瞳遊樂 (八十後香港家庭的親子旅遊blog)

2016年8月11日星期四

【泰國、布吉】2016 七日六夜泰國布吉親子遊攻略 - 「Man哥」安排接送及活動篇

機場自拍下先啦 =)

「自由行」同「參加旅行團」既最大分別，就係旅行團有領隊一路帶住你過關，去到當地就有導遊幫手安排上旅遊巴、行李擺放、行程安排、入住酒店等等一條龍服務！但自由行去到當地機場，自己拎左件行李，即刻遇上第一個問題：「點樣離開機場去市區／酒店？」

布吉機場不似香港、日本有機場鐵路，也沒有台灣的捷運。只有當地人會乘搭、班次疏落的機場巴士，或者要講價的「TAXI 的士」。

瞳瞳爸爸為左一家大細方便，又免卻「唔識講價而比人呃」之苦，在網上搵到一位專做布吉接送的「Man哥」，如果有睇準備篇，行程當中提及的「Man哥」就係佢啦！Man哥本身係土生土長香港人，廿年前移民到泰國布吉，可以話係同聲同氣，網上仲有其他的選擇，不過我介紹Man哥係因為我真係用過佢服務，而且佢好處係回覆你的速度好快，基本上幾小時或者更短時間內回覆，我地經過幾次Email聯絡，就扑鎚。

接送篇

先講下我地既經驗先，我地今次一共用了三次的接送服務，分別係：

1. 機場去 PARESA Resorts (800b)

2. PARESA Resorts 轉酒店去 Hotel Novotel Phuket Vintage Park Resort (600b)

3. Hotel Novotel Phuket Vintage Park Resort 去機場 (600b)

預先搵接送有個好處，就係佢地司機一早知道你酒店係邊，而且價錢講好哂，到時直接比車錢司機就可以，一家大細最緊要安全，唔想比人唔知車左你去邊，又或者臨時屈你錢。

在布吉機場拎好行李，兌換好泰銖之後，就離開海關行出去，見唔到司機唔駛驚，因為司機會係再直行出去outdoor戶外的地方等你！佢會將你既名字事先寫係塊牌度，出黎你只要搵返你個名就得，今次我地一出去就見到自己個名啦！然後司機叫我地企係度等一等，佢去拎車再揸架車黎搵我地，好有交帶！

p.s: 如果真係見唔到自己個名點算好，保持冷靜，唔好四圍行，打電話比Man哥(泰國電話卡攻略)，咁就得啦！

司機好人又可靠

之後第二日轉酒店，約好1230，我都知住的Villa比較偏僻，但Man哥安排的司機準時已經到達等我地，好surprise！

到第三日出機場準備返香港，兩個行李箱加一箱食物，又係好準時出現係酒店，所以你問我「Man哥」點?我只能答你佢安排得好好，正正因為我地好順利，所以唔駛點同佢「溝通」XP

每次用服務才每程收錢，唔駛一次過比哂！=)

活動篇

我地亦透過Man哥安排參加左「蛋島半日遊」，其實布吉有好多外島可以玩水，但瞳瞳第一次出島，我又唔知佢適唔適應快艇大風大浪，所以Man哥提議去蛋島，航程較短，沙灘魚多較適合有小朋友/ 長者同行，瞳瞳半日已經好夠玩。(對！之後證明呢個決定無錯！)

蛋島3島行程：

約07:30am出發酒店車接送(約50min車程)

09:00am開船(15min快艇)島上自由活動,

10:30am-11:00am安排出海浮潛50min 約12:30am回航，返到酒店約14:00pm-14:30pm

費用包括: 酒店來回接送/快艇接送/水果-小點飲品/出海浮潛50min/浮潛工具/保險

成人900b/位，小童 700b/位 (3歲或以下免費)

偏遠酒店需加每位1-200b Mai Khao 需獨立接載 1200b私家車來/回

再附上「Man哥」的收費表(2016年8月)，方便大家，有任何問題可以自行聯絡「Man哥」

機場---Paresa Resort Phuket 私家車每程 800b

酒店---機場私家車每程 600b

(由01/08/2013起…22:00pm後pick up或抵達航班將附加200b車費 ! 如為香港快運01:00am後到達/ 或pick up將不受接載服務...因為會影响司機日間駕駛安全!!)

