行程終於到第2日啦!今日會去我地行程主菜之一 -「草津溫泉」!要去呢個被譽為日本全國第一的溫泉,就要坐一段長時間車程喇!由東京市區出發,起碼要大約3至4小時,不過深入有深入既好,環境純樸、遊客較少,最重要深入山區,希望可以遇上落雪啦!
我地朝早在新宿的酒店嘆完個靚早餐,就去前台寄存大行李喼,待明天回來再取,一家人就執幾件當晚草津溫泉會用的衣物,Pack一個輕便行李就向草津出發了!
新宿到草津溫泉交通攻略
去草津溫泉,主要有三個方法:
1. JR特急+巴士 (單程約5960日元) 上野站 特急 約150分>長野原草津口站 巴士 約30分>草津溫泉
2. 新幹線+巴士 (單程約8110日元) 東京站 新幹線約60分>輕井澤站 巴士約80分>草津溫泉
3. 高速巴士 (單程約3290日元) 新宿西口巴士站 高速巴士 約250分>草津溫泉
等我慢慢同大家分析下呢幾個方法啦:起初我揀住新宿的原因,是希望可以用方法3,一程過搭長途巴士,唔駛轉車,而且巴士總站正正係我地酒店的新宿駅附近,但考慮過係冬天行山路似乎「制唔過」,如果遇上落雪封路封山都幾麻煩。
如果用方法2,同方法1差唔多,同樣火車轉巴士,不過巴士時間亦要80分鐘,比方法1巴士時間多出好多,而且亦都怕冬天山路危險或封路。
最後決定方法1,火車比較穩陣,就算出面天氣幾咁惡劣都唔怕,火車入面空間大,洗手間等設施齊備,就算最後轉巴士,都只係半小時車程,小朋友點都頂到啦,而且可以用到「JR東京廣域周遊券」,記得買呢張Pass搭,抵好多架!
 |
三種方法去草津溫泉,我就建議用方法1較好 |
必食好味的火車弁當:「駅弁屋」
出發之前,一定要到新宿駅的「駅弁屋」買火車弁當,「駅弁屋」係集團連鎖式經營,遍佈全日本各大型的車站,當中又以東京駅的「駅弁屋祭」係最大間。雖然今次我地身處新宿的「駅弁屋 頂」,未算最大間,但種類已經夠哂多,眼闊肚窄,見到弁當咁吸引的外型,花多眼亂,款款都想試,價錢平均由1000 yen起跳,弁當的材料由日本各地不同的名產物做,由北海道食到九州,仲有小朋友見到一定鐘意既火車造型,嚟到日本不妨試下!
新宿駅的「駅弁屋 頂」,位於新宿駅南口入閘後就會見到,正正就係車站大堂落去9/10同11/12月台的扶手電梯之間。
 |
店外的食物模型已經好吸引 |
上野駅 > 崎京線(大宮方向) > 赤羽駅 > JR特急草津一號 > 長野原草津口
我地今次搭「JR特急草津一號」(火車名),「草津一號」在朝早1000由上野駅出發,去到「長野原草津口」落車,但因為我地住新宿,唔一定要去到上野總站上車,瞳瞳爸爸決定係新宿搭JR崎京線(大宮方向)到赤羽駅,在赤羽駅轉草津一號。(赤羽係草津一號在上野開出後第二個站)
買好弁當之後,就搭JR崎京線到赤羽駅,在赤羽駅要行去另一個月台轉「JR特急草津一號」,可能我地轉車既地方唔係大站,加上所見指示牌唔係太多,時間緊迫,唯有「路在口邊」,拎住車票向車站職員查詢,職員即刻話比我地知邊一個月台等車,非常順利,上到月台,剛好發現我地班車delay,時間又變得鬆動了!
上到車,記得跟返車票上的劃位坐,當日人太多,瞳瞳爸爸也要暫時同瞳瞳+瞳瞳媽媽分開坐。「JR特急草津一號」上有洗手間設備,都幾乾淨,格局似飛機廁所。開車不久,就有位服務員推住架車仔售賣各類唔同的飲料、小食,聽朋友講原來仲有雪糕賣,仲話幾好食添,可惜當時唔知道而錯過左,可惡呀~~~~
過左幾個站,有乘客會中途落車,我地終於可以坐埋一齊啦!(當然若有其他乘客上車,我地都要讓返座位出來) 車上嘅凳可以調轉方向,成為「面對面」位,如果一家四口就啱啱好!
