【台灣、高雄】[高雄酒店推介]帶住一個月大 「小B」去旅行、力推friendly的親子酒店 - 秝芯旅店駁二館

帶住一個月大 「小B」去旅行，今次要介紹下我地高雄住的酒店 - 秝芯旅店駁二館～

大家幾開心

本身秝芯旅店在高雄六合夜市附近首先起家，當時＜瞳遊樂＞都激讚：原文http://tungbama.blogspot.hk/2016/06/friendly.html

最近，秝芯旅店在高雄鹽埕埔／駁二區，開多一間分店，如果秝芯旅店六合本館係一間親子酒店，咁秝芯旅店駁二館就係升級加強版的親子酒店，勁！

有幾勁？等我地帶大家去睇下啦！

先講下駁二館個位置，駁二館近高雄捷運的鹽埕埔站，附近有D咩呢？如果係香港人既慨念，就係駁二藝術區呀、西子灣呀、搭船去旗津島的碼頭、婆婆冰呀果度附近啦！不過酒店就近「鹽埕埔站」，出口行去大約5-6分鐘，如果由高雄機場出發坐捷運，搭到「美麗島站」轉線去「鹽埕埔站」就可以，車程大約20-25分鐘。

酒店附近一帶都係老店為主，遊客唔多，至少唔係人山人海，有點似我地九龍城、深水埗一帶舊區咁，但美食絕對唔需要擔心，反而有好多古早味的餐廳，價錢又平又好味，真係另一個體驗！

至於你問有無附近夜市？夜市就係無啦！最近要坐返兩個站捷運去美麗島六合夜市。不過酒店旁邊行過幾步就有間7-11係度，飲既食既完全無問題。

一步入大堂，就見到好靚的卡通裝潢，仲有幾張好有童話feel既擺設同椅子俾大家影下相，小朋友見到一定好開心！秝芯旅店為全店禁煙，全部都係non-smoking room，所以大家住得放心，一定唔會嗅到煙味！

走廊、入電梯，都全部卡通化，就好似進入童話世界一樣～可見呢間酒店處處用心！

秝芯旅店駁二館提供不同的房間種類，今次我地住的係「豪華主題房」，為的就是南瓜馬車床，嘩！瞳瞳見到就好興奮！即刻撲上床！我地原本以為南瓜馬車床係好細的一張床，但原來一個大人都可以瞓得落，直頭係一張單人床咁，所以我地呢間房連埋兩張雙人床，係可以供5人家庭入住！

房間內亦有好靚的卡通裝飾。童話般的房間，瞳瞳夢寐以求的南瓜馬車床，終於實現了。

大家幾開心

小B第一次外遊了

房間設施一如既往的好，提供免費泡麵及汽水，方便大家足不出戶就可以在房間照顧小朋友。「豪華主題房」的洗手間有淋浴及浴缸兩種一併供應，因為小B太細個，旅館額外安排浴盆及水兜，方便同小B沖涼。其他如衛生浴備品、牙膏牙刷、50”液晶電視、免費wifi、小冰箱、熱水壺、風筒等都有提供。

早餐就每日0700-1000供應，位於酒店8樓，亦係最高的一層，餐廳地方好大，亦因為於高處，可以望到少少駁二碼頭區(海)。食物種類都多，西式如多士、炒蛋、火腿、香腸、咖啡等，台式如魯肉飯、粥都有，另外有炒麵、炒菜、果汁、沙律、生果等都有！