單程轉酒店每程 600b私家車

行程及收費:

旦島3島行程: 費用包括: 酒店來回接送/快艇接送/水果-小點飲品/出海浮潛50min/浮潛工具/保險成人900b/位小童 700b/位 (3歲或以下免費) 偏遠酒店需加每位1-200b Mai Khao 需獨立接載 1200b私家車來/回

叢林之旅5in1

(A) 騎象30min/Fish Spa15min/小象show/猴子show/坐牛車/蘭花園/包接送成人1100b/位小童 800b/位 (3歲或以下免費) 偏遠酒店需加每位200b 每日2節09:30am/14:00每節約-2.5hrs 叢林之旅 5in1

(B) 騎象30min/小象show/猴子show/坐牛車/泰拳/泰菜示範/蘭花園/包接送成人1100b/位小童 800b/位 (3歲或以下免費)偏遠酒店需加每位200b 每日2節09:30am/14:00每節約-2.5hrs

租車連司機報價

私家車 6hrs/1200b起 10hrs/1800b (1-4位) 超時補200b/hr

VAN車5hrs/1800b 10hrs/2500b (11座位) 超時補200b/hr

VAN車5hrs/2000b 10hrs/2800b (14座位) 超時補300b/hr

*****租車時間內需要接機或送機或轉酒店(最後才回新酒店)等需另加收費 200b起, 屬偏遠酒店需附加200b/車費接機後先到酒店Chack In再租車出去.需計2程收費接機+租車接機後直接去玩至最後先返酒店接機費用計50% 送機前租車計送機費用50% 中途折返酒店每程200b/400b 要求路線暢順大佛需附加300b車費零晨後需附加200b車費

如租車同日需前往Rawai/日落崖及 Laguna區(Lemon Grass / Lotus rest)需附加200b車費出車前先跟司機商量好當天行程或可叫司機至電給Man哥,以便司機可以安排更暢順之路線

瞳瞳爸爸再老土都要講一句：「去布吉，有Man哥，無奔波！」放心可以搵佢幫手呀～

有用資料:

1. 布吉「Man哥」

網頁：布吉狂熱facebook：請按此

電話：0816911912
電郵：bj1998th@yahoo.com.hk

2016年8月10日星期三

【泰國、布吉】2016 七日六夜泰國布吉親子遊攻略 - 準備篇

又到夏天放暑假，今年瞳瞳特別鐘意游水咁，於是諗下有邊度有地方可以比佢游水同玩，最後瞳瞳爸爸決定：「向南亞進發」，之前我地去既地方都係台灣、日本，今次算係大鄉里首次「向南飛」，而且今次目的地係泰國渡假勝地　－　「布吉 Phuket」。

揀布吉既原因，當然係希望有陽光與游水，二來瞳瞳爸爸以前在旅行社工作關係，亦都經常去布吉，所以對布吉都有一定概念，比較容易掌握，三來呢度都係同瞳瞳媽媽相識的地方，原本都打算去相識地方「懷緬一下」，但當年果間酒店確係偏僻，唔方便今次帶瞳瞳去。

７日６夜布吉之旅準備出發！

開心等出發

機票篇:

香港有直航飛機到布吉，基本上有港龍（KA）、泰航（TG）、AIR ASIA（FD）同香港快運（UO），不過以FD同UO計，就可能比較適合年青人多一點，因為佢地都係晚上飛機去，抵達布吉已是凌晨，回程亦係由布吉下午（FD）甚至凌晨時間（UO）起飛。航程約３.５小時。

KA同TG比較適合我地一家大細，時間上KA更加優勝，早過TG飛，晏過TG返，玩到盡！我地揀左KA212 0855香港出發，回程KA215就1750布吉起飛，而且係提供Full service既航空公司，不是廉航，機票已經包括行李，飛機上亦提供視聽娛樂同飛機餐，各位爸爸媽媽絕對不用擔心。（瞳爸按：今次來回程的機組人員都提供好好服務，尤其回程的一位男服務員，非常客氣有禮，印象深刻！）

機票可參考：https://www.expedia.com.hk　（Expedia）
　　　　　　http://www.dragonair.com/ka/zh_HK.html　（港龍航空公司官方網站）

護照及出入境篇:

持ＢＮＯ或者特區護照，護照要有最少半年有效期（即６個月或以上），就可以進入泰國境內而不用簽證。

飛機上，空中服務員會派發「泰國出入境卡」，呈長條型，一定要拎，謹記前面同背面都有資料要填，入境時泰國人員會收起一半，另一半會繼續留左passport入面，請小心保管，因為離境時會把另一半收回。

（其他護照或證件可以致電泰國領事館查詢，地址：香港中環紅綿道 8 號東昌大廈 8 樓，電話：2521-6481。）

電話卡篇:

