瞳遊樂 (八十後香港家庭的親子旅遊blog)

2016年1月8日星期五

【日本、大阪、有馬溫泉】[2015 五日四夜跨年有馬大阪親子遊]Day1 (4之3) 六甲山滑雪場的冰雪之旅

第一日（３０／１２）

香港機場出發 > 關西空港 > 神戶高速船 > 三宮車站 > 有馬溫泉 > 住宿：陵楓閣 > 六甲有馬索道 > 六甲山滑雪場 > 六甲有馬索道 > 陵楓閣浸浴及專人服侍用餐，食神戶牛

我地終於排除萬難，「搭車又搭船」+「又越過高山又越過谷」，終於到「有馬溫泉」了！「有馬溫泉」大抵分為兩種泉水：

「金泉」(黃泥水色)：風濕病、神經痛、婦女病、腸胃病

「銀泉」(透明水)：慢性消化系統疾病、慢性便秘、痛風

講完泉水就講下佢個地理形勢，基本上之前坐既電車「有馬溫泉站」係最低點，中間有一條河川把山谷一分為二，而大部份的溫泉旅館都係依山而建，所以拎住行李再行上去的話都幾辛苦！但你有酒店電話號碼或者事先預約，佢地都有私家車接送往返車站。以我地今次入住的「陵楓閣」為例，其實就係「有馬溫泉站」旁邊的小山崗上，人行就15分鐘，車送就只要大約2分鐘。因為我地係外地黎，好難同佢事先預約(唔知幾點到)，所以唯有自己行上去，都好，順便了解下附近環境，方便出入。

旅館果Part容我再下一章同大家慢慢講解^^。我地一大早到，首先將行李拎去「陵楓閣」去寄存，問酒店拎地圖同再與酒店人員確認一下，就出發去行去搭「六甲有馬空中索道」。

有馬溫泉步行20分鐘　＞　有馬溫泉索道站　＞　六甲有馬空中索道 15分鐘　＞　六甲山頂索道站　＞　巴士 8分鐘　＞　六甲山滑雪場

首先想講，由旅館 (當我地係「神戶電鐵有馬溫泉站」) 行去索道站，係非常非常非常之遠，沿車路一直向山上行，全程上斜，最弊既係沿途無指示牌話你知方向，真係要靠地圖同手機GPS，經此一役，或者大家試下同酒店/旅館deal下，可唔可以用私家車接送去索道站。

沿路真係無咩指示

沿公路行上去，大約20分鐘

終於到了！

去到索道車站，就要買索道車票，成人單程車票１０１０ YEN，來回車票１８２０ YEN，所以我地買左來回車票。索道纜車每小時１０、３０、５０發車，佢係一個細細既車箱，主要以企位為主，大約可以容納最多３０人。車內有個控制員，最主要係控制車廂的廣播系統，我估內容係介紹沿途風景，可惜係日文我地聽唔明。雖然係咁，但沿途山色秀麗，有好多杉樹。

來回票合共1820 YEN

索道纜車到啦！好似一個小型盒子。

一上車，唔知邊度出現左咁多人！排隊果陣都無咁多人架！

坐15分鐘到達六甲山頂站

去到「六甲山頂站」，我地仲要搭巴士先去到滑雪場，六甲山上的巴士以循環線形式運作，由「六甲山上站」開往「六甲山頂站」調頭返「六甲山上站」。要知道「六甲山上站」同「六甲山頂站」係兩個唔同地方，如果要搭索道纜車返去有馬溫泉，就要去「六甲山頂站」，回程唔好上錯車！

索道車站門口就有巴士站，因為我地係山頂循環點，所以方向就只有一個，唔會搭錯車！車費１８０ YEN去到滑雪場，巴士乘搭方法係：中門先上車，前門落車果陣才比錢，車箱內有報站器通知你巴士站名。

索道車站外的巴士站

穿梭六甲山上各個景點的巴士，班次好疏，20-25分鐘一班，不過就準時到達。

瞳瞳鍾意自己坐車頭單丁位。

巴士班次疏，等車就20~25分鐘，但實際坐車時間只需7~8分鐘就到六甲山滑雪場。去到滑雪場門口，排排隊買門券，大人２１００ YEN，小朋友就１０５０ YEN(呢個滑雪場標準係小學生或以以下係小人，其他就計大人)，買門券之餘仲會一齊租借埋滑雪用具，職員會比張圖你睇，手指指就可以租借到，真係好方便！而職只都好NICE！

我地幫瞳瞳租左：

1. 雪靴一對～500 YEN (另外1000 YEN按金)
2. 兒童手套一對（玩雪用）～500 YEN (另外1000 YEN按金)
3. 大人手套一對（玩雪用）～500 YEN (另外1000 YEN按金)
4. 雪兜一個～500 YEN (另外1000 YEN按金)

