船票 (我自已會幫架車影張相，方便同售票職員溝通)，留返老婆同小朋!係車度等一等

3. 到售票處，要講明有汽車乘搭，同時我又比架車張相佢睇，因為佢係根據車的大小而決定價錢，記住：汽車票已經包埋駕駛者，所以我地一家四口，只係買汽車票(7,600 yen) x1、大人票(1,800 yen) x1、小學生票(900 yen) x1 (祈祈仲係幼稚園生，未係小學生，所以不收費)

收費表連結

4. 返回車上，之後就等工作人員安排上船，一架跟住一架。

5. 指示停好位置，拉好手掣，拎埋個人物品就可以上去客艙坐啦，其他就交由工作人員做就可以了。

船分三層，最底一層全部係車輛專用，二、三樓都係客艙

客艙全室內，有冷氣，仲有「4人用面對面位」，一家人就啱啱好。船上亦有小賣部，有咖啡、紅茶、罐裝啤酒、酒等飲品，又有販售原創紀念品、伊勢烏龍麵、餅乾等。

在二樓客艙之上仲有一層，是為「特別室」，有榻榻米的房間，不過每人要額外再加400 yen/人。

呢一小時的船程，休息下，睇下風景，好快就到，而且因為算係「內灣」，所以船十分之平穩，無大浪同唔舒服。

之後差唔多到鳥羽，準備落船，見人行我地又行，開始可以落返最底一層拎車，船停好，再跟據工作人員指示，一架跟住一架落船，過程好順利！

甫落船，就見到我地下一個景點：鳥羽水族館。