【香港本地】【美食】【上環】與小朋友感受昔日香港茶樓文化～蓮香居

「飲茶」係我地香港一個本地文化，源遠流長，仲係好多香港家庭放假共聚天倫的好活動。

昔日「塘西風月」年代太遠唔講，只係講瞳祈爸爸我自己觸及到的年代：我係80後，都經歷過「點心車」，之後酒樓取消推車仔，改為「點心大排檔」，行出去一個檔口自己拎野食，到今時今日又唔同咗，改為「劃點心紙」，但就無左以前揀點心的風味。

以前我細細個已經「肩負」起為屋企人揀籠好點心的「重任」。我相信你同我都係一樣，哈哈，潛規則係最頂一籠點心唔好要，因為人人揭起過，要揀下一籠或者再揀多幾籠，以點心份量同靚唔靚仔為考慮～

香港舊式的茶樓，我細細過都跟過爸爸去過位於旺角的「得如茶樓」(已關門大吉多年)，一盅兩件，仲可以帶埋雀籠上茶樓掛係窗邊，檯底有個痰罐之類供茶客「飛劍」或者倒水，門口買份報紙睇，已經可以消磨大半日，但時代變遷加上衞生要求提高，今時今日已經不復見。

仍然以舊式運作的茶樓雖然唔多，最出名係中上環一帶，好多遊客都會去1927年開業的「蓮香樓」、「蓮香居」，既然遊客都慕名而來，我地本地香港人都唔好執輸，帶埋小朋友去感受一下香港獨特的飲茶文化啦！而家「蓮香」旗下的姊妹店一共有三間，中間幾歷數次變遷：(截至2019年為準)

1. 「蓮香樓」位於上環威靈頓街162號，2019年3月起由原有員工接手，並易名「蓮香茶室」，因為得一層，唔太建議帶小朋友去迫。

2. 「蓮香居」位於上環德輔道西40-50號，有兩層可接待人客，我覺得叫做比較企理，帶小朋友較方便，所以今次我地會試呢間。

3. 「蓮香棧」位於荃灣綠楊坊L1樓P9-9A號舖，2018年開張新店，不過我覺得還是上環那邊比較有味道。

一入蓮香居，地下係「蓮香餅家」，賣中式禮餅、糕點、中秋月餅、粽子和賀年糕點等，一般來說，過新年、中秋節前夕等大時大節，餅店都會非常熱鬧！

由升降機上去，前文提及過「蓮香居」有兩層招待茶客，2/F及3/F的分別在於平日營業時間及3/F有貴賓廳，貴賓廳不設搭檯，另收加一。

因為蓮香居實在本地同遊客都多，我地好不容易才找到位子，起初你可能會感覺一眾夥計叔叔好似無咩表情，但其實佢地個個都係「鐵漢柔情」，好細心，每逢倒水都提醒我地小心，就連餐牌都特別提點小朋友要小心𠝹手，後來仲同豬小B玩添！

蓮香居佈置懷舊風格，雙層圓枱、厚重木櫈、茶盅、水壺、雀籠，保持老茶居風味。

坐低開位，夥計叔叔見到你一家大細合家歡，會自動波幫你改用平時酒樓的普通茶壺，不過話明要感受舊茶樓文化，我就同夥計叔叔講：想比小朋友睇下用舊時獨有的「茶盅」，佢地都好樂意幫手的！我地成日用「一盅兩件」去形容去飲茶，一盅就係指茶盅，兩件就指點心。

滾水呀！

用「茶盅」倒茶都係一種學問～

「茶壺」、「茶盅」有齊哂！

「水滾茶靚」就係靠呢個大水煲啦！

講完「一盅」，再講「兩件」，雖然未舊到用托盤傳點心，但點心車仍有，每次點心車一出，好多茶客都會立即上前出去拎野食，唔會執輸！呢度除左點心，其他炒粉麵都有架！

如果點心車太多人都唔緊要，好似我地咁坐定定一樣有野食，其實點心車都會出好多次，唔怕無得食。大家可以視乎自己口味，我覺得既然一場嚟到，梗係食下懷舊點心、或者出面唔常見的點心啦！

牛柏葉：可能西環都係老區，所以蓮香居牛柏葉煮得好稔好好味！跣住落去咁！

鳳爪排骨飯：豬小B同瞳瞳兩姐弟好鍾意食，飯煮得好，豬小B可以食半煲，瞳瞳就覺得入面排骨好好食！

山竹牛肉：去舊茶室反而要食呢D簡撲點心，因為簡單點心才可以考驗功力！牛肉夠紮實！

蝦餃：同而家酒樓不一樣，蝦仔細細，同肉陷各佔一半，再伴入少少竹筍，就係細個果種蝦餃口味啦！

叉燒腸粉：據聞蓮香居燒味都好好味，但我地試唔哂所有食物，唯有叫個叉燒腸粉頂住先，入面的叉燒陷由頭帶到尾，足料！

臘腸卷：最後嚟個臘腸卷，臘腸係唔係蓮香居自家造我就唔知喇，不過茶樓位於西環海味街入面，如果唔係好野一定俾街坊鬧到豬頭咁！臘腸我食落就好好味，好香，仲唔會太油太肥膩！

豬潤燒賣同桑寄生蛋茶，要特別拎點心卡出去向收銀姨姨落單的！

豬潤燒賣：一碟有兩件，舖上大大塊豬潤，蓋過肉餡～

桑寄生蛋茶：正所謂「益肝腎」、「滋潤」、「安神」，加上糖就成為糖水咁食，另外佢仲有推介盅頭湯（好似$50/盅），下次要試試！

食得好滋味！

一邊飲茶，一邊同瞳瞳講下以前我地細個去茶樓的往事，好開心！希望呢種文化可以一直傳承落去。「飲茶」唔單止飲飲食食，仲係一家人、甚至係一個家族聚首的機會，互相交換彼此近況、互相關心對方，才是飲茶文化之中的深層意義！

蓮香居食飽飽後，可以帶小朋友去西港城、中山紀念公園、摩囉街，甚至搭下電車都得，都好方便其他行程！

有用資料: 

1. 蓮香居

地址：上環德輔道西40-50號
電話：2156 9328
交通：

A. 港鐵上環站A2出口，出口後向左手邊行，沿電車路向西港城方向步行約10分鐘

B. 港鐵西營盤站A2出口，出口後向右手邊行，沿電車路步行約5分鐘

C. 電車西行(往堅尼地城/石塘咀/屈地街方向)「修打蘭街」站(編號:82W)下車，向車尾步行約5分鐘

D. 城巴1(摩星嶺),5B(堅尼地城) 隧道巴士113(卑路乍灣),905(荔枝角) 「皇后街」站下車。