瞳遊樂 (八十後香港家庭的親子旅遊blog): 9月 2017

呢個暑假，繼續因為瞳瞳媽媽懷有小B，所以我地一家的活動都留在香港。其實在8月頭，我地瞳瞳一家都去左位於西貢北潭涌麥理浩夫人度假村玩左3日2夜。起初我地覺得呢個諗法好old school，度假營對我地嚟講只係學生時代先會去，基本上再大個d考公開試、大專、大學，都已經投入離島度假屋的懷抱、甚至乎近近地去台灣、泰國旅行。

點知瞳瞳媽媽都話好想去呢D度假營玩下，因為入面有活動比瞳瞳參加，於是我地就申請啦，順便同大家「集體回憶」一下～XP

香港政府的康樂及文化事務署（以下簡稱：康文署），一共管理有4個營地：
1. 西貢北潭涌的麥理浩夫人度假村　　＜－今次我地入住的
2. 港島東區的鯉魚門公園度假營
3. 荃灣荃錦公路旁的曹公潭戶外康樂中心
4. 西貢戶外康樂中心

比個貼士各位爸爸媽媽，如果帶小朋友的話，瞳瞳爸爸建議大家揀「麥理浩夫人度假村」或者「鯉魚門公園度假營」，因為呢兩個營地有獨立浴室，即係浴室在營舍入面，一家大細會比較方便！另外3、4兩個營地只有公共浴室。

營期

book營要知道有無營期，可以去呢個網頁參考：http://www.lcsd.gov.hk/tc/camp/p_lmhv.php
程序好簡單，step by step 就可以book營，如有任何問題，可以直接打電話心水的營舍查詢，因為4個度假營的方法係會有少少唔同。

收費 & 膳食

至於收費方面，就真係唔貴啦！以我地今次麥理浩夫人度假村為例，我地8月平日宿營營費分別$57(14-59歲人士)同$28.5(3-13及60歲以上)；另外仲有膳食費，一般在出發前一星期，就可以打電話去返營舍的canteen安排架啦！四個地方的價錢都唔同，我地canteen飯就$30.5一個人，BBQ包就$40.5一個人，大小同價。下文我地會揭秘營內的每一餐 XP

出發

大家可以到西貢巴士總站，搭九巴94巴士(往黃石碼頭方向)，在「麥理浩夫人度假村站」下車，再步行約 15 分鐘前往度假村，但會比較辛苦，因為營地大門同巴士站有一段距離(仲要係一段長命斜，汗！)。

另一個方法係坐綠色專線小巴9號，總站就係麥理浩夫人度假村(閘內)，每半小時一班，服務時間為早上6時15分至晚上9時15分，小巴好處係直接到入到去營地大閘入面，唔駛行咁遠。

綠色專線小巴 9 號，麥理浩夫人度假村(閘內)總站

最後一個方法，仲要係唔駛錢既，就係度假村安排免費巴士，由下午1時30分或2時40分於西貢鄧肇堅運動場旅遊巴士停車場接載營友入營，但要預先致電度假村留位，座位有限呀！

度假村安排免費巴士

今次我地再另一個方法：瞳瞳媽媽挺住大肚子，所以我地向度假村申請車位。不過車位非常有限，如果無特別原因，營地不會接受申請，除了車位，因為度假村位於西貢北潭路內，還要向度假村一併申請「禁區紙」，車子才可以駛入。

好啦，當日個流程係點呢？我地早幾個星期已經向營地申請車位並獲接納，於是拎住信件，先去禁區外的「西貢戶外康樂中心」辦公室拎禁區紙，然後再去麥理浩夫人度假村。經過北潭涌閘口果陣比守閘員睇一睇就可以直入啦！

先去禁區外的西貢戶外康樂中心辦公室拎禁區紙

禁區紙

經過北潭涌閘口果陣比守閘員睇一睇

到達麥理浩夫人度假村

先講下麥理浩夫人度假村個環境先，佢建於一個山頭上面，係以前起萬宜水庫時候的人員宿舍，後來就闢為麥理浩夫人度假村。佢既主要設施有：游泳池、健體站、射箭場、歷奇挑戰站、繩網陣、觀星台、運動攀登牆、禮堂、籃球練習場、活動室、網球場、康樂室、多用途球場、閱讀室、羽毛球場、卡拉OK室、壁球場、兒童遊樂場、乒乓球室、室內兒童遊戲室、小型高爾夫球場、電視遊戲室、自行車場、手工藝室、卵石路步行徑、桌球室、植物研習徑、電視室、雀鳥徑、餐廳、蝴蝶徑及燒烤場。

我地先泊架車係營地辦事處外的停車場，泊好之後就唔可以再開動，仲要將禁區紙還返去辦事處。至於報到的地方，就係辦事處旁邊的Canteen(餐廳)，之後我地既一日三餐都靠哂佢！

