【香港本地親子遊】【九龍灣】全港唯一要搭升降機的公園：岩石公園 － 彩榮路公園

由香港政府的康文署管理的公園有好多，瞳瞳爸爸都發覺近年的新公園都特別有心思，例如公園都有一個主題，好似我地之前介紹過的恐龍公園「坪石遊樂場」同水牛公園「牛池灣公園」。

今次我地介紹呢個：「岩石公園」彩榮路公園，一個以岩石為主題的公園。「岩石公園」之得名，係因為以前呢度係一個石礦場，後來石礦場停產，原地就發展成為今天彩霞邨、彩福邨、彩盈邨同彩德邨。所以我地今時今日係公園，仍然可以見到昔日礦場的遺跡。

最特別呢個公園係要搭升降機先上到去架！

「岩石公園」主要分為兩個平台，我地由地下搭升降機到第一個平台，兒童遊樂場、涼亭、展者健體設施、洗手間等等，都集中呢個平台，係比較「動態」的區域。如果大家細心留意，公園不同地方都擺放石頭做裝飾，增添趣味。

兒童遊樂場最主要就係呢個繩網陣，相比平時來講，呢個陣難度叫高，而變化又多。

瞳瞳好叻好勇敢，挑戰成功，佢真係好鍾意玩呢個「陣」，足足可以消磨半小時，玩完又玩....玩完又玩....，最後真係玩到無哂力先停低休息。

繩網陣旁邊都有幾張「轉轉凳」，都好好玩！

兒童遊樂場旁邊有休閒區，可作小休或進行不同類型的集體活動

整個「岩石公園」的洗手間都係呢一層（平台）度，唔講唔知，原來呢個洗手間係加入左環保意念，旁邊的小屋有講污水重用的過程，暫不可以入內參觀，要隔住玻璃望，外圍有展板介紹。

洗手間都十分整潔，家長可放心使用。

離開第一個平台，我地又搭升降機上去第二個平台，亦都係公園的最高處。

由上而下望回第一個平台

第二平台的主要係休閒設施為主，如涼亭、草坪、廣場等等，不過主題「岩石展示區」就係呢度啦

從山崖可以見到昔日舊礦場的遺跡

「岩石展示區」展出多個係香港常見的岩石，並有介紹展板，而且可以比大家親手觸摸得到。

以前瞳瞳爸爸細個，會經常係路邊發現「怕醜草」，當我一發現佢地，我就會用腳掃一掃佢地，見到佢地會即刻合埋，不過近十年都好少見到，但今次竟然俾我見到岩石公園草坪有一大片的「怕醜草」，瞳瞳終於大開眼界，以前要用佢行山好遠先見到少少架咋，今次方便好多。

有用資料: 

彩榮路公園

位置：公園位於牛頭角淘大花園後山，彩榮路盡頭。

交通：

1. 九龍灣港鐵站Ｂ出口，之後沿行山天橋上山，往彩福邨方向。

2. 可乘九巴２Ｘ、９、２８Ｂ到彩福總站前往。

其他精選

探索香港恐龍公園(坪石遊樂場)

http://tungbama.blogspot.hk/2016/07/20160706.html

鬧市中的隱世公園：「牛池灣公園(水牛公園)」

http://tungbama.blogspot.hk/2017/06/20170622.html