2018年8月31日 星期五

【台灣、宜蘭】2018玩盡宜蘭六天親子遊:全世界第一間指尖陀螺主題館~陀陀螺TOTOLO



朝早係活力泉源食飽早餐,我地就出發去「陀陀螺TOTOLO」。其實陀陀螺TOTOLO同我地今晚住的民宿「惠欣綠花園」都係同一個地方,行過去就到,咁我地就決定參觀「陀陀螺TOTOLO」先啦!


陀陀螺TOTOLO」係全世界第一間指尖陀螺主題館,近年有日本人氣卡通片,好似「爆旋陀螺」咁,又將熱潮帶回來。



陀螺的原理係我地日常生活裡面經常會應用到,對瞳瞳一家來講真係長知識。



之前講過,陀陀螺TOTOLO係惠欣綠花園入面,所以佢兩個地方都同用同一個售票處,各位大可以放心,無去錯地方,向售票員說明參觀那一個地方就可以了。



門口的介紹小冊子旁邊已經有一個指尖陀螺比大家玩,立即變得有趣味!


除了入場劵,還有指尖陀螺紀念品同闖關遊戲卡比我地,要小心保管呀!成功闖關可以獲得禮物。




全世界第一間指尖陀螺主題館:
陀陀螺TOTOLO正門!我地嚟啦!



 呢隻熊貓係陀陀螺TOTOLO的標誌,考考你,見到陀螺嗎?


館內有導賞員帶我地參觀,亦為了有更高參觀質素,每次導賞員帶領的參觀人數都有規定架!首先介紹係陀螺的發展,原來好耐好耐之前,世界各地已經出現類似陀螺的旋轉工具遊戲。




陀螺係一個看似簡單,但又有一定複雜原理係入面的東西~


呢度仲收藏咗世界各地不同的陀螺玩具~


指尖陀螺花海,成千上百的陀螺,打造成一個焦點,打卡取Like必到景點啊!






唔好睇小瞳瞳同豬小B坐的呢張凳,佢形狀不就是一個陀螺嗎?佢地坐上去就可以轉動,大家玩得好開心!


展館又考考我地,檯面上有好多貌似相同的陀螺,但因為當中的原因,所以有快有慢~瞳瞳要搵出邊個快,邊個慢~



呢度有幾部紅外線測速機,瞳瞳同我比試一下邊個轉得最快~


腳踏陀螺,一樣好玩


玩完一輪之後,我地有闖關任務,一共有5個。成個過程好搞笑,好彩沿途有場館的哥哥姐姐幫手,我地最後都順利過關!YEAH!最重要係大家玩得開心!










闖關成功後,記得換領小禮物做紀念。另外出口處都有售賣其他不同的陀螺紀念品。






之後我地去陀陀螺TOTOLO旁邊的咖啡室,抖一抖,品嘗輕食。我地點左窩夫雪糕同月亮蝦餅雞翼併盤。因為都屬於惠欣綠花園的部份,所以有好多仙人掌或者多肉植物的擺設。咖啡室環境舒服。地方偌大,坐得舒服。



咖啡廳亦係我地民宿取鎖匙同翌日早餐的地方,瞳瞳爸爸下一篇文再介紹。


窩夫雪糕:窩夫做得好鬆化柔軟,好好味!


我去過台灣夜市,以前食的月亮蝦餅不好食,但今次月亮蝦餅真係好好味,應該咁講,我今次先知月亮蝦餅原來咁好味。雞翼都好入味,正!





