2019年5月22日 星期三

【香港本地親子遊】【觀塘】隱藏公屋之中,同小朋友上一堂地理課~安泰邨「地質文化展覽場地」


瞳祈爸爸最鐘意帶住一家人捐窿捐罅,周圍去玩~今次我地發現咗一個鮮為人知、隱藏公屋之中的「地質文化展覽場地」!係呀,你無睇錯呀!在公共屋邨入面竟然有地質展覽睇,而且都幾豐富,再加上因為係屋邨入面,所以展覽場地的介紹都係以一個「深入淺出」的方法,再加上大量圖片同互動工具,增加不少趣味!就同大女瞳瞳簡簡單單了解一下地理啦!

近年香港有不少新的公共房屋落成,市區其中一個最大項目就係在觀塘區、順利邨後山的「安達臣道發展計劃」,部入公共屋邨已經落成入伙,「安泰邨」係其中一個!安泰邨一共有11幢,容納大約25000人口,都算係一條大屋邨!安泰邨坐落於昔日的安達臣石礦場,所以有關當局用石礦場同地質文化做個crossover!

搭巴士到達安泰邨總站,在商場入口處已經有個巨型擺設,原來係當年安達臣石礦場的碎石機,碎石機將大石頭碎成細石頭方便運走。

好大型的機器,瞳瞳祈祈兩姐弟拍埋去影相,對比更大~

商場的一個角落都擺放咗前石礦場的輸送帶 ,經過美化,成為了一件藝術品~



穿過商場,向公屋樓宇出發,安泰邨「地質文化展覽場地」就係位於恆泰樓地下。

一入去分左右兩邊,左手邊係介紹「香港火山活動」「安達臣石礦場歷史」,展出當年工人用過的工具,例如鐆、鐵釘同「火炮」等等。其實可能因為設定在公屋之中,所以佢的介紹手法非常淺白,「一句起兩句止」,令人簡單易明,係地理科的入門教學。



展板前面介紹在香港發掘的石頭,用滾筒形式令小朋友更有樂趣!


昔日安達臣石礦場所出產的石頭 - 花崗岩,當時好多本地以至廣州的石砌建築,都使用香港出產的花崗岩~

成個展覽場最吸引眼球,就係呢個叫「風炮」的工具鑽破石頭的模型~瞳瞳祈祈都睇到呆咗!


至於右手邊,就係介紹我地「香港聯合國教科文組織世界地質公園」,透過圖片展示地質公園內的不同地貌。

又列出我地香港地質之「最」,例如「最高」的山、「最長」的沙灘、「最高」的海蝕洞、「最件輕」的岩石等等~全部都係香港境內搵到!


第二部份就比較學術少少,但亦都好淺白易明:世界地質地圖、風化及侵蝕作用、板塊運動。不正正就係中學的地理課嗎?







 在「地質文化展覽場地」對出,都有個戶外園地,放置了幾個岩石,同居民有近距離接觸。


地方唔算大,瞳瞳順手帶住仍然學行的祈祈走走,佢地又可以親手摸摸岩石,都幾得意~


安泰邨一景


雖然我唔知瞳瞳可以明白幾多,不過叫做開下眼界,而且用字淺白,容易理解。安泰邨「地質文化展覽場地」全年開放參觀,既為街坊提供一好去處,又可以豐富遊人知識。附近有屋邨的小公園俾小朋友放下電,但人都幾多下,要注意安全。商場有一切所需,餐廳、便利店、洗手間、超級市場等等。


有用資料: 

1. 
安泰邨「地質文化展覽場地」

地址:
安泰邨恆泰樓地下
收費:免費入場
交通
88 中秀茂坪 <-> 大圍站
213M 安泰邨 -> 藍田站(循環線)
214 油塘 <-> 長沙灣(甘泉街)
290X 將軍澳(日出康城站) <-> 荃灣西站
613 安泰西 <-> 筲箕灣


