最近呢陣子八月尾九月頭準備開學，所以瞳瞳爸爸都比較忙碌，無咁快update到個blog，搞到一眾粉絲頸都長添，我地既「七日六夜泰國布吉親子遊攻略」仲未完架，正所謂「民以食為先」，食好野當然緊要啦！不過去到外地，又要食得夠地道、夠風味，但又要乾淨、穩陣同放心，真係唔容易架！以下我地介紹幾間在泰國芭東可以搵到既食店推介，由food court 美食廣場到街邊檔、餐廳到「掃街」都有，間間我地都「勇」字當頭，親身試過，希望俾到大家參考。
Jungceylon food court
Jungceylon係布吉區最大的購物中心，入面有好多餐廳，例如Burger king、MK golden、Shabu shi、Pizza hut等等，基本上任何地方的菜式都有。
但如果你想經濟一點，想快快手手用餐、又可以一次過點齊幾款唔同口味，就可以去今次介紹既food court啦，food court位於商場的地庫層，在果度有大約20間不同的店舖可以比你選擇，由泰國菜到中國湯麵、日本拉麵到印度薄餅都有，而且有好多座位，唔怕無位坐。
幫襯之前，要先到指定的服務台買一張好似八達通的卡，然後用呢張卡去買野食，食完淨返的錢，可以去返先前開卡的櫃檯退卡，拎返餘額。
 |
| 地方算幾大，唔會覺得迫，啱哂一家大細。 |
 |
| 瞳瞳食得幾滋味！ |
Swensen's
泰國著名的連鎖甜品店，款款雪糕的賣相都好靚，就好似睇故事書或者卡通片入面既雪糕一樣，「影相」、「攞like」，小朋友一定開心～餐牌內有好多選擇，花多眼亂，而且圖文並茂，揀雪糕、點野食，絕對唔困難！我地就豪一次，點左個"Chocolate Fondue"，即係朱古力雪糕火鍋＋9個雪糕球，試盡佢既味道，大約都係300b，$70左右。
Swensen's 就係 Jungceylon旁邊的Big C EXTRA地下，瘋狂Shopping完，然後嚟食個雪糕，一樂也！
 |
| 在Big C EXTRA地下，一望就見到 |
 |
| 好好服務，先送上清水招待 |
 |
| 店員好nice~ |
 |
| Chocolate Fondue |
 |
| 好好味~ 9個雪糕球，試到盡！ |
Dang Restaurant
嚟到泰國，梗係要食泰國菜啦，芭東最出名的泰國菜館係「NO. 6」，晚晚都大排長龍，二三十人排隊都係等閒事，但自從「NO. 6」爆紅之後，芭東出現左好多「NO.X」的食店，如果大家想試，就唔好去錯地方。
我地帶住小朋友，好難同班年青人一齊等咁耐，於是我地揀左正正在「NO. 6」旁邊的Dang Restaurant，網上話Dang Restaurant比「NO. 6」更好食，不過我無食過「NO. 6」，所以無咩意見。講返Dang Restaurant，我地點了菠蘿炒飯、炸蝦併盤、炒雜菜同西瓜汁。
 |
| 同一個動作等野食～ |
 |
| 原個菠蘿，無欺場～可以呀～ |
街邊小食（串燒篇）
泰國的一串串街頭小食，基本上分為「燒烤」同「油炸」，今次我地介紹串燒先，串燒大約20 - 40b 一串，大約$5 - 8 HKD左右，我點左牛、雞、豬、香腸各一串，尤其豬肉果串，我見佢燒極D肉仲係紅色未轉色，原來熟左都係咁既顏色，嚇死我～哈～
街頭野食就無話乾唔乾淨架啦，我的指標就係見有一大班人等就OK，有咩事最多「齊齊哈爾」架啫 XP
街邊小食（炸物篇）
「油炸」的小食，同樣係大約20 - 40 b一串，大約$5 - 8 HKD，叫炸野食既難度仲高，因為樣樣食物都係炸，外表都係金黃色，你完全唔知係咩黎，好多時都係靠估。
我就揀D睇得到形狀的食物，好似呢間的炸雞搥好好味，細細隻（好似麥當勞雞搥 size），唔會炸到好乾，100b有成10幾隻，而且仲有醬汁點，酸酸地，伴啤酒一流。
 |
| 係咪好吸引呢？ |
 |
| 炸雞配地道酸汁 |
 |
| 另一次試雞脾，同樣惹味 |
Briley
去泰國又點少得食海南雞飯，Briley係布吉著名既海南雞飯，好多人覺得位置好難搵，但佢正正係我地酒店Novotel Vintage Park的對面，得來全不費功夫！
佢營業時間只在日間，大慨由早上至下午兩點左右，部份食物更加「賣哂就無」，除左海南雞飯，仲有叉燒、燒肉等等，仲有雙併等自由配搭。試過之後，我覺得海南雞飯又未想像中咁「神級」，反之燒肉不俗，如果你想朝聖而一嚐口癮，識路當散步的話都可以一試。