有用資料: 

1. 陀陀螺TOTOLO

地址:宜蘭縣員山鄉賢好路41巷13號(開車請由『賢好路43巷』進入)
電話:+886 3 922 3220
營業時間:0900-1700
電子信箱 : totolo.spinner@gmail.com




門票消息(2018年):
開幕優惠200元(原價250元),館內分四大展區,含5項闖關(關關有獎)、DIY與體驗、及飲料一份,園區內有花園與咖啡廳喔!如有身高100公分以下為免票~



以下係我地2018年夏天去台灣宜蘭六天行程,歡迎大家參考😁😁😁😁

第一天 香港飛台北
住宿:台北車站附近、罕有附設浴缸的酒店 - 蜂巢Bee House

第二天
大人小孩一齊化身藝術家,莎貝莉娜精靈印畫學院
親身落池塘同囡囡玩,蓮花造的雪糕食過未?御品蓮休閒農莊
住宿:180無敵太平洋海景民宿,看海.聽浪~窩在懶洋洋

第三天
好玩又環保~小河生活獨木舟,冬山河划船體驗
進入一個「畫」與「畫框」的世界~畫框博物館
有得食有得玩,天氣瓶x噴砂玻璃杯x紙飛機發射器,大風吹手作輕食館
住宿及晚餐:在阡陌之中住宿、享受當地私房食材~傳藝渡假會館

第四天 
白米木屐館,體驗穿木屐之旅
擁有大大草地、玩水池的宜蘭親子餐廳~玩的瘋Wonderful親子廚房
住宿:飛天小火車出發啦!米妞的假期~ 

第五天 
早餐:自家製麵包、手工優格健康素食店「活力泉源」
全世界第一間指尖陀螺主題館~陀陀螺TOTOLO
住宿:多肉植物體驗+泰國式Villa泳池民宿~惠欣綠花園
大過手掌的JUICY雞扒~宜蘭名醬堂醬燒雞扒

第六天 
生鬼有趣、大人細路DIY茶香冰淇淋~星源茶園

2018年8月28日 星期二

【香港本地酒店】【沙田】180度俯瞰沙田景色,玩盡「香港沙田萬怡酒店」兩日一夜之旅



今年2018年暑假,我地抓緊夏天暑假的尾巴,8月底參加香港沙田萬怡酒店的「Color My Summer Room Package」,正好為我呢個三十多年沙田友的瞳瞳爸爸,填上沙田酒店的空白。點解咁講呢?因瞳瞳爸爸已經試過哂沙田區酒店的自助餐,就係尚欠最新開的香港沙田萬怡酒店MOMO Cafe未試過。。。。


今次我地呢個香港沙田萬怡酒店Color My Summer Room Package」,平日就$1798+10%,假日$1998+10%,包括:

一晚酒店房間(Premier Room)
兩大一小的MO MO Cafe自助晚餐
兩大一小的MO MO Cafe翌日自助早餐
十個代用金幣玩遊戲
精美夏日禮品



抓緊夏天暑假的尾巴,我地出發啦!

香港沙田萬怡酒店位於沙田石門,搭馬鐵石門站落車,A或C出口後沿安麗街前往;又或者搭巴士,選擇仲多,揀來往馬鞍山的路線,如果中途有停「濱景花園」站的巴士都可以到達。


酒店樓下有惠康、萬寧、麥當勞,非常方便,我地由酒店位於安心街的門口入(麥當勞旁),搭扶手電梯上一樓,就抵達酒店大堂。





酒店大堂非常闊落,我先去Check in,職員也很勤快地幫我地辦理手續,送上今次package的精美夏日禮品,介紹酒店內各項設施,亦因為當天房間的供應,酒店將我地原本的Premier Room upgrade 做Studio Suite,超級幸運同開心,所以我地之後介紹的係Studio Suite,至於房間供應就要視乎酒店當日的安排啦~



瞳瞳媽媽就帶豬小B同瞳瞳到大堂另一角等候,佢地發現酒店好貼心有一部小車,上面有可供客人免費享用的冰水、凍紅茶、凍咖啡同NUTS。瞳瞳媽媽佢地一邊享用,一邊等我辦理入住手續。






Check in時,我地拎到既精美夏日禮品係咩嚟呢?開估啦!原來係兩對沙灘拖鞋+一個水壺+十個代用金幣換領劵。我地無帶拖鞋,所以呢對沙灘拖鞋非常啱用,方便我地係酒店入面上上落落活動。



我地今晚住的Studio Suite房間係27樓(酒店最高30層),電梯係要先拍房卡才可以按你的樓層,對住客的私隱度非常有保障。


打開房門,嘩,超大!首先洗手間同客房係分開的,客房有一張雙人房,急不及待再走向窗邊,原來係向城門河的河景,一邊可以望到馬鞍山、九肚山、沙田馬場;另一邊就望到沙田第一城、城門河、市中心及大圍方向,而且酒店附近無咩高樓大廈,所以視野更為廣闊,完全可以180度俯瞰沙田景色,絕靚!