至於酒店的其他設施，主要在B1地庫層，在地下接待處旁邊的樓梯就可以到達。下面有洗衣房、電腦、遊戲機咁。

酒店有部XBOX360遊戲機免費任玩，旁邊仲有個飛鏢機，安全起見，飛鏢需要向前台工作人員取。

洗衣房洗衣係免費，仲提供埋洗衣粉，但乾衣就要收費，TWD $50/40分鐘，係夏天旅行的好幫手，唔駛帶太多衣服。

酒店仲可以有單車租賃，比你可以踏住單車暢遊西子灣、駁二區，亦有免費車接送到六合夜市、中央公園捷運站，但需向前台工作人員查詢時間及預約。

今次我地住的係「豪華主題房」(有南瓜馬車)，其實秝芯旅店駁二館，仲有好多唔同類型的房間，有適合一個人背包客的背包客房(床位)，分男女；又或者獨立的單人房，適合不同家庭的 「豪華主題房」、「三人房」、「創意四人房」、「創意雙床房」、「經濟雙床房 - 無窗」、「創意特大床房」及「創意雙人房」，包羅萬有，選擇甚多，總有一間適合你。

如果係一家大細嚟台灣玩，必定推介大家要住呢之度！

有用資料: 

1. 秝芯旅店駁二館

網頁：http://p2.legendhotel.com.tw

地址：台灣高雄市鹽埕區五福四路67號
電話：886-7-5219666

【台灣、高雄】帶住一個多月大 「小B」去旅行 － 高雄之旅

係，我自己都估唔到，我終於帶小B去旅行，正確嚟講，我係帶一個58日、未夠兩個月大的初生BB仔去旅行。

回想返起，自從年頭知道有小B呢位新成員，瞳瞳一家就一直「日以繼夜、夜以繼日」等待小B出世，在每年我地最想去旅行的時間 - 暑假，小B在瞳瞳媽媽肚內剛好6-7個月大，不適合搭飛機遠行。

今年十月的中秋節，小B出世了，因為太太是剖腹生產，所以夾到有差不多十星期的產假，前一個月的四個星期已經日日湊家姐升小一同湊小B已經好辛苦，於是決定來個旅行.........

網上面有很多不同的意見，當然大部份的意見都不贊成，始終小B確係太細個了。


最後，我地決定左出發，貪玩大過天，不過其實準備得好，一樣無問題，例如以台灣來說，有好多媽媽都係「生產地」生完之後，待BB滿月就會帶佢地返台灣(或者美國)，所以十幾個小時飛機都無問題，我地去高雄約一小時飛機，大慨就係新界出九龍既巴士車程，所以好有信心搞得掂！



訂機票：

我地係中華航空（China Airlines）官網訂票，一共2位大人+1位小孩+1位嬰兒，在航空公司來說，小孩係指2-11歲小朋友，嬰兒就係指0-23個月大BB仔，不過就算你網上訂好機票，瞳瞳爸爸都建議大家打去航空公司的客戶熱線，再提一下自己有一位嬰兒上機，原來飛機上有部份位置不適合帶嬰兒坐的，所以當我向航空公司職員提及時，她就很細心提出意見，並問要不要嬰兒籃，又安排我們來回程坐最前排，所以有任何Request一定要向航空公司職員提出，讓人家好安排。

So far 小b好乖，行程內沒有感到不適，不過都有小貼士俾大家，就係搭飛機時間盡量配合bb睡覺時間，小B一直就處於睡覺狀態，沒有打擾其他乘客。

嬰兒車 vs 嬰兒揹帶

小B連兩個月大都未夠，五十幾日大啦，所以真係細細件，我用揹帶揹佢絕對無問題，在台灣，如果要行購物中心，好似今次去既「大魯閣草衙道」咁，佢地都會有嬰兒車借，而且幾企理、乾淨，好多台灣媽媽都係咁架！