佢會用電腦打印一張租借券比你，離開既時候拎埋租借券去返入口處就可以取回按金，所以要好好KEEP，唔可以唔見架！

介紹下個滑雪場設施先，我會將佢分為滑雪(滑雪板)、小朋友雪兜區、玩雪+砌雪人區及滑草區，入面亦設有兩間餐廳。

好啦，入場啦，首先去拎租借的野，雪靴同手套屬於衣服系列，所以可以在同一間屋仔拎，而雪兜就要在雪兜區附近的屋仔拎，果度D職員好nice，就算你去錯左地方，都會指正你去啱既地方！

滑雪場地圖

滑雪場正門入口

在售票處上面已經列明所有收費項目，睇唔明唔緊要，去到窗口會有圖文並茂的價錢表。

租衫、鞋、褲、手套的地方

租雪靴係方便在雪地度行，500 YEN，$30 港幣鬆D就搞掂，唔駛特登買。

地方好大，雖然人多，但唔覺迫夾。

呢間小屋就係租雪兜，呢位職員好NICE，教埋我地坐雪兜技巧，例如點樣坐會衝得無咁快

每次玩都要拉上山，好辛苦但好好玩！

呢度好安全，有工作人員幫手去「攔截」衝力過猛、或者救起半途「炒車」的小朋友

之後我地去「玩雪+砌雪人區」

雪兜不可內進，要放埋一邊，記得認番自己果個號碼

人工造雪機不斷噴雪，在場既人玩得好開心！

砌雪人之謎解開，原來係靠呢個「工具」，難怪在場既雪人咁靚咁圓！

將所有雪撥入去個「工具」入面，一夾，就完成了！

咁大舊雪擺入去就啱啦！！

～　玩到散哂　～

滑草都唔放過！用返個雪兜照滑可也。

我地都玩左差唔多4個鐘，其實都幾體力透支，一來上上落落，二來在雪地上確實不好走，中間時間去餐廳食少少輕食，比瞳瞳玩多一陣就走啦！瞳瞳在雪地上跌左好多次，膝蓋都擦損少少，仲紅紅地，但係為左「玩」，佢都忍痛繼續行，唔捨得走。

臨走前交還所有物資，在出口處取回按金，就直接在門口等巴士返去纜車站(記得係往「六甲山頂站」方向)，坐返纜車落番去有馬溫泉，返酒店休息下！

我地返去有馬溫泉抖下先～

有用資料:

1. 六甲山滑雪場（２０１５年１２月５日至２０１６年３月２１日開放）

地址：〒657-0101神戸市灘区六甲山町北六甲4512-98

電話：078-891-0366

http://www.rokkosan.com/ski/

2. 六甲-有馬索道

http://kobe-rope.jp/cont03/rokko-hantaiji.pdf

2016年1月7日星期四

【日本、大阪、有馬溫泉】[2015 五日四夜跨年有馬大阪親子遊]Day1 (4之2) 一票到底！買一張車飛由三宮站直到有馬溫泉!

第一日（３０／１２）

香港機場出發 > 關西空港 > 神戶高速船 > 三宮車站 > 有馬溫泉 > 住宿：陵楓閣 > 六甲有馬索道 > 六甲山滑雪場 > 六甲有馬索道 > 陵楓閣浸浴及專人服侍用餐，食神戶牛

神戶空港　＞　三宮車站　（「PORT LINER」）

上回講到，我地順利到達神戶空港，一落巴士，就係神戶空港正門，行入去右轉，就會見到扶手電梯上去搭「PORT LINER」，「PORT LINER」係一個連接神戶空港同市區三宮站的架空鐵路系統，之後我地就會搭佢進入神戶市區「三宮站」啦！

就係神戶空港正門，行入去右轉

見到扶手電梯上去搭「PORT LINER」

見到售票機，就可以買飛，３３０ YEN一位，佢係一條架空鐵路系統，主要有兩條線，不過如果你係神戶空港上車，佢就只係得出三宮站既路線，一頭一尾好簡單，總站搭到總站，唔駛怕唔識落車。

車票，330 YEN由神戶空港到市區三宮站

月台

如果痴痴的等某日終於可等到一生中最愛........

路線圖，我地係黑色果條線，由底下「神戶空港」搭到上去「三宮」。

「三宮」車站，係神戶地區既一個大大大大站，佢匯聚左「阪神」、「阪急」、神戶地下鐵、JR同上面講過既「PORT LINER」。不過只要睇住指示牌，認清目標，就絕對唔難！

首先，我地落車之後，記住我地要去「地下鐵三宮站的西神-山手線」，所沿途留意天花上面既指示牌，搵：「地下鐵」或者「西神-山手線」或者「地下鐵三宮站」或者「地下鐵西神-山手線」。再比多少少hits：「地下鐵三宮站」係地底車站，所以方向係一路向地底行，唔係架空車站來的。

由「PORT LINER」行落去地鐵站，大約6-8分鐘路程。

地下鐵三宮站山手線(谷上方向)　＞　2分鐘　＞　新神戶　＞　北神急行線(谷上方向)　8分鐘　＞　谷上　＞　神戸電鉄有馬線(三田方向) 　11分鐘　＞　有馬口　＞　神戸電鉄有馬線(有馬温泉方向) 4分鐘　＞　有馬温泉