波士BB




房間入面提供免費Wi-Fi、拖鞋、免費即溶咖啡、茶包、樽裝水、雪櫃、書枱、衣櫃、保險箱等等,就連 iPod底座播放器都有!




至於洗手間入面分別有獨立淋浴間和浴缸,同時間可以有兩個家庭成員沖涼😂而且浴缸向住九肚山、沙田馬場,仲見到城門海向吐露港出海口。用品方面如毛巾、風筒、浴袍等都一應俱全!





事不宜遲,趁未入黑,我地去3樓玩了。酒店3樓有健身中心同游泳池,夏日炎炎,我地梗係玩下水啦!



泳池獨立分開一個大池同一個兒童池,泳池開放時間為0600-2130(中間1300-1400洗池),泳池設有救生員,也可以在此取毛巾,不用拿房間的毛巾。池邊仲有幾個水泡提供,增添樂趣!瞳瞳玩到唔肯上水。



呢度的有一大片的淺水區,好啱豬小B!佢都著住BB專用的游水尿片去玩呀!



池畔的特色沙灘椅




游完水,我地就返房沖下身,休息下,準備到2/F的MOMO Cafe食今晚的自助晚餐。自助晚餐由傍晚6點開始,Check in時已請前台為我們訂好位子。



其實自助餐我地覺得都OK,先講食物種類,都算幾多款可以揀,雖然無生蠔,但係照舊有海鮮,例如青口、細龍蝦(好多羔)、大蟹鉗、長腳蟹腳等,而refill速度都算快。



熟食方面,中式小菜、燒味(有沙田乳鴿)、牛扒都有供應、最好味係燉湯,是次係「川貝批把葉燉赤肉」,無間斷源源不絕供應,啱哂我地一家補一補,平時我地好少湯水咋。




超大花膠,好味!


壽司區有壽司魚生刺身供應,今次個師傅片得都幾大塊下


 湯粉麵區都不錯,可以自已揀料交比師傅去整,比較特別係佢有麻辣、酸辣湯底!


冷盤區都保持平穩,款式尚算多。




甜品方面,有主題的抺茶系列之外,雪糕用Haagen-Dazs,有三款口味揀:朱古力、雲呢拿同士多啤梨。最特別係自家製冰條,有「提子」同「珍珠奶茶」味,「珍珠奶茶」好好味,大家一定要試!




最後落埋大堂玩,酒店set咗幾個小遊戲同遊戲機,大家可以用先前送的代幣玩,有些遊戲用一個代幣、兩個或者五個,小朋友要好好分配啊!



晚上,瞳瞳和祈祈就這樣甜夢睡了。


整體來講,性價比不錯,如果計返平時自助晚餐約四百元一位,兩大一小已經千多元,而家補多幾百蚊就有一晚酒店房住,仲未計翌日自助早餐同享用酒店設施呢~所以都划算,至少泳池我敢帶小B落水,因為人少就感覺比較乾淨。

瞳瞳爸爸知道酒店每到暑假都有呢D package比家庭玩,不妨試下丫~




有用資料: 

1. 
香港沙田萬怡酒店

地址:
香港沙田安平街1 號
熱線: (852) 3940 8888
傳真: (852) 3940 8828
電郵: cy.hkgst.ays@courtyard.com
網頁:https://www.marriott.com/hotels/hotel-deals/hkgst-courtyard-hong-kong-sha-tin/