瞳遊樂 (八十後香港家庭的親子旅遊blog): 【日本、大阪、有馬溫泉】[2015 五日四夜跨年有馬大阪親子遊]Day2 (3之2) 一程車就可以由有馬溫泉直達梅田 + 外出、行街極方便「新阪急酒店」

2016年1月13日星期三

【日本、大阪、有馬溫泉】[2015 五日四夜跨年有馬大阪親子遊]Day2 (3之2) 一程車就可以由有馬溫泉直達梅田 + 外出、行街極方便「新阪急酒店」

第二日（３１／１２）

早餐：陵楓閣及checkout > 有馬溫泉街及午餐 > 阪急高速巴士(有馬>梅田) > 住宿：新阪急酒店 > 梅田地下街 > 晚餐：無添くら寿司天六駅前店 > 玉出超市天神橋店 > 新阪急酒店

我地在30/12抵達有馬溫泉當日，因為去酒店的路上會經過巴士站，順路入去售票處買定巴士車票。最重要係擔心31/12果日會有好多人出大阪，所以我地早一日就搞掂好。(可以今日買定聽日既車票)

巴士由「阪急高速巴士」公司營運，今次我地出去梅田，所以就揀「有馬溫泉<>梅田」的巴士線，呢條巴士線分兩種：「特急」同「急行」，價錢一樣，分別係咩呢？

「特急」：有馬溫泉　＞　中途不停站　＞　大阪（梅田）　全程55分鐘
「急行」：有馬溫泉　＞　千里ニュータウン　＞　新大阪　＞　大阪（梅田）　全程60分鐘

就係一個直達、一個停站既分別，但大家無睇錯呀，佢地相差只係5分鐘，所以無論你揀「特急」定「急行」，分別都唔大。大人票價1370 YEN，小朋友佔座位700 YEN，我地幫瞳瞳買左一張佔位既車票，比佢坐得舒服D。上車果陣要自行將行李放在巴士下面的行李廂，到站自有工作人員拎行李出黎比返大家。

巴士在梅田既總站，正正就係我地住的酒店 - 「新阪急酒店」，亦係瞳瞳揀呢間酒店既原因，真係夠哂方便，酒店地下其實正正就係大阪市的長途巴士站，而且亦係去關西機場巴士的總站，稍後再介紹酒店 =)

有馬溫泉長途巴士站，買車票及侯車區都係間屋仔入面

已經編埋座位6A,6B,6C

巴士都好寬敞，座位２＋２排列

到達車站，剛剛好1小時！

上次我地住「難波」，今次住「梅田」，大阪人會用「南」(難波) 同「北」(梅田) 去區分呢兩個繁華市區，梅田交通非常方便，基本上大阪的鐵路系統都係呢度交匯，在路線圖見到「梅田」、「東梅田」、「西梅田」及「大阪站」都係指呢個地方，另一方面又被一大堆百貨公司、商店街同龐大地下街圍住，我覺得比難波更好行街，因為難波以商店街為主(南海通、道頓堀及心齋橋等)，但梅田就以百貨公司、購物中心及地下街為主，似乎梅田適合一家大細多D。

跨年揀住呢度，希望可以「一佔地利」搶到福袋，但百貨公司1/1都休業，要到2號先可以開賣。

簡單的地圖，圈出幾個重要地方(美工不美，請諒)

酒店附近的百貨公司：
大丸百貨 (TOMICA SHOP、SANRIO、東急HANDS)
阪急百貨 (地庫超市值得留意，價錢比較貴)
阪神百貨 (地庫超市值得留意，價錢比較平)
ISETAN

購物中心：
GRAND FRONT OSAKA
HEP FIVE (摩天輪地標)
Yodobashi (賣文具用品、電器必到)
EST
驚安殿堂・唐吉訶德 (梅田分店)

全幢品牌：
UNIQLO & GU
ABC-MART
H&M

地下街：
Whity
阪急三番街 (其實可以話佢地相連，大到不得之了)

真　係　行　到　腳　跛

今次揀左「新阪急酒店」，酒店位置好重要，如果方便，在旅程中可以慳了不少時間，玩完一整天又可以快D返去休息下。
新阪急酒店係阪急集團旗下，大家最熟悉的一個業務就係「阪急電鐵」，仲有就係「阪急百貨」。我去過幾間訂日本酒店的網站，如japanican、jalan、樂天等等，到最後發現原來申請做「阪急」的會員，以會員價訂房會仲抵，於是瞳瞳爸爸就申請做會員，會員卡仲由日本寄來香港家中，反正阪急酒店遍佈全日本，開定一張無蝕底。(check in要出示會員卡，記得帶！)

酒店全幢大約10層樓高，分南北兩翼，我地住9樓，向街景，斜對面就係賣電器必到的Yodobashi；房間講真比較細，行李箱也不能完全打開；鎖匙仍然用真正鎖匙；酒店有中央暖氣，所以熄「空調掣」間房反而會無咁熱，另外會提供吹風機比客人，無咁焗；洗手間竟然有男士洗臉套裝提供，可能覺得女士會自備吧！不得不提，酒店Ｂ１地庫層係連接「阪急三番街」（地下街），過幾個舖位就係大阪地下鐵御堂筋線其中一個車站大堂。