呢個時代，梗係想影完相即刻擺上網同朋友分享拎下「like」，我地就係深水埗鴨寮街買泰國上網電話卡，$45/張，包7天任上網及100thb既通話面值。我用iPhone 6s，瞳瞳媽媽用Samsung Note 5，即係iOS同Android 兩套System我地都有，嘩！好驚喜！兩部機唔駛Setting，只係插卡就可以直接用，不過瞳瞳爸爸都有以下心得：

飛機上熄電話＞熄電話情況下換卡＞忍住唔好開機呀＞抵達布吉機場才開手機＞之後會收到一大堆短訊＞上到網＞如果未上到網＞再重新開機一次

如果真係仲未得，網上有更多SETTING方法，出發前最好用上網搵左再CAP圖擺入相冊，唔好淨係抄link (你到時候根本上唔到網，抄link都無用)。

深水埗鴨寮街買的泰國上網電話卡，$45/張，包7天任上網及100thb 通話面值

兌換及時差篇：

機程約3.5小時，因為泰國比香港慢一小時，所以抵達機場之後就要把電話設定成泰國時區，以免以後日子誤了時間。 (簡單說：香港下午三點，泰國就是下午兩點，送你一小時青春！)

至於兌換錢方面，泰國用泰銖(THB)，如果你地好似我地咁會落去芭東區的話，建議機場先換少少錢，起碼比左去程酒店的車錢同少少錢傍身，最主要、最大舊的錢就留在芭東區兌換。機場基本上就間間找換店都差唔多，唔駛特別格價，當然個價亦無芭東咁靚，大概兌4.34、而芭東區就要格價啦，芭東區好多兌換店，「五步一哨、十步一崗」，仲多過7-11同Family Mart，當然想更加放心，可以介紹大家到「Jungceylon 購物中心」的地庫層，果度有幾間兌換店，果日瞳瞳爸爸見到由4.35 - 4.39不等，所以你要識揀。(最高亦試過在街上兌過4.41)

提提大家，泰國兌換錢係要登記passport，記得帶埋出街！

酒店篇：

PARESA Resorts

今次在平衡金錢同活動的情況下，我乎選擇左一晚Villa，其餘就轉往芭東的酒店。先講Villa，瞳瞳爸爸希望俾屋企人「豪」一次，希望揀一間有泳池的Villa，最好有而家最hit的infinity pool 無邊泳池，風景靚、影相靚，最後我地揀左位於Kamala 懸崖上的 "PARESA Resorts" ！嘩！太正啦！真係「天堂」一般的完美體驗，我地會在以後一一道來。

極級享受

PARESA Resorts：http://www.paresaresorts.com/

芭東 Hotel Novotel Phuket Vintage Park Resort

之後我地就搬去全布吉最旺最熱鬧的 Patong Beach 芭東海灘，芭東區的酒店有好多，閒閒地大大小小有二三百間，眼花撩亂，點揀好呢? 瞳瞳爸爸覺得去旅行不過放輕鬆，而且泰國天氣時晴時雨，最好揀一間就算唔駛出外都有活動既酒店，所以揀左 "Hotel Novotel Phuket Vintage Park Resort"，佢擁有全芭東區最大的酒店泳池！呢幾日既體驗非常好，我地都會推薦合家歡入住！一樣咁正！

擁有全芭東區最大的酒店泳池

Hotel Novotel Phuket Vintage Park Resort：http://www.novotel.com/gb/hotel-8099-novotel-phuket-vintage-park-resort/index.shtml

行程篇(行程大公開)

好多人問，布吉7日夜有咩玩? 其實住係一間靚Villa、一間正酒店，淨係入面嘆世界已經好正！

Day 1 香港機場　KA212　＞　布吉機場　＞　MAN哥安排接送　＞　PARESA Resorts check in (午膳、晚膳、嘆世界)

Day 2 酒店早餐　＞　PARESA Resorts check out　＞　MAN哥安排接送　＞　Hotel Novotel Phuket Vintage Park Resort check in　＞　午餐：Jungceylon 購物中心美食廣場　＞　Big C　＞　Swensen's雪糕　＞　晚餐：Dang restaurant　

Day 3 酒店早餐　＞　MAN哥安排：0745出發去蛋島，1400回到酒店　＞　午餐：路邊泰國麵檔　＞　酒店繼續游水　＞　酒店Lounge snack buffet & Welcome drink　＞　宵夜：街頭串燒、炸物及海南雞飯

Day 4 酒店早餐　＞　酒店繼續游水　＞　午膳：Beiley海南雞飯　＞　1345出發去 "SO Thai SPA" 4 Hours Luxury package　＞　晚餐：酒店BBQ海鮮自助晚餐　＞　芭東街頭閒逛

