有無諗過揸自已心愛的座駕（私家車）去大嶼山玩呢？
以往屬於封閉道路的大嶼山南部的道路網，而家我地可以透過運輸署的「大嶼山自駕遊」計劃，申請有關許可證，就可以在星期一至五（公眾假期除外），上午8時至下午7時，駕駛私家車進入大嶼山的封閉道路前往昂平、大澳、長沙和梅窩等地點作消閒及康樂用途，不過每天名額只有25個（其中5個名額會編配予電動私家車），以先到先得方式發出。
Step by Step申請「大嶼山自駕遊」
Step 1
透過運輸署的網上服務申請大嶼山封閉道路通行許可證。申領許可證的費用為港幣75元，輸入所需資料及付款後，會即時知道申請結果和領取許可證的方式。
申請要係一個月前，即係話9月30日的申請，就是10月30日使用的許可證。
Step 2
申請成功後大約一星期，就會收到運輸署的信件，內有一封成功申請的信函、許可證及大嶼山地圖。
出發前準備
1. 首先一定要入定油先啦，因為大嶼山南部無咩油站，大家最好直情當佢無油站先，在市區「入滿缸」出發，之後玩得盡情又開心，以我自己部Honda Mobilio 1500cc計，當日全程開冷氣、上山落山、捐窿捐罅、玩咗全日都只係用大約五分一缸油，不過當然都係建議大家有多無少啦！
2. 車頭一定要展示禁區許可證，警察有機會查看的
3. 遵守交通規則！我自己揸過，其實路面很寬闊，唔算係特別險要，小心駕駛就可以了！
4. 熟悉大嶼山地圖
大家可以出發了！大嶼山車路可以去的地方其實唔多，以嶼南路為主，大致貫通東西（大澳梅窩），再加上去昂坪市集／大佛／寶蓮寺，基本上都去過哂，咁今次我會介紹幾個地點，係大家平時搭巴士或者少人知的地方，實行大嶼山捐窿捐罅自駕遊～
1. 深屈村士多早餐
2. 石璧石刻及長碼頭
3. 觀音寺食齋
4. 芝麻灣碼頭
第一次自己揸車上東涌道，向大嶼山出發！
1. 深屈村士多早餐
一朝早由馬鞍山家中出發，經過無數高速公路、大橋，到達東涌市、攀上東涌道伯公坳、再落山到嶼南路，經過石壁水塘，駛入上昂坪的小路，就在半山腰山坳中的一個路口落山，那條我一直只在地圖看見，今次慕名而來的深屈道，終於到達海邊的深屈村。
深屈村位於大嶼山北岸，在東涌同大澳之間的一個海灣，因為呢個海灣深入而狹長，所以叫做深屈村，佢亦都係昔日「東澳古道」的中途站，係東涌大澳居民交通要道。
由深屈村放眼望出去深屈灣，就見到香港國際機場跑道同港珠澳大橋連接路了～
環境寧靜，海灣中見有小螺
直到今日，只剩下數戶村民留守，但村內仍有三間士多，方便假日行山遠足遊人。出發當日係平日，所以環境好寧靜，我地求其揀咗一間士多坐低。
我地點咗以前行山去到鄉村士多必叫的「餐蛋麵」啦！仲有村內名物「煎蠔餅」啦！
「餐蛋麵」：唔知點解屋企永遠煮唔到既味道～哈哈～
「煎蠔餅」同平時大家見既唔同，本土風格，厚厚兩塊，好似熱香餅咁，但唔油膩，入面的蠔仔細粒分明，蠔仔仲話係老細係對出的海灣捉架～超好味！
離開深屈，由深屈道回望深屈村
之後上去昂坪市集同大佛，在昂坪市集旁邊有一個大大的停車場，亦有洗手間設施，大家可以係度執整一下再出發。
石璧石刻及長碼頭