 |
我地搭下面果班車,Delay 15分鐘~ |
 |
草津一號列車,車頭都幾型架!(下車後補回拍照) |
 |
因為人多,所以劃位時已知要分開坐,就忍耐一下吧,各自各精彩 |
 |
坐位非常舒適,就算坐兩個幾鐘都唔怕啦! |
 |
座位上方有擺放小型行李的空間 |
 |
火車上的洗手間位置 |
 |
車上的小賣部,有各類飲料、小食提供,價錢同在自助販賣機差不多。 |
 |
當乘客漸少,就快到終點站,我地終於有機會「面對面」坐~ |
 |
沿途風光 |
「我唔客氣啦!」準備食火車弁當!新幹線造型的弁當盒,絕對係小朋友的至愛!最抵死係連樽水都係火車造型,正!我地大人就叫左兩款不同既牛肉弁當,其中一個只要拉一下繩,就會發熱,打破火車弁當只會凍冰冰的想法!唔好以為弁當份量唔多,雖然細細份,但米飯壓得好實,夠車上飽肚架啦~味道仲好好味呀~真係想買多幾個弁當返酒店食當晚餐。後來發現不同的車站,有好多規模較細的弁當店,價錢仲比「駅弁屋」平,大約500 yen就有交易,大家不妨試下日本搭火車食弁當的文化啦!
 |
發熱的秘密~ |
 |
好好味~ |
 |
食飽要瞓真幸福~ |
經過大約2小時20分的火車車程,我地終於到達終點站 - 長野原草津口駅,車站好細,月台分左右兩邊,一邊係我地坐過來的「JR特急草津一號」月台,另一邊係「吾妻線」的月台。落車時剛好遇上「吾妻線」列車,外型古舊,網上一查,原來係1982年生產的「115系1000番台」,再配上黃色、綠色的湘南顏色舊火車,由城市淘汰到郊區用,如果見到不妨跟舊火車拍張照。
 |
同1982年生產的「115系1000番台」合照先 |
 |
月台好細,新舊兩列火車相遇 |
長野原草津口駅 > 草津溫泉
長野原草津口駅 真係好細,得一個出口,落車只要跟人群行就可以了。出閘後會見到一個巴士總站,放心,都係跟大隊行,基本上呢度落火車既人,90%以上都係去草津溫泉,所以出到去巴士總站既巴士,都係去草津溫泉!
問:「會唔會等好耐車架?」
答:「絕對唔會,火車同JR巴士互相配合,JR巴士會不斷加開班次直至載哂呢班火車的人為止,所以瞳瞳爸爸建議大家:先係火車上面去埋洗手間,之後直接出閘上巴士,唔好俾車站的商店吸引、唔好在車站廁所耽誤時間,萬一巴士以為接走哂乘客就會無哂車搭架啦~」
去到JR巴士站,工作人員會安排大家上車,唔駛心急,跟著佢地指示就可以了,大型行李可以放在巴士車廂下面的行李箱,「先上車坐定定,落車才俾錢」,大人700 yen,小人(6-12歲)350 yen,我地起初以為瞳瞳佔座位而要俾錢,所以一早準備好2大1小的車費,但落車果陣巴士司機問瞳瞳幾歲,我地就話「five」,結果佢反而退返錢俾我地。
再提一次,網上誤傳「JR東京廣域周遊券」包埋JR巴士,甚至有網友同巴士司機爭論情形。在此為JR澄清+親身體驗,其實「JR東京廣域周遊券」中的注意事項的第一條已經講明「不能乘坐東海道新幹線及JR巴士」,所以記得搭車俾錢啊!
 |
呢個位置可以見到,人流在右手邊出站,左手邊已經見到去草津溫泉的JR巴士 |
 |
放心,呢個站落車的人,90%以上都係去草津溫泉! |
 |
車站內有當地學校學生手織的坐墊 |
 |
車站內貼滿介紹草津溫泉的海報 |
 |
工作人員指示我地上車,今日人多,調動左好多巴士接我地,放心,一定載得哂! |
 |
來往長野原草津口駅及草津溫泉之間的JR巴士 |
 |
大人收費700 yen,小童(6-12歲)收費350 yen |
巴士上都好舒服,2+2座位,雖然山路彎彎曲曲,但路況好好,唔「鄧」!沿路見到好似狐狸的小動物,最令人振奮係見到路旁有小積雪!大約經過30分鐘左右車程,我地就到達草津溫泉巴士總站。
甫落車,就見到今晚我入住的溫泉旅館-「大阪屋」的職員,佢係一位男生,拎住大阪屋的旗仔等我地,但同一時間又有幾部JR巴士埋站落客,結果搞到佢要係幾部巴士之間走黎走去搖旗,怕我地搵唔到佢,最後終於俾我地「捉」住佢,職員好好禮貌,佢為我地走來走去,反而我地唔好意思就真!