Day 5 酒店早餐　＞　1045-1300騎大象之旅　＞　的士由酒店往Central Festival Phuket　＞　午膳：Shabushi 迴轉火鍋　＞　步行去旁邊Big C　＞　的士回酒店　＞　晚餐：外賣麥當勞、路邊泰國麵檔

Day 6 酒店早餐　＞　的士由酒店往舊Ocean Plaza　＞　芭東海灘　＞　Jungceylon 購物中心及Big C最後衝刺　＞　午膳：MA MA Kitchen外賣　＞　酒店"PLANET 21" SPA　＞　晚餐MA MA Kitchen

Day 7 酒店早餐　＞　酒店繼續游水　＞　寄存行李　＞　午膳：路邊泰國麵檔　＞　MAN哥安排接送　＞　布吉機場　KA215　＞　香港

七日六夜的「泰國布吉親子遊」行程就咁決定左！好啦！準備好一齊出發去布吉玩啦！

感謝媒體報導轉載本文：2016/9/2

2016年7月27日星期三

【香港本地親子遊】「愉景灣繽紛盛夏」全港最大75米長巨型充氣迷宮 x 愉景北色彩互動樂園(活動已完結)

夏日炎炎，最好就是去海灘玩啦，但略嫌只有沙沙水水，想玩得更多，不妨走入大嶼山愉景灣去玩，而家交通方便左好多架啦！除左中環坐高速渡輪之外，仲可以係港鐵欣澳站同東涌站搭巴士入去添！

愉景灣入面仲多左個近年新開既「愉景北商場」，唔止沙灘咁單調架！

1. 夏日智激鬥！全港最大75米長沙灘充氣迷宮

全港最大沙灘充氣迷宮，長75米，闊15米，過萬尺的迷宮分三種不同高度，分別為1米、1.3米及1.8米，正式接受您的挑戰。當您衝過首兩關後，第三關才是挑戰的開始－設有多個障礙物及高台射水區，考驗身手與反應，包你越玩越刺激！參加者只需親臨大白灣沙灘即可全日免費任玩！刺激過後，不妨在沙灘上享受日光浴、碧波暢泳，然後往臨海露天美食區D’Deck 的餐廳細嘗各款夏日美食，度過悠閒寫意的一天。

夏日沙灘迷宮活動詳情

日期：2016年7月23日(星期六)至8月28日(星期日)，逢星期四至日
時間：上午11時至下午5時30分
地點：愉景灣大白灣沙灘
費用：免費任玩及不設任何消費要求
設備：沙灘設有淋浴花灑，另備免費沙灘傘及沙灘椅供遊人使用

2. 愉景北商場與您大玩特玩

愉景北商場同樣以色彩為主題，在廣場擺放了巨型色彩藝術裝置，以不同的彩色線條織出立體圖案，在陽光照射下，交織出獨特的幾何空間，營造出繽紛的夏日氣氛。

日期：2016年7月23日至8月28日，逢星期六及日
時間：上午11時至下午6時
地點：愉景北商場的露天廣場
活動：免費汽球派發及彩色泡藝表演
費用：免費

3. 愉景北商場‧色彩藝廊生動演繹色彩美學

相信大家對於顏色都不陌生，但不同深淺程度的紅、黃、藍、綠，你又可以說出多少種？這個逾千尺的室內色彩藝廊，擺放了巨型互動色輪(Colour Wheel)，藉著轉動巨型色輪可以了解各顏色組合時產生的混合色效；旁邊更陳列了不同深淺程度的顏色名稱，有趣之餘亦具有教育意義。

色彩藝廊的另一幅牆身則裝置了八百多顆彩球，讓大小朋友發揮創意，藉著轉動彩球來創造專屬的藝術作品。

愉景北色彩藝廊活動詳情
日期：2016年7月23日至8月28日，每天開放
時間：上午11時至下午6時
地點：愉景北商場G07號地舖
費用：免費

4. 愉景北商場‧創意互動工作坊把盛夏色彩帶回家

愉景灣特別為小朋友安排一系列工作坊，讓小朋友發揮小宇宙，創作與色彩有關的藝術小手工，把盛夏的色彩帶回家。

愉景北「創意互動工作坊」活動詳情
日期：2016年7月23日至8月28日，逢星期四至日
時間：中午11時至下午5時30分
地點：愉景北商場G06號地舖
入場：於愉景灣指定商戶2消費滿港幣100元，即可以優惠價港幣50元購買工作坊入場券乙張。憑即日有效入場券可參加創意工作坊一次，數量有限，先到先得，額滿即止。