我地向職員報到左之後，就係canteen一角坐低，聽一聽個briefing，所謂的briefing，就係睇住大電視播的DVD，DVD講哂所有注意事項之後，就派鎖匙了。提一提大家，canteen同時亦係小賣部的地方，如果訂左飯或者燒烤包的朋友，記得都係嚟呢度俾錢。小食部除左食物，連個人沐浴用品、清潔用品、玩具都有得賣。

小食部，咩都有得賣

營舍多面睇

我地獲派左9號營舍，9號營舍在山頂位置，算係成個度假村最高的幾間屋之一，今次真係辛苦老婆，要行上去咁辛苦，我地無諗過派到咁高的地方，所以除了去canteen食飯之外，其餘活動主要都係由我負責帶瞳瞳去玩，瞳瞳媽媽唔駛走上走落，安在「營」中！

大家係咪都好緊張間房呢？其實就普普通通，夏天冷氣供應只由下午4時至翌日早上8時。唔駛睇啦，完全無得改時間，set哂時間掣！　T____T

另外房間入面係無電視、無雪櫃，汽水、雪糕、要冷藏的食物，大家都唔好帶嚟啦！

走上長長的樓梯

呢間就係我地住的9號屋啦！小平房的外貌，不過就真係度假村的山頂位置。

營舍外面都幾靚架！

一入去，就係簡單的客廳，客廳有風扇。

我地三個人，就有三張單人床，同埋全屋就只有睡房有冷氣。

有水杯、仲有熱水壺俾大家煲水飲。

廁所＋浴室，呢度既熱水爐就24小時都有冷熱水供應。

安頓好之後，我地準備去玩啦！營地會在拎key的時候，仲會派埋一D活動的booking紙，上面已經有哂時間，按住紙上的日期同時間就可以去玩，如果有人玩緊，職員會安排比你玩先，細細張，小心唔見～

簡單講下成個營地地理位置：我地住的9號營舍，係營地最高的位置；中間就係營地辦公室；最低位置就係泳池、文娛室，大致上就係咁！開始出發！！！！！！！！

之前咪講話我地9號營舍係最高點，佢地有個同太空館合作既觀星台，不過只限秋冬期間開放，有興趣的家庭不妨留意下！

自行車場：有電動車比小朋友玩下，有身高限制，瞳瞳剛剛好！

手工藝室：分有不同時段開班，參加前留意時間，我地今次就教做書籤，時間好充裕，材料比足你，有導師講解，之後就自己「開工」，呢個地方勝在係炎夏日子，有冷氣嘆，過冷河～正！

我地既書籤作品

文娛室就係最低位置，呢度真係要介紹一下，有一個佔地幾大的「兒童遊戲室」，好啱年紀細的小朋友玩，估唔到荒山野嶺的營地會有一個佈置咁靚的遊戲室～

之後又有得任玩平時要比錢先可以玩到既氣墊球，過足哂癮，玩到傻哂！

旁邊的房間係閱讀區，除左有報紙雜誌睇之外，仲係可以玩棋的地方。又比個貼士大家，呢度有部份智力遊戲、玩具或者棋類係可以比大家借返營舍玩，只限一晚。在第二天早上就要交還返了。

原來點心麻雀好好玩～

我地之前有介紹過有在拎key的時候，派埋一D活動的booking紙，我地就跟個時間去TV Game Room打機，PS3之類的舊遊戲，唔緊要啦！呢度不能要求太多～　=)

文娛館對面就係「康樂館」，入面主要有康樂棋、乒乓球、卡拉OK室同泳池。

時代真係變左，而家好少人識打康樂棋，我諗瞳瞳呢一的小朋友無邊個識玩。

好似好識打咁喎

卡拉OK好犀利啊，我地唱大場，哈，真係有點尷尬！基本歌都有既，瞳瞳唱＜ABC Song＞，我就唱Eason既＜明年今日＞。

ABCDEFG.............

泳池就一眼望哂，旁邊仲有一個小小的兒童池，去之前可以在營地辦事處留意開放時間，天氣惡劣會隨時停開，我果日就係同瞳瞳等到無雷暴警告至可以入場！又有貼士：入面有更衣室設備，可能因為一樣由康文署管理，同平時公眾泳池都係用一個$5銀鎖Locker。我地係度游水都玩左兩個幾鐘！

我地都係為左個泳池咋！

最後介紹大家最關心的膳食啦！我地一日三餐都係靠一個canteen(營地辦事處旁)，就連BBQ既燒烤包都要去呢度拎左先。先講BBQ，佢地燒烤食物、工具、炭、碗、碟、手套咩都齊哂，所以唔需要準備任何野就可以燒烤。拎齊架生，要行一段大約6-8分鐘的路到燒烤場，之後就可以起爐燒野食，但要留意，佢起爐的物料係一條浸過助燃液體的布條，唔係我地平時的炭精，所以記得在Canteen請教一下果度的姐姐，一定要用佢教的方法先容易著火。燒烤食物味道不錯，奄得幾好味！燒烤包的內容在入營前會有餐單比你揀。