尿片

台灣的育嬰室設施同配套都好齊全，有尿片、濕紙巾、冷熱水等等，相比之下香港真係落後。當然，我地都會自備啦！尿片勝在係消耗品，只會越用越少、越來越輕。

奶

呢樣真係無得講，因為小B有最天然的母乳，所以佢有瞳瞳媽媽就有野食。當然，我地都有帶埋奶粉去，不過係輔助多，帶一兩個奶樽就可以。

其他如濕紙巾、衣服等，就同平時在家落樓下出街就好了！行程輕輕鬆鬆，找一間好酒店，舒服、企理，作為一個休息基地，如果你預備好，高雄之旅就出發啦！

行程

帶住一個多月大 「小B」去旅行、四天行程大公開：

Day1　香港＞高雄＞秝芯旅店駁二館

Day2　酒店早餐＞大魯閣草衙道購物中心＋lunch＞鹽埕區街頭小吃dinner（雙妃奶茶、蘇記小籠包、阿梅排骨飯、大智羊肉、buono pops冰淇淋）＞酒店

Day3　酒店早餐＞鹽埕區閒逛＞港園牛肉麵lunch＞轉酒店秝芯旅店六合館＞逐鹿炭火燒肉＞三多商圈閒逛＞酒店

Day4　酒店＞機場＞香港





我地帶住一個月大的小B，考慮到行程，所以唔會多，輕鬆為主，今次行程最主要去「大魯閣草衙道,大魯閣草衙道購物中心,大魯閣草衙道國際主題樂園」，呢個地方係2016年新開幕的，真係夠哂玩大半天！其他的都係酒店附近行下(鹽埕區)，原來駁二區仲有好多台灣人口中叫「古早味」的老店，如果換我地廣東話就係類似「懷舊、舊味道」的意思，如果你要我去形容駁二區，佢比較似香港深水埗或者九龍城，都係好地道、生活社區、遊客唔多，非常高雄！

2017「又一城‧快樂聖誕」全港最高室內聖誕樹，過一個醉人嘅法式聖誕～(活動已完結)

每年九龍塘又一城都會係商場入面好好裝飾一番，而商場的聖誕樹更加係打卡必到「景點」！

首先多謝又一城的邀請，今次仲係小B第一次出席活動添，有聖誕樹同聖誕老人，我地仲可以優先入去佢地既靚靚裝飾睇下先，夠哂開心！


全港最高室內聖誕樹

今個聖誕，又一城特別呈獻「又一城‧快樂聖誕」，由即日起至2018年1月1日期間，以參照巴黎艾菲爾鐵塔嘅建築特色打造全港最高室內聖誕樹（21米高），締造最具法國情調嘅浪漫聖誕！聖誕樹聳立於中庭，配合閃爍耀目的華麗燈光效果，綴以獨特的法式香水瓶造型的聖誕樹吊飾；聖誕樹的頂部更參照艾菲爾鐵塔的燈箱設計，聖誕樹下更設有情人橋場景，令您尤如置身於巴黎塞納河上。

參照巴黎艾菲爾鐵塔嘅建築特色打造全港最高室內聖誕樹

我地活動當日，DIY聖誕卡

「親親聖誕老人」 以愛支持「高錕慈善基金」 

聖誕老人約定大家於又一城見面！大家只需捐獻港幣80元，即可到 「聖誕老人法式小屋」與聖誕老人合照，更可獲贈充滿法式風情的限量版相架乙個。所有款項將全數撥捐至「高錕慈善基金」為腦退化症病患者、家屬及照顧者提供協助。

此外，由2017年12月1日至2018年1月1日於又一城 G 層舉行「高錕慈善基金」慈善義賣，於聖誕佳節以愛行善，大家既可以隨意挑選各種聖誕禮物又可以支持「高錕慈善基金」！ 

小B同聖誕老人合照～

「歡樂‧聖誕」大巡遊及「悠揚‧妙韻」音樂表演 

今個聖誕，又一城特別獻上「歡樂‧聖誕」大巡遊，邀請來自海外的頂尖巡遊表演隊伍，穿上一系列滿載法式風情的紅磨坊舞台服飾，各表演者將於大巡遊中施展混身解數，呈獻連場精彩的雜技及歌舞表演！此外，更邀請來自法國的手風琴表演者，為大家帶來最地道的法式街頭音樂表演，配合舞蹈者的優雅舞姿，交織成別具視聽享受的浪漫畫面。 