因為佢要出去拎車接我地去溫泉旅館,所以着我地係侯車室等佢。我地順道參觀下呢個巴士總站:一座兩三層樓高的建築物,入面主要係巴士售票處、候車室、遊客中心、洗手間、紀念品店及餐廳。明天我地搭JR巴士去返火車站,同樣都係返嚟呢度搭車。
 |
草津溫泉巴士總站 |
 |
後面就係果位男職員啦~ |
 |
候車室 |
 |
遊客中心 |
 |
呢個女孩子公仔你會經常係溫泉區見到佢,佢係草津溫泉既觀光大使,日文叫「ゆもみちゃん」! |
好快我地就可以上車啦!其實由巴士總站到溫泉旅館大阪屋,只係5分鐘左右車程,巴士總站拐兩個彎,經過「湯畑」(當地著名景點,下文介紹)就到了,非常近!
 |
呢部就係溫泉旅館大阪屋接送我地既車啦 |
 |
雪地行走,要替車輪加上鏈 |
1. 駅弁屋
(內有不同車站的分店位置及營業時間)
2. JR特急草津一號資料
延伸閱讀:
2016聖誕節 東京+草津溫泉 七日六夜卡通親子遊 (準備篇)
2016東京+草津溫泉7日6夜聖誕卡通親子遊~「Day1 5之1:將更好的帶上雲霄:香港航空」
http://tungbama.blogspot.hk/2017/02/2016.html
2016東京+草津溫泉7日6夜聖誕卡通親子遊~「Day1 5之2:成田機場買「JR東京廣域周遊券」及乘坐成田N'EX到新宿」
http://tungbama.blogspot.hk/2017/02/201676day1-52jrnex.html
2016東京+草津溫泉7日6夜聖誕卡通親子遊~「Day1 5之3:新宿站6分鐘、交通便利、早餐非常豐富:新宿燦路都廣場大飯店」
2016東京+草津溫泉7日6夜聖誕卡通親子遊~「Day1 5之4:新宿站先取未來兩天車票>無添くら寿司@池袋>歷史悠久的「上野動物園」」
http://tungbama.blogspot.hk/2017/02/201676day1-54.html
2016東京+草津溫泉7日6夜聖誕卡通親子遊~「Day1 5之5:暖暖聖誕牛角燒肉放題>期間限定的溫馨浪漫燈飾>日本剪髮初體驗」
2016東京+草津溫泉7日6夜聖誕卡通親子遊~「Day2 3之1:出發去全日本排行第一溫泉~必食好味的火車弁當>新宿到草津溫泉交通攻略」
2016東京+草津溫泉7日6夜聖誕卡通親子遊~「Day2 3之2:全日本第一溫泉:「草津溫泉」+溫泉旅館 大阪屋(一泊兩食)」
2016東京+草津溫泉7日6夜聖誕卡通親子遊~「Day2 3之3:吾妻燒肉>草津溫泉傳統文化體驗:揉湯>漫步草津溫泉街、光泉寺、美食」
2016東京+草津溫泉7日6夜聖誕卡通親子遊~「Day3 2之1 溫泉旅館>JR巴士到長野原草津口駅>高崎駅>輕井澤王子OUTLET」
2016東京+草津溫泉7日6夜聖誕卡通親子遊~「Day3 2之2 輕井澤駅巧遇火車迷慕名弁當>新宿晚餐:日本麥當勞>宵夜:日本特色~屋台拉麵」
2016東京+草津溫泉7日6夜聖誕卡通親子遊~「Day4 2之1:人人期望可達到~藤子·F·不二雄博物館(多啦A夢全面睇)」
2016東京+草津溫泉7日6夜聖誕卡通親子遊~「Day4 2之2:日本平價門票專賣店-「大黑屋」介紹、為Ahiru No Pekkle而來,玩盡Sanrio Puroland+多摩市100yen店超好買+遇上地震經歷」
2016東京+草津溫泉7日6夜聖誕卡通親子遊~「Day5:東京迪士尼樂園」
2016東京+草津溫泉7日6夜聖誕卡通親子遊~「Day6:新宿站周邊散策-Yodobashi、和幸豬扒、博多天神拉麵、磯丸水產」
http://tungbama.blogspot.hk/2017/05/201676day6-yodobashi.html
2016東京+草津溫泉7日6夜聖誕卡通親子遊~「Day7:利木津巴士到東京成田機場」
http://tungbama.blogspot.hk/2017/05/201676day7.html
沒有留言:
張貼留言