café bar on 8，呢間餐廳一直收藏係瞳祈爸爸心中的名單，餐廳位於中半山，就咁講就好玄，麥當勞道大家又知唔知呢？為你再補多一句：考急救證書St.John總部果度呀！我諗好多考過急救證書即刻知邊度！啱啱碰上瞳祈媽媽平日放假，因為café bar on 8 半自助午餐只係星期一至六供應，咁我就提議不如一試啦！
大家搭交通工具出發，可以由金鐘港鐵站B出口，力寶中心旁邊，搭城巴12A巴士往麥當勞道，在「女青年會」站落車，對面就係St.John總部及麥當勞道貳號大廈，而café bar on 8就係麥當勞道貳號大廈入面啦！
如果自已揸車，就可以先同保安叔叔講聲，在café bar on 8用餐消費，會有兩小時免費泊車優惠。
我地自駕，泊好車後直接由電梯上餐廳，餐廳名叫「café bar on 8」，即係餐廳位於大廈的8/F，真係估中！
8樓亦係同幢高層酒店的大堂，左手邊先係餐廳的入口，入去之後立即有餐廳職員招呼安排我地入座，非常殷勤，抵讚！
我地入去時間正正係半自助午餐剛剛開始，所以人未算多，服務好好，仲幫我地安排BB凳同餐具俾豬小B～
趁人客未開始多，我帶小B四處走走，因為餐廳位於中半山，又係八樓，可以居高臨下，望到動植物公園、中環金鐘一帶商業區的高樓大廈，身邊就給大樹包圍，好有一種遠離繁囂、城市綠洲的感覺。
我同瞳祈媽媽最後決定，既然千里迢迢嚟到，咁就試下最貴果兩個：
馬賽什錦海鮮湯配比目魚柳(+$88) 同 燒美國西冷牛扒(+$88)
點完主菜，我地就出去自助餐檯睇下有咩食，雖然係「半自助餐」，但食物種類都非常豐富，完全唔會有「揸流攤」的感覺
竟然有海鮮：鮮蝦同青口，而且非常新鮮！一定要食！
沙律吧的調味有好多配搭，凍肉都不少，煙三文魚介紹係自家製，好受食客歡迎～
左手邊湯水竟然係：清補涼
右手邊係糙水：腐竹熱豆漿
兩個都好好飲，出面餐廳勁少見
甜品區除了生果、糕點，連朱古力噴泉都有，如果瞳瞳係度一定非常開心（當日瞳瞳要返學呀～哈哈）
但炸物同蒸點就比較一般，炸物當中有一個叫「炸馬蹄糕」咁，我真係唔太啱口味。
豬小B都換上圍巾，開餐！
主菜嚟啦！燒美國西冷牛扒，我地叫medium，都算整得幾好幾近medium，肥肉位燒得好好味，你唔會覺得係肥肉，只係一塊比較「林」的肉。我地推薦！
至於馬賽什錦海鮮湯配比目魚柳，個湯底好好味，睇得出真係用心整，不過比目魚柳就麻麻地，有點雪藏味道。如果同樣價錢，似乎牛扒就抵食一點。
凍咖啡作為總結，我地走的時候已經有不少人入座，不過空間好大，我地可以輕鬆坐下、慢活一下！
豬小B：好舒服的一餐啊！
呢度感覺好舒服，食物質素又高質，就連客人的質素都高質，所以就算自助餐都可以悠悠閒閒咁享受，過一日慢活生活！用餐後可以帶小朋友到鄰近的動植物公園、香港公園玩，亦都可以走到附近麥當勞道纜車站睇下山頂纜車上上落落，都幾得意架！
有用資料:
1. café bar on 8
逢週一至週六供應 上午11 時半至下午2 時半
半自助午餐連主菜
成人: HK$98 + HK$48 起
小童: HK$68 + HK$48 起
地址：香港半山麥當勞道貳號8樓
電話：21322688
沒有留言:
張貼留言