「歡樂‧聖誕」大巡遊

12月2日 - 3日、 9日 - 10日、 16日 - 17日、 23日 - 26日

地點：又一城內各層

時間：晚上7時30分

聖誕詩歌獻唱

12月14日 - 26日

地點：LG2層紅磨坊聖誕舞台   　

時間：下午2時至2時30分及下午4時至4時30分

中銀信用卡客戶專享聖誕購物禮遇 盡享購物樂趣 

又一城於聖誕節為專享購物禮遇，由2017年12月1日至26日期間，中銀信用卡客戶於推廣期內關注「中銀香港信用卡」微信官號及成功完成微信賬戶綁定，並憑中銀信用卡於又一城最少兩間不同商戶即日累積簽賬金額達港幣4,000元或以上，可獲贈名貴紅酒乙支及「幸運大抽獎」抽獎券3張；即日累積簽賬金額達港幣6,000元或以上，可獲贈豪華聖誕美食禮物籃乙個#或L’OCCITANE聖誕禮盒乙份#及抽獎券3張。此外，即日累積簽賬金額達港幣1,000元或以上，可額外獲贈電子刮刮卡乙張，即刮即賞豐富禮品。

豪華聖誕美食禮物籃

有用資料: 

1. 「又一城‧快樂聖誕」

網頁：http://www.festivalwalk.com.hk/tc/

交通：港鐵九龍塘站直達

【生活分享】[爸爸角度陪媽媽懐孕DIY全紀錄1] 發現懷孕及產前檢查篇

各位剛懷孕的準爸爸準媽媽，又或者嚟緊準備計劃有小朋友的夫婦，係咪一開頭唔知點算好，唔知點入手呢？其實唔好話你地，就算我地今次有「所謂六年前的經驗」，原來有好多野都唔同哂，今次我地以過來人身份分享下，我地唔係大富大貴，亦無咩家中老人家可以幫到手，所以由懷孕、坐月到湊B，全部都係我地一手一腳自己搞，或者搵朋友仔幫手，今時唔同往日架嘛。XP

其實有BB又點會輕鬆呀？不過我地輕鬆左唔搞太多野，乖乖地跟政府檢查就算，畢竟我地花費唔起去搵一ｄ叫做好出名的私家醫生產檢，唔緊要，咸魚青菜，各有所好，我地見網上一般都介紹私人診所做產檢，其實由「瞳瞳」到「祈祈」(小B，2017年中秋出世)，我地都只係跟足政府所提供的產前檢查去做，當然其他額外的例如「照結構」、「超聲波」，就要自付出去搵診所做，政府沒有提供的。


小B來臨

大女瞳瞳2011年出世，計返今年2017，剛好六歲，由K3準備升上小學，其實都一心想生多一個，因為都隔左6年，我地夫婦二人共識左「有就有，無就無」，抱住試一試的心態，好好彩又得左。

年頭老婆發現月事未到，於是就去「萬寧」定「屈臣氏」果類店就買支驗孕棒，其實而家驗孕棒咩牌子都無所謂，而且都好準確，當然知道果一下，又開心又緊張，開心就梗係有新生命降臨，緊張就係人生計劃、金錢、將來生活...咁要重新計劃。呢個真係好需要兩個人去溝通架！


醫院開戶流程

雖然屋企驗孕棒知道「結果」，但都要由醫生去證實既，咁我地就去屋企樓下的普通診所，入去話想驗孕，咁就會比驗孕棒你（分分鐘係你屋企果個牌子），結果就由醫生講你知，同時佢就會開一張叫「懷孕證明書」之類比你，呢張「懷孕證明書」好重要，去醫院開戶、甚至申請產假、同公司話「你有咗」，都係靠佢架啦！

（注意，各間公立醫院的做法未必相同，今次只係列出2017年威爾斯親王醫院的做法）
因為瞳瞳一家住的地方係威爾斯親王醫院的範圍，所以由產前檢查、生BB、產後檢查，新生嬰兒的跟進，都係由威爾斯親王醫院及轄下的母嬰健康院去做。我地拎住之前「懷孕證明書」，到威爾斯親王醫院婦產科登記（位於醫院內的李嘉誠專科診所），我地記得帶二人的身份證、結婚證書同近期的住址證明去登記，最好帶齊去，唔洗返去後補咁麻煩。

