瞳遊樂 (八十後香港家庭的親子旅遊blog): 【日本、大阪、有馬溫泉】[2015 五日四夜跨年有馬大阪親子遊]Day2 (3之1) 陵楓閣日式早餐 + 邊行邊浸腳：「有馬溫泉街」

2016年1月12日星期二

【日本、大阪、有馬溫泉】[2015 五日四夜跨年有馬大阪親子遊]Day2 (3之1) 陵楓閣日式早餐 + 邊行邊浸腳：「有馬溫泉街」

第二日（３１／１２）

早餐：陵楓閣及checkout > 有馬溫泉街及午餐 > 阪急高速巴士(有馬>梅田) > 住宿：新阪急酒店 > 梅田地下街 > 晚餐：無添くら寿司天六駅前店 > 玉出超市天神橋店 > 新阪急酒店

今日係2015年既最後一日，我地行程會由有馬溫泉返出去大阪市區，朝早在酒店食個早餐，行一行有馬溫泉街，食埋個LUNCH就走了。

由於瞳瞳爸爸先前訂了「一泊兩食」方案，所以早餐都會係酒店度食，不過今次就唔係自己房間食啦，要去另一層既室間度食，不過豐富依然：有飯、有魚、有麵豉湯、仲有個豆腐鍋，在冬天之下更加暖笠笠，一個好日本卡通片式的早餐，好好味！

瞳瞳自己飲哂碗湯

食飽早餐，整理好行李之後就check out，我地就請旅館安排私家車送我地去到有馬溫泉街，其實溫泉街就係酒店山腳，人行15分鐘，但車送落山就只係2分鐘！

其實有馬地區唔係太多景點，所謂「有馬溫泉街」都係呢一區比較繁榮的地方，在長途巴士站站旁。溫泉街係一條斜坡，兩旁都係溫泉旅館、賣手信店舖同餐廳，如果只係閒逛的話，大約一小時就可以遊畢。

地道的雜貨店

士多啤梨只係380 YEN!

有馬溫泉街

可以飲用的泉水

有馬玩具博物館，不過要收費的。可先看看介紹後才決定入唔入去～　http://www.arima-toys.jp/

中途有一個免費供大家「泡腳」的地方，叫「足湯」吧，於是我地都入鄉隨俗，試下「足湯」滋味。我見到泉水係黃泥水色，即係「金泉」，聞說對　風濕病、神經痛、婦女病、腸胃病　會好有效！在我地對面坐的一位婆婆，旁邊放了兩支柺杖，但也堅持來浸，希望真的有功效！

「金湯」的水

大家一齊浸，別有一番風味。

我地一家人齊齊浸腳！

呢度最出名的手信係「碳酸煎餅」，老字號只有一間，大家唔好去買錯啊！「煎餅」就好似我地香港果D薄薄一片的「蝦餅」，不過佢紮實好多！買到返香港，依然好脆口！有一種蛋香味，唔知係唔係有「碳酸」個名，瞳瞳爸爸覺得食完之後，喉嚨有種飲完汽水「炸炸聲」的感覺。

沿途有好多間買「碳酸煎餅」店，不過正店就係下圖介紹的呢一間「三ツ森の手焼炭酸煎餅」，正版的「碳酸煎餅」在塊餅的正面同底部都寫有唔同的字，翻版就只有一面有字。

三ツ森の手焼炭酸煎餅

店內的製餅機

原來有「堂食」

正面

底部有字：「元祖三津森本舖」

有「碳酸煎餅」就有「碳酸汽水」，味道同波子汽水相若，不過就好多「氣」。成個有馬地區都係賣呢個牌子包裝既「碳酸汽水」，仲有糖果添！

「碳酸汽水 + 碳酸糖果」套裝 = 570 YEN

看到長長的人龍，為的是「竹中肉店」可樂餅，是必食名物。130 YEN，牛肉混合薯仔然後即炸，竟然一點也不油膩，寒冬下反而更添暖意！

長長的人龍

終於到瞳瞳媽媽買啦

有馬地區仲有一個叫「人形筆」的手信，一支全人手製造的毛筆，而外觀就整到好似公仔咁，不過都幾貴，最平都要2000-3000 YEN，純粹睇下無妨。行到人形筆店舖的位置，已經差唔到去到盡頭，再前行是民居，所以認住人形筆就可以調頭返回原路落山。

落山時瞳瞳嚷住話要食雪糕，原來佢中途就見到有間雪糕店，入面有熱薑汁豆漿同軟雪糕賣，熱薑汁豆漿最啱冬天飲，雪糕就全年都啱食，雪糕份量好多，一直斟到落底，而個CORN個味道就好似碳酸煎餅的味道。

外貌好古樸

小店最啱小歇！

三個小朋友食雪糕

不經不覺，11點鐘酒店CHECK OUT，行左一小時溫泉街，已經到中午12點，因為我地要搭1300開往大阪的巴士，所以仲有1個小時食Lunch。我地決定直接係雪糕店對面的「有馬十八番」醫肚。

店子面積不大，只能坐15人左右，最出名係「明石燒」，明石燒其實係「章魚燒」的祖先。章魚燒沾醬食，但明石燒可以伴湯食。口感就章魚燒實淨D，而明石燒口感就滑D，好似玉子豆腐咁既味道。