西營盤，對於住新界的瞳瞳一家嚟講，「好日都唔嚟一次」，自從港鐵南港島線通車，呢區交通方便好多！今次我地一家人山長水遠揸車（經青沙公路＋西隧）嚟到位於西營盤的港島太平洋酒店，就係要去酒店入面＜中．西環＞餐廳，試下佢地下午茶自助餐期間限定「加州士多啤梨甜品」。
揀呢個士多啤梨甜品主題的自助餐，係因為我地全家人都好鍾意食士多啤梨，由平平地既國產到幾百蚊的日本產都唔會放過，今次餐廳係同美國加州士多啤梨協會合作，利用美國加州的士多啤梨推食不同的6款甜品，包括有：士多啤梨配香梨奶油慕絲蛋糕、士多啤梨酥皮慕絲蛋糕、士多啤梨芝士批、士多啤梨班戟、士多啤梨意大利芝士餅及士多啤梨配香橙干邑甜酒蛋白餅～
價錢都好抵食，在網上預訂有75折優惠架，折後連服務費每位$193咋！
我地睇下有咩食先～
＜中．西環＞餐廳位於酒店的一樓，我地啱啱星期六去，全場爆滿，似乎好多人都為左士多啤梨而來，餐廳裝潢以西環一帶的懷舊特色做主題。
我地第一時間去睇士多啤梨甜品，每款都拎一件返嚟食下，不經意地做左呢個擺盤，好豐富呀！
樣樣都做得好精美，好好味！我自己就鐘意呢個加州士多啤梨芝士批：士多啤梨size較大，味道鮮甜，凍凍的芝士批，入口好正！
所有關於士多啤梨的甜品都好受大家歡迎，其實我覺得士多啤梨夾甜品係無敵，無論外觀、味道甚至營養，食得多都唔會怕！
士多啤梨蘊含豐富維他命C，所以我地都比左少少豬小B食，睇下佢幾咁滋味！！
介紹埋其他野食啦，雖然係下午茶，但凍盤都有：三文魚、希靈魚刺身、凍蝦、蜆、沙律等。
熱食：中式西式湯品、中式點心、三文洽、炒粉炒飯、咖哩牛腩、章魚燒、湯粉麵等，最特別仲有香港地道小食，例如雞蛋仔、爆谷～
懷舊小食區：有豆腐花外，仲有陳皮梅、飛機欖等等的「口立濕」，好搞鬼。
作為我地香港地道文化，我一定要比瞳瞳試下！哈哈～
呢度雪糕有Häagen-Dazs同雀巢揀，下午茶自助餐來說，合格有餘了。
唔駛二百蚊就可以享用下午茶，算係中上環區自助餐親民之選。酒店附近有中山公園、百年電車、海味街、港鐵南港島線，可以串埋一齊玩，交通亦算方便，我地走既時候，仲啱啱遇上主題電車：電車酒吧。
港島太平洋酒店＜中．西環＞餐廳仲有自助晚餐，酒店亦有住宿計劃，睇下將來我地有無機會去試啦！
下午茶自助餐
供應日期：2018年10月1日至2018年12月31日 (逢星期六、日及公眾假期)
供應時間：下午3時15分至5時15分
原價：成人 HK$228 / 長者及小童 HK$178 (以上價目須收取以原價計算之加一服務費)
另外，酒店地下設有電動車充電站，顧客只需惠顧滿港幣300元，即可享兩小時免費泊車優惠及電動車充電服務。
(網上預訂下午茶自助餐可享高達75折優惠，折後連服務費成人只需每位港幣193元起*)
*以上優惠受有關條款及細則約束
有用資料:
1. 港島太平洋酒店，＜中．西環＞
地址：西環西營盤干諾道西151至153號
電話：21315908