威爾斯親王醫院婦產科專科門診
辦公時間 
星期一至星期五：早上9時至下午1時，以及下午2時至5時
星期六、日及公眾假期：休息
地址 沙田銀城街30至32號威爾斯親王醫院李嘉誠專科診所南翼2樓婦產科
查詢電話 3505 2470（辦公時間）

抽血完成

呢一日只係登記，你預左都要約兩個小時左右，之後佢會叫名去登記窗口，拎一大疊的「約期」，例如產檢、度頸皮之類.....準備定個file擺就好啦！留意有部入的「期」係醫院做、有的在母嬰健康院做。因為度頸皮（有沒有唐氏的檢查）係需要12週內做，而且要有好準確的預產期，所以醫院會叫你出去私家診所照超聲波（約），以有好準確的預產期，如果日子差距太大，要返醫院改期。

家中檢查（BINGO）→到普通診所由醫生確定及拎「懷孕證明書」→到所屬的區份醫院開戶

（記得帶二人的身份證、結婚證書同近期的住址證明去登記）→私家診所照超聲波（因為要確定週數做度頸皮（唐氏檢查））→跟醫院比的覆診紙去覆診

照超聲波

因為我地住馬鞍山，所以近近地揀左馬鞍山富輝花園商場入面的婦產科黃秀芬醫生照超聲波，當時大約$800左右，因當日係星期六，booking較多，約好時間，都等左一陣，但勝在可以帶埋瞳瞳（榮升家姐）見到小B。之後終於到我地見到黃醫生啦，黃醫生話因為新機，所以需要時間掌握，咦，咁都幾好呀！有新機用，又可以睇得清楚d。

今次係我地全家人第一次同小b見面，估唔到佢手指腳趾都幾長，而且數得到添，呢一刻真係有種感動，好想喊，因為一個小生命就在肚子入面。睇左都超過半小時，之後根據小B size去估計而家係幾多週。因為超聲波結果同本身預產期都爭得幾遠下，所以我地要回醫院把所有預約期改哂。

黃秀芬醫生
地址：馬鞍山富輝花園一樓53號舖
電話：2633 1308

手仔已經好清楚了

Hello，小B!

照結構

大約20週多D，我地就準備去照結構，照結構就更加可以了解BB的器官發育等等。在朋友介紹下，我地去左位於沙田石門的高錦安醫生，我地跟地址去到診所，環境新淨、闊落，仲有兒童遊戲區，啱哂瞳瞳家姐去玩，一人獨霸。高醫生係醫生界來說算是年輕，但非常細心，令我地都覺得值得推薦比大家。話說轉頭，小B出世果陣發現心跳有雜聲，後來診斷出個心有個窿，但其實果時照結構果陣，係由高醫生發現先，佢照到話個心有粒白點，好仔細。佢唔放心，於是叫我地出去行個圈再返去，佢想再睇清楚d，因為話見到個心有白點，但佢話東方人正常會有，同出世後斷症一樣（個心有個窿）。所以佢真係CHECK得好仔細，直情比父母更緊張，差唔多都睇左一小時，佢令你好放心。我地今次大約$2500，仲有DVD拎返！

高錦安醫生

地址：新界沙田石門安群街3號京瑞廣場一期19樓C室

診所名稱：卓越醫務中心

電話：21552871

之後老婆就跟足指示去覆診，有時醫院、有時健康院，由開頭每六星期覆診一次，慢慢開始加密直到臨生之前兩個星期，overall都無咩大問題，如果有特別狀況就立即去急症室、或者over某個周數可以直接入產前病房，不過都要強調，唔同醫院有唔同做法，當然有唔清楚或者唔舒服，都唔好介意，係一定要入醫院急症室，因為兩條生命可大可小，寧願由專業的醫護人員去幫你。=)

 放鬆心情，準備小B出世～