2019年5月17日 星期五

【香港本地親子遊】【香港仔】搭可愛小木船街渡(香港仔-鴨脷洲街渡)穿越避風塘


香港三面環海,昔日大多數人都捕魚為生,近一個世紀香港發展成為轉口港、大城市,但仍然有地方保留昔日漁港的風情。

香港仔最出名就係海鮮舫,海鮮舫坐落的位置就係香港仔避風塘,而呢個避風塘以前係有好多「水上人」居住,「水上人」一生以漁船為家,但今時今日隨著社會的改變,好多水上人已經由水上走到陸上,改善自己的生活質素~

今次我地介紹大家到香港仔,坐大家好少機會搭的小木船街渡,在船上面可以睇下漁船、漁民生活。街渡來往香港仔至鴨脷洲,航程短短,情懷滿滿。



如地圖所示,香港仔有兩個上船地點,大家雖然都係香港仔海濱公園,一個位置近香港仔中心/行人天橋;另一個近香港仔巴士總站/行人隧道
至於鴨脷洲的位置只有一個,就係鴨脷洲海濱長廊近悅海華庭

我地由香港仔中心出發,行出海邊馬路,就有指示牌去香港仔海濱公園,如前文所講,我地呢邊要先跨過行人天橋~


去到海濱公園好快就搵到碼頭上船


碼頭係由浮躉所做,只有簡單幾張椅子,無幾耐船就嚟到啦!


街渡用的小木船,大約可以坐30-50人左右,坐到七七八八就會開船架啦!

外表好懷舊的小木船街渡,船上卻有現代化的八達通收費器,收費:大人$2.5,小朋友$1.3,上船自已拍機或者付現金都可以!

小木船街渡的駕駛室

航程短短,大約只需要3分鐘左右,不過大家都要坐定定啊!


縱使而家南區交通非常方便,有巴士、亦有港鐵南港島線,不過「香港仔-鴨脷洲街渡」仍然有好多來往兩地的街坊乘搭,一來收費平,二來航程短,無巴士咁兜路。街渡只有3分程航程,因為只待在避風塘入面行走,所以非常平穩。在航程當中大家可以近距離看見漁船同漁民生活,對小朋友來說係非常特別的體驗。

鴨脷洲可以帶小朋友行下「風之塔公園」、「鴨脷洲海濱長廊」等幾個公園,內街可以品嚐「食記碗仔翅」、「友和士多糕點、砵仔糕、茶粿」等等,香港仔果邊有香港仔中心購物商場同香港仔大街魚蛋粉、艇仔粉(魚蛋+燒味的河粉),串走幾個景點,一定唔會悶親!去南區唔一定去主題公園既!


有用資料: 

1. 
香港仔-鴨脷洲街渡

時間:0700-2300

收費:成人 $2.5 / 小童 $1.3
泊車地點
香港仔:香港仔中心
鴨脷洲:悅海華庭






2019年5月9日 星期四

【香港本地酒店】【沙田】沙田市中心零距離~「帝都酒店」住宿體驗,2+2餐廳自助餐


我係一個不折不扣的「沙田友」,細細個就已經同屋企人住係沙田區,就連讀書小學到中學、人生大事結婚都係沙田擺酒,好多沙田的地方我都去過,淨係一個「新城市廣場」都留下唔少足跡,不過亦因為住沙田,所以無諗過住沙田區的酒店。但自從上年2018年暑假試過我地沙田區其中一間酒店之後,非常開心同滿意,希望日後有機會可以體驗咁多間沙田區酒店啦!我都係想近近地俾老婆遠離家務、實行「快速叉電」,而小朋友可以用下酒店設施開心玩啦~

趁住復活節假期,我地住埋第二間酒店:「沙田帝都酒店」,今次個套票:「雅緻雙床四人客房+2大1小復活節主題自助晚餐」=約$1900,因為佢本身包埋復活節主題自助晚餐,所以我覺得都划算。

我諗好多街坊自已住沙田,但未見過帝都酒店的入面係點,等我地帶大家出發去睇下啦!

