【香港本地親子遊】【沙田中文大學】 中文大學都有得玩？精選校園內八大親子景點、餐廳!

瞳瞳一家住係馬鞍山，隔住城門河／沙田海既對面就係中文大學啦！中文大學係大學學府喎，究竟有咩玩架？其實中大入面有好多地方，正正我地平常人少去，所以好有新鮮感，地方又大，而且入面的食店、canteen都好高質素，最啱星期六、日，唔想出街同人迫，静静地享下家庭樂的你啦！

（謎之聲：去多d中大，希望瞳瞳吸收多d天地靈氣，讀書精叻d）

我地成日過嚟，精選左中大八大景點介紹比大家，有玩、有餐廳、有靚景，大家可以玩足全日，或者分開幾次嚟玩都得！

１. 未圓湖　～　四時之景不同，賞花賞魚一流

由大學港鐵站中文大學出口一出去，就見到呢個「未圓湖」。湖取名「未圓」，顧名思義，
湖形狀不規則而帶若干彎角。「未圓」隱指世事難常圓滿，永遠無法達到盡善盡美的境界。因此大家更應當努力不懈，對完美心嚮往之，力臻至善。

湖畔有杉樹，是香港另一個隱秘欣賞「紅葉」的好地方，唔駛山長水遠去到元朗大棠，大家只要搭港鐵到大學站再行5分鐘就到啦！湖入面有好多魚類，特別係錦鯉，仲有龜類，樹上面亦棲息了不少雀鳥。有時會見到有人餵魚，在拋落湖的一刻，有雀鳥飛過把食物「截糊」的奇境。（未圓湖本身嚴禁餵食動物）

２　賽馬會氣候變化博物館　～　了解世界氣候變化

開放時間：

星期一、二、四至六：上午9時30分至下午5時

星期三、星期日，公眾假期及大學假期(12月24及31日，及農曆除夕)：休館

網址：http://www.gaia.cuhk.edu.hk/index.php/zh-tw/mocc

博物館位於中文大學康本國際學術園八樓，就在未圓湖旁邊　或　由大學港鐵站D出口前往，就會見到！非常方便！「賽馬會氣候變化博物館」是香港第一所以氣候變化為主題的博物館，向公眾提供有關氣候變化的展品和資訊。其中一個環節係了解雪龍號的工作，好有動感，當你睇緊投影片的同時，四周會有風吹出黎，營造去到極地的感覺。展館地方唔大，圍繞一圈約30-40分鐘時間就可以行哂。

認住呢隻北極熊，佢就係入口啦

由探險家李樂詩博士捐贈的一面曾經到過北極的考察隊旗幟

看來要作出承諾了....

３　中文大學隱世酒樓　～　抵食好味

餐廳：范克廉樓教職員餐廳 

地址：范克廉樓地下

營業時間：上午11:00至下午3:00，下午5:00至下午9:00（星期一至五、日）

行左咁耐，繼續往山上走，又係時間食野啦！帶大家去食好野！呢間酒樓好神秘架，唔係叫「ＸＸ酒樓」，如果要講個名，佢就係叫「范克廉樓教職員餐廳」，雖然係職員餐廳，但都接受非職員光顧。入到去同平時酒樓一樣，用點心紙劃點心，因為佢係大學入面的酒樓，比外間的價格為低，而且又大碟，好抵食架！

「范克廉樓」可以話係「中大」呢個社區既「市中心」，酒樓旁邊有學生CANTEEN，食物種類多，而且都係好抵食，出名的「頹飯」（火腿香腸豬扒飯）就係呢度啦～

同一幢大樓入面仲有恆生銀行、百佳超級市場、髮型屋都有添，係學生日常生活的「市中心」。

４　中文大學圖書館

中文大學圖書館大學展覽廳

開放時間：

星期一、二、四、五、六：上午十時至下午五時

（星期三、日及公眾假期休館）

網址：http://www.cuhk.edu.hk/ugallery/tc/index.html

中文大學文物館

開放時間：

星期一、二、三、五、六：上午十時至下午五時

星期日及公眾假期：下午一時至下午五時

（星期四休館）

網址：http://www.cuhk.edu.hk/ics/amm/index_c.htm

呢度相信大家在電視上都見得多啦，一有關於中大的新聞都會過一過鏡，其實呢度係中文大學主圖書館，前面的雕塑大家要留意啊，大學生之間流傳：如果貪得意捐左過去，就會考試不及格而不能畢業啊～

雖然大學圖書館我地唔入得（只限學生），但佢入面有個叫「大學展覽廳」，係可以比大家去參觀既。大學展覽廳展出數百珍貴的歷史照片、文物及多媒體資源，讓大家認識中大過去半世紀的發展歷程。