石壁水塘於1957年開始興建，1963年竣工，存水量達二千四百四十萬立方米，曾是六十年代全港最大的水塘。水塘遠離煩囂，風景優美，主壩東面山邊，更有一塊青銅器時代遺留下來的古石刻。
先來同大家遠眺一下石璧水塘
石壁水塘水壩邊有一塊落成銅匾
香港大多數古代石刻都瀕臨海濱，石壁石刻卻離開海岸約三百米。相信此處昔日也是海邊，其後海岸變遷始成今日之地貌。石刻紋飾由正方及圓形幾何紋構成，與古代青銅器上的圖案極相似。故此或可推斷，這石刻大約是青銅時代，即約三千年前，由先民所刻鑿。
之後我地再出海邊，就係地圖上顯示一氣長長仲出大海的碼頭，今日終於一見。我地當日天氣唔好，碰上大雨，雨乘風勢，我心諗如果打風呢個位都幾「應」、幾利害。碼頭應該都係監獄方面使用多，但亦有釣魚人士垂釣，唔知多唔多收獲呢？
回望石壁懲教人員宿舍，風景唔錯～
羌山觀音寺齋菜
觀音寺我細細個就跟爸爸媽媽去，我地一家多數係農曆新年後（年初幾果D），以前交通不便，由沙田屋企要搭巴士出九龍塘轉地鐵到中環轉油麻地小輪去梅窩，最後就迫大嶼山巴士去觀音寺。
大嶼山觀音寺建於1910年，算得上係百年古剎，環境清幽，無寶蓮寺咁俗氣，又可以在平台遠眺大澳，位於寺中心的寶塔，內有一個千手觀音的佛像。我先到詢問處買齋劵同俾錢，殊不知他說「隨緣樂助」就可了，並指示我把錢放在香油箱就可以了。我就跟返平時返工食一個LUNCH的價錢放入去，多口再同買票的叔叔問一問，原來而家日日都有齋食，唔一定只係農曆初一十五。
買了齋券(其實係一張手寫紙仔)，就去另一邊齋堂用餐
齋堂地方都闊落，自己先找個位置坐下，然後再出去取食物，形式就好似我地三餸飯咁，有姐姐幫你放餸，自已裝飯裝湯，唔夠可以出去再添食，但要記得拎夠自已份量就好，不要浪費。
呢份係我自已的「精選」，齋菜味道好味，夠簡單！反正平時返工都市生活都大魚大肉，難得今次可以清淡一下，夠健康～
芝麻灣碼頭
飽頓一餐齋菜之後，我地就向芝麻灣碼頭，中間經過全香港最長的沙灘 - 「長沙泳灘」，大家可以抖抖，吹下海風吹下水～
我地沿住貝澳轉入窄小的芝麻灣路，終於嚟到芝麻灣半島。
點解我對芝麻灣半島咁有興趣呢？因為香港有一條渡輪航線叫「橫水渡」，航線係來往坪洲＜＞長洲＜＞梅窩＜＞芝麻灣＞的渡輪，前三者我都理解，但最後一個地點芝麻灣竟然為有渡輪服務？
好！原來一去，芝麻灣碼頭旁邊有一大堆懲教設施：芝麻灣懲教所及芝新懲教所，不過呢兩個懲教設施已經搬遷及廢棄，而家只餘下留守人員，所以亦見破落。
咁亦都解釋了芝麻灣碼頭的作用，就是當年方便家屬探望或上班的懲教人員。
碼頭有個等候室，作為等侯安排探監或者便船離開之用
昔日的等候室，入面仍然有投幣電話
呢個簡陋的碼頭就係芝麻灣碼頭
正當我地享受海風吹水既時候，竟然可以親眼目睹一部新渡輪埋岸～
送上掛在芝麻灣碼頭的「橫水渡」航線船期表
其實我地仲去咗平時好多人去的大澳、梅窩，但平時大家搭車搭船都去得到，我呢度就唔介紹啦～
其實除了申請許可證外，其他同平時香港各區揸車無分別（哈哈，根本就係香港），只要小心駕駛，入滿油，勿超速及小心有動物横過馬路，就可以了！
好好計劃你的大嶼山行程吧！GO ~~~
