瞳遊樂 (八十後香港家庭的親子旅遊blog): 一本值得推薦及收藏的書籍

2017年5月18日星期四

一本值得推薦及收藏的書籍 - <朱翁同遊香港原貌>

人稱「朱翁」的朱維德先生，一位香港歷史的掌故專家，同時又係電視節目主持、旅行家。

講返我自己，大約小學果陣，我爸爸係沙田商務書店，買左兩本《香港掌故》的書，分1、2冊(其實仲有第3冊，不過已絕版多時，幸好大個之後都搵得返)，返到屋企我就日日睇，對住入面既文章，再係地圖搵返個位置。內文唔係一般歷史咁沉悶，而係「掌故」，「掌故」同硬生生的「史實」唔同，內容會有一些民間傳說，但亦唔係亂吹水，掌故亦要建立在史實上面，互相平衡。之後自己對香港的歷史好有興趣，特別係民間風俗的故仔：例如兩位宋朝末代皇帝－宋帝昰同宋帝昺香港避難經歷，除左大家已知的九龍城宋皇台之外，其實黃大仙的衙前圍村、「九龍」個名的由來、盤菜的起源等等，都有好多同佢地有關係的故仔。

可能比朱翁影響左，發覺自己同佢都幾相似，鍾意行山、歴史、同樣做過領隊帶團出外地，所以有時行開二手書店，我都會搵返朱維德既書，就算佢講世界各地旅遊趣聞，文筆都生動有趣，幾得意！

早排係網上，見到朱翁今年有新書出，叫《朱翁同遊香港原貌》，而且出版商雅集出版社仲搞左個：「大嶼山六十年代的旅見旅聞朱翁與你同遊分享會」，瞳瞳爸爸有幸得到出版商的安排，出席左今次分享會。

分享會在尖沙咀文化中心舉行，今日見朱翁，我都成為小粉絲，勁開心！

在主持人介紹開場之後，今年八十有五的朱翁開始佢既Talk Show啦！《朱翁同遊香港原貌》一書，主要由朱翁介紹六十年代在大嶼山旅遊的相片，由分流角開始，沿大嶼山岸邊一直綑邊到二澳、大澳、深屈、東涌、白芒、陰澳、大轉二轉三轉、梅窩、芝麻灣半島、長沙、石壁、狗嶺涌剛好一圈，之後向上山走，由西向東走：上萬丈布、悟園、鹿湖、寶蓮寺、鳳凰山、大東山、二東山、一直走到急水門止！

一邊睇全珍貴的黑白相片，一邊聽朱翁風趣幽默的講解，真係一大賞心樂事。朱翁好好記性，後生的我都自愧不如，就連當時村民姓什名誰都全部記得，而且有佢的旁述，你會了解圖片更多，同埋圖片內有咩值得留意的地方。

不經不覺兩小時過去（當然嫌唔夠喉），時間有限，大家都趕快完場，自己都獲益良多。