 |
| 燒肉反而不俗！ |
路邊泰粉
呢間湯粉麵係我地酒店附近，7-11門口，又係只做日頭的攤檔，雖然佢寫8AM-9PM，但好多時佢6點鐵就收舖，原有位置會變成大排檔。佢好簡單只有三種的配料：雞、牛、豬，然後有幾種麵可以揀，湯底亦有清湯同雞湯，每碗50b，即係$11碗咋！
佢果三種食材，如果用我地中國既煮法叫做「肴」，煮得好淋，骨、肉分離，非常好食！如果堂食，會先給我們一整碟配料如芽菜、香葉等等，自己隨喜好放入麵中。
 |
| 整碟配菜在前 |
 |
| 自己招呼自己，斟冰水飲 |
Shabu shi (Central festival)
Shabu shi都係泰國的一間連鎖日式火鍋店，係布吉的Jungceylon同Central festival都有分店，今次我地食Central festival分店。平時日本迴轉壽司店迴轉帶上是壽司，佢既迴轉帶上卻是火鍋配料，每碟的配料份量唔多，例如魚蛋就3粒、牛肉兩片之類，所以唔會浪費，反而仲可以試多d配料。
熟食就自取，有壽司、天婦羅、炸物、雪糕，汽水又係任飲，每人大約400b，即係$100左右，限時1小時15分鐘，其實都已經好夠食。
外貌由tuk tuk車改裝而成的廚房，大家就直接在車旁邊的檯用餐，主打漢堡三文治，即叫即做，好受外國遊客歡迎！次次見佢都比一班遊客圍住，起初以為佢只有一間，但原來在芭東唔同位置都有佢既分店。
因為佢即叫即做，相對等候既時間會耐，佢要一張單跟一張單咁去做，但三文治勁足料，值得等待的～
 |
| 熟食區 |
 |
| 配料有好多款 |
Mama's Kitchen
同樣係芭東市入面，你可以話佢係Briley(海南雞飯)+Dang Restaurant(泰國菜)既混合體，兩間舖頭有既野佢都有，其他如小食、炒粉麵飯咩都有！而且仲要係24小時通宵營業，隨時隨地可以去食，地方夠大、乾淨同企理，好適合一家大細開餐。
 |
| 春卷好好味，必食～ |
 |
| 好似去左台灣咁，泰式蚵仔煎 |
雪條
呢兩款雪條係7-11同Family Mart大家都可以搵到，好好味，好有童年時既回憶，一款係蝴蝶雪條，可以分開兩條食，另一款係西瓜雪條，好抵食，20b = $5/支。
 |
| 一分為二的蝴蝶雪條 |
 |
| 西瓜雪條，西瓜核係朱古力～ |
Burgerboyz
外貌由tuk tuk車改裝而成的廚房，大家就直接在車旁邊的檯用餐，主打漢堡三文治，即叫即做，好受外國遊客歡迎！次次見佢都比一班遊客圍住，起初以為佢只有一間，但原來在芭東唔同位置都有佢既分店。
因為佢即叫即做，相對等候既時間會耐，佢要一張單跟一張單咁去做，但三文治勁足料，值得等待的～
 |
| 體驗一下 |
 |
| 薯條係有柯打先炸，熱辣辣 |
 |
| 勁足料呢～ |
DQ (Jungceylon)
全名係Daily Queen，又係另一間當地出名的雪糕專門店，佢與Swensen's唔同，專做外賣多，Jungceylon已經有專門店，甚至去到布吉機場既離境禁區候機室，臨上飛機前都有佢分店。
大家留意下圖，有無發覺佢meun上面既雪糕係向下呢？其實佢係專登咁做，話佢呢隻好似香港「麥旋風」既雪糕倒轉都唔會跌落黎～
 |
| 候機室都有得食！拿，倒轉拎雪糕都唔跌架～ |
仲有好多地方我地都未試架，希望到你地去到泰國布吉，又可以分享下啦～
延伸閱讀：
2016 七日六夜泰國布吉親子遊攻略 - 準備篇
2016 七日六夜泰國布吉親子遊攻略 - 「Man哥」安排接送及活動篇
2016 七日六夜泰國布吉親子遊攻略 - 住宿篇 - 活在天堂日與夜的「Paresa Resort Phuket」
2016 七日六夜泰國布吉親子遊攻略 - 住宿篇 - 擁有全芭東最大的酒店泳池「Novotel Phuket Vintage Park」
2016 七日六夜泰國布吉親子遊攻略 - 玩樂篇 - 蛋島半日搶灘風雨團
2016 七日六夜泰國布吉親子遊攻略 - 玩樂篇 - 騎大象之旅
2016 七日六夜泰國布吉親子遊攻略 - 飲食篇
2016 七日六夜泰國布吉親子遊攻略 - 行街購物篇
2016 七日六夜泰國布吉親子遊攻略 - SO THAI SPA
沒有留言:
張貼留言