大學圖書館右手邊係文物館，不時有主題展覽，有興趣的朋友亦都可以進內參觀，免費入場。

中文大學由崇基學院、新亞書院、聯合書院、逸夫書院、晨興書院、善衡書院、敬文書院、伍宜孫書院及和聲書院所組成。

文物館入口

５　天人合一亭　～　領略海連天的感受

努力行上去新亞書院，就會到達天人合一亭，新亞書院算係中文大學呢個山頭最高的地方，所以景色亦最開揚廣闊。天人合一亭為紀念新亞書院創辦人錢穆先生及其所著的〈天人合一論〉。天人合一說是儒家學說的核心觀念，意謂人道、天道是相通不隔的。亭前水池更可營造水天一色的效果，發揚天人合一的意念。

要影到好的構圖，就要看你的拍攝功力了！

６　思源廣場

呢度屬於聯合書院，同新亞書院都係同一個山頭，5-10分鐘就行到啦！呢度勝在有一塊大平地，可以比我地同小朋友踩單車、吹泡泡同玩Ｄ簡單的球類遊戲，每逢假日都有好多小朋友嚟玩，估計佢地係教職員的親屬。隔離建築物入面有洗手間同Canteen(星期日休息)，方便補給！

　

７　和聲書院　～　中大的美食天堂

嚟到大學校園，又點可以少左食Canteen既機會呢？和聲書院有好多不同的美食比你揀，絕對唔係普普通通的Canteen！今次我地逐一介紹：Cafe TOLO、WS Pavilion、綠茵廊及滬軒。

Cafe TOLO

營業時間: 

早上11:00 至 晚上10:00

(最遲點餐時間: 咖啡和窩夫 - 晚上9:30 ; 其他 - 晚上9:45)

和聲書院入口處行出平台，就會見到Cafe TOLO，主打甜品同雪糕，雪糕係用上牌子Movenpick，大約$12/球，三球仲會平D架！其他甜品例如雪糕火鍋、心太軟、窩夫都幾值得試下！價錢仲要唔貴呢！店外平台有露天位置，整個吐露港盡收眼底，感覺舒服。

和聲書院WS Pavilion

營業時間: 

星期一至星期五 | 早上7:30 至 晚上9:30 (最遲點餐時間:晚上9:00) 

星期六, 日及公眾假期 | 早上9:00 至 晚上9:30 (最遲點餐時間:晚上9:00) 

行落下一層，就到canteen啦！樓底極高，落地大玻璃，地方非常寬敞。唔好以為學生canteen無咩好野食，而家絕對唔簡單，食物好多元化，呢度除左一般快餐，仲有pizza、熱狗，係即場手工即製，有時仲有烤豬手之類，價格亦都好相宜，風景又好，值得一試。

和聲書院綠茵廊

營業時間: 

早上11:00 至 晚上9:00 (最遲點餐時間:晚上8:30) 

今年先新開的綠茵廊，入面就主打咖啡、沙律、意粉等等，而且佢有得high tea，我地呢份high tea都只係$128/兩位，有cake、有tart、有沙律，擺設又精美，估唔到在大學都可以平平地high tea。

和聲滬軒

營業時間: 

午市 | 上午11:30 至 下午2:30 (最遲點餐時間:下午2:00)

晚市 | 下午5:30 至 下午9:30 (最遲點餐時間:晚上9:00)

顧名思義，呢度係食上海菜！係呀！你無睇錯呀！大學有上海菜食，而且好好味好抵食添，已經成為我地一家的至愛。佢係canteen的另一端，好似酒樓咁既格局，要等職員帶位入座。呢度出名「煙燻蛋」、「擔擔麵」，其他上海小菜都好好食，無平時的上海菜咁多油，抵讚。

８　宿舍遊樂場

校園仲有一部份係教職員宿舍，宿舍附近都附設有兒童遊樂設施，四散在每一處，所以大家落足眼力，要好似尋寶咁搵！不過因為有d設施已經好耐無人玩，玩之前爸爸媽媽最好先睇下有無乾淨先好玩。

有用資料: 

1. 中文大學

交通：港鐵大學站「香港中文大學」出口前往

網頁：http://www.cuhk.edu.hk/chinese/index.html

自駕：＄２０／小時

注意事項：

1. 大學地方有部份設施，如教室、宿舍等，屬私人地方，請勿打擾及亂闖。

2. 各餐廳會因應學校假期或活動而營業時間有更改。

3. 始終係山頭，做足防蛟措施。