呢間酒店方便程度真係唔需要我多講,因為實在太方便啦!「港鐵沙田站」沿大型購物中心新城市廣場一直向「第三期/一田百貨」方向行,行下睇下商店,落雨完全唔駛擔遮,行5-8分鐘就到!

我地專登「扮遠遊」,由城門河邊行過。當年發展商為酒店設計出一個同商場用同一個紅色的外牆,所以整個建築群完全prefect match~矮地果幢就係帝都酒店啦!

 大堂光潔明亮,酒店接待的同事都好快幫我地做好check in手續。

酒店房間分配在9樓


今次我地入住「雅緻雙床四人客房」,兩張大大的雙人床~


一入房裡面,最搶眼當然係唔同顏色枕頭啦!



由雲石舖砌的浴室都算乾淨企理,有浴缸,小朋友可以玩水!



 個人護理用品,住一晚可以免卻帶太多用品

有齊熱水煲、蒸餾水、咖啡茶包等~

望望窗外風景,因為我地住得唔高,對住沙田裁判法院,左右兩邊可以睇到沙田中心、沙田公園同城門河景,幸而也不是「樓對樓」,私隱度高!


到落去泳池玩啦!

「帝都酒店」的泳池同健身中心位於2/F,估唔到今年係帝都酒店同瞳瞳祈祈行「夏水禮」,2樓有毛巾同更衣室。而我地在房間穿好去泳衣就可以落去玩啦!

因為泳池所限,不能影太多相,呢度既泳池係一個大泳池,一半露天一半室內,沒有小童池,所以大人要好好看顧小朋友。

2+2餐廳自助餐

2+2餐廳位於帝都酒店入面,我地食果陣係復活節假期,所以有復活節主題的自助餐。老實講,自助餐就萬變不離其中,不過肯花心思,同埋搞活動令小朋友開心,2+2餐廳真係抵讚!佢地好有心機去做復活節主題的食物,又肯花心思比小朋友開心一下,唔怪之我去到餐廳都係見到一家大細合家歡嚟食自助餐!

呢個比小朋友扮摘下士多啤梨,其實只係在不同的籃子放入士多啤梨,但瞳瞳同其他小朋友又覺得「夾夾下」咁又幾得意喎,唔止小朋友,我見有幾個大人都夾得好開心~

餐廳將復活節主題的食物全部放係一張檯,大家唔駛周圍搵,而且小朋友又易夾得到食物,由三文治到甜品都有,非常豐富!





餐廳真係好有心思搞好多活動同小朋友玩,瞳瞳在職員帶領下,有得設計復活蛋,然後掛上後面的許願樹,又[乙水]到阿囡鬼咁開心!整完之後小朋友可以揀份禮物走~






其他自助餐的食物都唔錯,有蠔有燒龍蝦,種類都幾多,而且佢不同時段有不同優惠,在沙田區來講算幾抵食!大家可以留意2+2網址:https://www.royalpark.com.hk/hk/dining/#2+2cafe








我地當晚的推介菜式係「三文魚籽茶碗蒸」

叮叮叮。。。餐廳的燈轉暗,原來係火焰雪山蛋糕出場啦!有火喎~吸引哂全餐廳所有人的目起注視呢一刻!







今次「帝都酒店」住宿體驗好好,佢位置於沙田市中心,一切都好方便~一家大細可以行下新開的一田百貨、史諾比世界、沙田公園、城門河畔單車樂等等,全部都可以步程5-10分鐘內到達,沙田市中心太方便,甚至可能你都叻過我多了~


有用資料: 

1. 
帝都酒店

地址:
沙田白鶴汀街八號
電話:(852) 2601 2111
交通:
A. 港鐵沙田站沿新城市廣場步行直達
B. 多線途徑「沙田市中心」巴士路線