瞳遊樂 (八十後香港家庭的親子旅遊blog): 【台灣、高雄】帶住一個多月大「小B」去旅行

2018年5月15日星期二

【台灣、高雄】帶住一個多月大「小B」去旅行　－　高雄大魯閣草衙道(Taroko Park)

「高雄捷運」，瞳瞳爸爸一直都大力推介，非常方便大家係高雄市內玩，今次介紹既地方，就係2016年5月才開幕的大魯閣草衙道(Taroko Park)，號稱「亞洲最好玩的購物中心」，是台灣高雄市的大型購物中心，佔地8.6公頃，集購物商場、國賓影城、健身中心、賽車場與酒店於一身。

先看看大魯閣草衙道(Taroko Park)的官方自我介紹：我們想給您處處不停歇的歡樂與驚喜！大魯閣草衙道不僅僅是一個購物中心，您可以定義這是最令人期待的國際級大型購物中心，還可以稱這是一座不需要購買入場券的遊樂園，這裡擁有多重面貌、無數可能，匯集了遊逛、購物、餐飲、運動、娛樂、親子、休閒、度假…所有令人嚮往著迷的元素，還擁有全球唯一日本鈴鹿賽道官方授權的國際級卡丁賽車場，這裡像是24小時精彩上演的奇幻劇場，從踏上樂土的這一刻開始，忘卻煩憂，盡情歡樂！

究竟有幾好玩呢？我地出發睇下咯～今次亦都係祈祈第一次出發啊！

大魯閣草衙道(Taroko Park)位於高雄捷運草衙站(車站編號:R4A)，一落車，成個月台已經佈置好多精美卡通圖案，與別不同！

之後一直有地下通道由捷運站連結至購物中心(2號出口)，有哂清楚指示，唔駛擔心打風落雨。中間有好多場景可以影下相。

行出捷運站，就已經係大魯閣草衙道(Taroko Park)，呢度集購物中心、主題樂園於一身，地方好大好空曠。

小電車連接入口處至主題樂園，遊人可以安坐上車，慢慢欣賞兩旁店舖風景，不過要收費架，其實步程唔遠，呢架電車「綽頭」居多，大家影下相就無妨。

其實一直行到尾就會到達主題樂園－「鈴鹿賽道樂園」，「鈴鹿賽道樂園」由日本引入，係全台灣唯一的「駕駛」主題樂園，樂園方面想將交通教育與安全之觀念融於娛樂間，同時也能達到親子互動學習的目的。

我地在樂園入口處遇上呢度的卡通人物，雖然唔知咩名字，但佢地好nice，最緊要小朋友開心。

主題樂園入場係唔收錢既，全開放式，玩果樣、才俾錢！

點樣俾錢呢？有兩個方法：第一，去樂園客務中心買套票；第二，直接排隊用高雄捷運一卡通比錢，就好似我地香港的八達通卡一樣。（為了方便穿梭高雄市玩，瞳瞳爸爸建議大家買張高雄捷運一卡通旁身會比較方便）

呢度可以分為「迷你鈴鹿賽道」、「小小城市」同「技能培訓村」三個部分，前者係小型賽車跑道，比較啱大朋友，我地＜瞳遊樂＞就主力介紹「小小城市」，介紹俾小朋友。

酷奇拉駕駛學校、小小騎士、滴答電車、甩尾小車手、摩天輪呢幾個遊戲，當中的酷奇拉駕駛學校、滴答電車同摩天輪，我地係覺得幾值得玩：

酷奇拉駕駛學校：小朋友扮係駕駛學校咁學揸車，旁邊可以坐一個大人，一大一小出發，途中除左揸車，仲有好多任務要做，例如指定路口停車、響按等等。完成之後會計分，合格仲會發一張駕駛執照留念，瞳瞳就拎到啦！

滴答電車：要係限時內揸電車完成一圈，太快太慢都唔可以～最開心係提供司機帽比小朋友戴，十足一位車長！而且電車又可以容納我地一家四口，好開心。瞳瞳雖然係女孩子，但都覺得好好厄，我地仲玩左兩次添～

摩天輪：可能你以為無咩特別，但呢個真係非一般的摩天輪，佢係高速摩天輪，比平時一般的快，坐在車廂內係完全係唔覺得快，反而轉返落地面果下經過上車位、控制室，就會感受到「速度」！在摩天輪上面可以望返落嚟成個樂園，仲見到玩小型賽車個場地添！我同瞳瞳都玩到呢個摩天輪，佢仲話一Ｄ都唔驚喎～

購物中心連地下一共三層，入面都好大、好多商店可以行，購物中心唔太多特別講，大家自己可以行下。不過入面有兩樣野推薦：第一，地下有個設備非常齊全的「育嬰醫護室」，入面有換尿片的地方（免費提供尿片）、冷熱水、暖奶器、母乳餵哺室等，地方好大，環境舒服。第二，3/F有個好大的美食廣場，面積好大，提供好多不同台灣及其他地方的美食，價錢公道，座位又多，啱哂一家大細。