2019年復活節，我地無去外遊，因為讀小學的瞳瞳姐姐已經好難請假，又夾唔到老婆的假期，所以我地只留係香港玩！當然，唔會悶到我地既，其實只要保持一個出去外地玩的心，留係香港都可以好開心。
今次我地再度重臨位於薄扶林既「The T Hotel」，上一次我地的體驗大家可以參考：(內有洋蔥) 鮮為人知香港的訓練酒店，培養旅業新力軍，無敵大海景～「The T Hotel」
無他～皆因我真係好掛係住呢間酒店（毛管戙呢？哈哈），價錢唔貴，大約$1000，就包一晚全海景客房+翌日自助早餐，咁就可以玩兩日一夜啦！
出發啦！
我地新界人，由馬鞍山屋企揸車出發，「又越過高山又越過谷」，終於嚟到位於南區薄扶林的「The T Hotel」；如果大家搭公共交通公具，係文章最底我地會介紹埋途徑的巴士路線，放心！
把車子駛入去，就有保安指引我地泊車位（需預先向酒店查詢），然後入大堂check in～
「The T Hotel」既係酒店，又係學校，因為佢係培育我地香港酒店旅遊業的同學。大堂係正常的酒店格局，我覺得明亮、舒服、整齊過其他本地酒店添！
兩個小朋友係我CHECK-IN時玩黎玩去，搞搞震，好可愛～
同學帶我地上去房間，仲好細心介紹房間內各樣設施，雖然我地上次黎過，但可能有其他資訊今次update咗呢，我地好支持佢地呀！
介紹之後，瞳祈媽媽發玩房內有一個擺設，原來係一個復活蛋造型的朱古力，下面的小杯仲載住有沾上綠茶粉、類似果仁的小食，好特別好有心思！
房間安排有兩張雙人大床，空間感足夠，點瞓都得！
浴室入面「浴缸、淋浴」兩種都有，浴缸設有電視，可以邊睇邊沖涼～哈哈～真係好享受！
酒店安排了BB床俾豬小B，豬小B越大越古惑，先係扮瞓覺..........
BU BU..........
...............渣！
至於家姐瞳瞳手上的就係酒店的handy智能手機服務，佢可以讓訪港旅客在入住酒店期間，用呢部手機在香港境內上網，仲可以免費致電比指定的11個國家，外國人來香港真幸福！至少唔駛再為電話卡而煩惱！
幾嘆，佢呢兩日有屬於自己的智能手機，幾開心～
夜晚我地去同一層的訓練餐廳，果度環境舒服優雅，對出有露台，亦係向海。餐廳門口有學員做的復活節裝飾，好靚又有心思！
點餐方面，今晚有復活節套餐，期間限定，就一於食佢啦！
我地揀咗4 courses的晚餐，$298份，一共點了兩份。同樣地在廚房內工作的，都係實習同學！
餐廳都準備好兒童餐具，豬小B準備就緒！
前菜：Bolied white asparagus～唔新鮮的蘆筍會係苦的，但呢度蘆筍好新鮮，好易入口，煮得夠「林」，我切細細舊俾豬小B佢都食到！舖係上面的蟹肉份量夠，唔孤寒，抵讚！
餐湯：Essence of Chicken～一款歐洲常見的餐湯，佢雖然叫Essence of Chicken，但又唔感覺到雞的腥味，反而似洋蔥湯，清清地但幾好味！瞳瞳話「唔飲唔飲」但又飲哂我的！（哼！）
主菜3選1，因為我地有兩個餐所以點兩個，我地就揀咗Trio of Easter lamb同Steamed Atlantic cod fillet～
先講Trio of Easter lamb，羊架熟度叫medium（５成熟），對板！邊邊有幾年肉塊係中東烤肉，肉入面混有中東香料，辣辣地，越食越惹味。伴上couscous（中東米），令成個碟的配搭好豐富！
Steamed Atantic cod fillet 鱈魚我影得唔夠好，其實佢係好大件，份量足足夠我、老婆同家姐三個人分，肉質非常嫩滑！配菜就平平穩穩，都唔錯！
甜品我地就每樣叫一個：Easter Egg～說穿了，蛋黃係芒果造，外殼係朱古力，又有外型又好味道，好食！
呢一個係Carrot Cake～都係西餐上的經典甜品蛋糕，有個小蘿蔔點綴，蛋糕好吃，旁邊的肉桂雪糕，出面好少食得到，正！雪糕底舖滿果仁碎，做成果仁雪糕咁既美味口感。
吃飽一餐，全家去健身中心玩下，家姐同瞳祈媽媽就玩單車機，而豬小B就玩人地瑜珈彈彈波，走來走去好開心～
翌日天氣亦都轉好，不過兩姐弟玩到累透了！對我來講最大滿足係佢地兩個小朋友感情非常好～忍唔住拍低呢個畫面～哈哈～至於翌日早餐，大家可以參考返上次的一篇文（請按此），因為都係大同小異，我地非常滿意。
花絮：老婆係餐廳，無意中自己沖左心形拉花的咖啡喎～哈哈～
其實酒店旁邊行五分鐘就係法定古蹟：伯大尼修院，出面大路就薄扶林道，去中環、上環、西環，或者落香港仔都好方便，兩邊車程都不過10-15分鐘，香港仔可以食下「艇仔粉」、帶小朋友坐下舢舨、珍寶海鮮舫、香港仔中心商場、鴨脷洲風之塔公園等等。其實南區真係好多野玩，點止得海洋公園咁簡單！
有用資料:
1. The T Hotel
地址：香港薄扶林道145號職業訓練局薄扶林大樓6樓
熱線：(852) 3717 7388
傳真：(852) 3717 7377
電郵：res-thotel@vtc.edu.hk
網頁：http://www.thotel.edu.hk
交通：新巴及城巴報站系統播報，會列出「薄扶林村、職業訓練局薄扶林大樓」（Pok Fu Lam Village, VTC Pokfulam Complex），下車後沿職業訓練局步行５分鐘就到
新巴
4 華富（南） - 中環
91 中環碼頭 - 鴨脷洲邨
970 數碼港 - 蘇屋邨
970X 香港仔 - 蘇屋邨
城巴
7 中環碼頭 - 石排灣
30X 數碼港 - 中環（交易廣場）
37A 置富花園 - 中環（循環線）
37B 置富花園 - 金鐘（循環線）
40 華富（北） - 灣仔北
40M 華富（北） - 金鐘（政府總部）
71 黃竹坑 - 中環（永和街）
90B 海怡半島 - 金鐘（東）
973 赤柱市場 - 尖沙咀（麼地道）
A10 機場（地面運輸中心） - 鴨脷洲邨
沒有留言:
張貼留言