【香港本地親子遊】【油麻地京士柏】「月球公園」升空探險 － 京士柏遊樂場

「京士柏」，一個天氣報告經常提到的地方，其實係邊度呢？簡單來講，就係油麻地消防局後山，九龍市區中心的一個小小山丘，呢度既一花一草一樹木，就好似市區的心肺。

京士柏山上除左有天文台設立的京士柏氣象台外，仲有今次我地介紹的京士柏遊樂場，京士柏遊樂場以「星球、太空」做主題，有似月球隕石坑的滑梯造型，所以好多人又叫呢度做「月球公園」。


要到月球公園，有兩個方法：（方法一　藍線）最方便係油麻地彌敦道，港鐵油麻地站D出口，行入窩打老道油麻地消防局方向，旁邊有條樓梯行上去京士柏配水庫，配水庫旁邊就係氣象台，在另一邊落山，就到月球公園門口啦！上上落落大約20分鐘。

（方法二　紅線）輕鬆D可以沿馬路行，搭九巴203C (來往大坑東及尖沙咀東（麼地道）)或者隧道巴士103(來往竹園邨及蒲飛路)，在衛理道「伊利沙伯醫院」站落車，然後行去帝庭園方向，小車路就係京士柏道，沿路行上去就係月球公園了，大約10分鐘，呢個方法推BB車都好方便。

注意：附近沒有合法泊車位

月球公園（京士柏遊樂場）的入口

呢個就係月球公園（京士柏遊樂場）的入口啦！一入去就見到一個個凹凸不平，好似月球隕石坑地形的佈置，係必到的打卡位置，其實佢係一個滑梯，有兩條滑道，我都有玩，都幾好跣架～哈～

「瀡」到落去之後，你可以選擇行小路，或者考驗自己攀爬能力，由凹凸不平的坑行返上去。

其實呢個滑梯附近仲有條秘密通道行上最高處，可以俯瞰半個遊樂場，至於條「秘道」係邊，就留返大家去搵下啦！

成功登頂啦！

俯瞰半個遊樂場

另一邊就有個穿梭機造型的隧道，旁邊仲有「火星文」裝飾的小遊戲～

其他公園設施有涼亭、氹氹轉、攀爬設施、洗手間等等，「月球公園」地方其實唔大，大約半小時左右就可以玩哂！

公園的小食亭同洗手間

有用資料: 

京士柏遊樂場

位置：油麻地京士柏道。

交通：

1. （藍線）最方便係油麻地彌敦道，港鐵油麻地站D出口，行入窩打老道油麻地消防局方向，旁邊有條樓梯行上去京士柏配水庫，配水庫旁邊就係氣象台，在另一落山，就到月球公園門口啦！大約20分鐘。

2.（紅線）九巴203C (來往大坑東及尖沙咀東（麼地道）)或者隧道巴士103(來往竹園邨及蒲飛路)，在衛理道「伊利沙伯醫院」站落車，然後行去帝庭園方向，小車路就係京士柏道，沿路行上去就係月球公園了，大約10分鐘，呢個方法推BB車都好方便。

其他精選

探索香港恐龍公園(坪石遊樂場)

http://tungbama.blogspot.hk/2016/07/20160706.html

鬧市中的隱世公園：「牛池灣公園(水牛公園)」

http://tungbama.blogspot.hk/2017/06/20170622.html

全港唯一要搭升降機的公園：岩石公園－彩榮路公園

http://tungbama.blogspot.hk/2018/03/20180329.html